১০ হাজাৰ ফুট উচ্চতাত উৰন্ত অৱস্থাত আছিল যাত্ৰীবাহী উৰাজাহাজখন। হঠাৎ খোল খাই গ’ল উৰাজাহাজখনৰ পিছফালৰ দুৱাৰখন। লগে লগে পিছ দুৱাৰেদি যাত্ৰীৰ সামগ্ৰী বাগৰি পৰি আকাশত উৰিবলৈ লাগিল। বিমানখনৰ ভিতৰলৈ তীব্ৰ গতিৰে সোমাই আহিল বতাহ। এই অনাকাংক্ষিত পৰিস্থিতিত পৰি আতংকত জীৱ যাও-যাও অৱস্থা হ’ল যাত্ৰীসকলৰ।
ৰাছিয়াৰ এন এন-২৬-১০০ নামৰ উৰাজাহাজখনত সংঘটিত হৈছে এই ভয়াৱহ কাণ্ড। এয়াৰএৰ’ কোম্পানীৰ বিমান এন এন-২৬-১০০ এ চাইবেৰিয়াৰ মাগান চহৰৰ পৰা মাদাগানলৈ যোৱাৰ বাটত সংঘটিত হয় এই দুৰ্ঘটনাটো।
জানিব পৰা মতে ২৫ জন যাত্ৰী আছিল এই বিানখনত। ঘটনাৰ সমগ্ৰ দৃশ্য কেমেৰাত বন্দী কৰিছে বিমানখনৰ এগৰাকী যাত্ৰীয়ে।
সংবাদ মাধ্যমত প্ৰকাশিত খবৰ অনুসৰি, বিমানৰ ক্ৰুৱে দুৱাৰখন খুলি যোৱা দেখা পোৱাৰ পিছত বিমানৰ কৰ্মচাৰীসকলে বিমানখনক পুনৰ মেগানলৈ নিয়াৰ পৰিকল্পনা কৰে।
পাইলটে দক্ষতাৰ পৰিচয় দি দ্ৰুতগতিত বিমানখন নিৰাপদে মেগান চহৰত অৱতৰণ কৰে। এই ঘটনাত অৱশ্যে কোনো যাত্ৰী আহত হোৱা নাই বুলি বিমান সংস্থাটোৱে জানিবলৈ দিয়ে।
কিন্তু আকাশ মাৰ্গত বিমানখনৰ দুৱাৰখন খোল খাই যোৱা ঘটনাৰ বাবে এতিয়া যাত্ৰীসকলৰ সুৰক্ষাক লৈ প্ৰশ্ন উত্থাপন হৈছে। চলন্ত বিমানখনৰ দুৱাৰ কেনেকৈ খোল খাই গ’ল সেই সন্দৰ্ভত তদন্ত কৰা হ’ব বুলি এয়াৰ এৰ’ই জানিবলৈ দিছে।
উল্লেখ্য যে ১৯৭৯ চনৰ পৰাই চাইবেৰিয়াত নিয়মীয়াকৈ চলি আছে ২৬ জন যাত্ৰী কঢ়িয়াব পৰা এই বিমানখন।