শিলচৰৰ বিমান বন্দৰত আজমলক আদৰণি জনোৱাৰ সময়ত এ আই য়ু ডি এফ দলৰ কৰ্মীয়ে ‘পাকিস্তান জিন্দাবাদ’ ধ্বনি দিয়া বুলি সংবাদ মাধ্যমত প্ৰচাৰিত বাতৰি পোনচাটে অস্বীকাৰ কৰিছে দলটোৱে।
টুইটাৰ যোগে এ আই য়ু ডি এফৰ তৰফৰ পৰা স্পষ্ট কৰি দি কোৱা হৈছে যে কৰ্মীসকলে ‘পাকিস্তান জিন্দাবাদ’ নহয়, ‘আজিজ খান জিন্দাবাদ’ বুলিহে ধ্বনি দিছিল। আজিজ খানকে পাকিস্তান বুলি একাংশই ভুল বাখ্যা কৰা বুলি দলটোৱে স্পষ্ট কৰি দিছে।
উল্লেখ্য আজমলক আদৰিবলৈ যোৱা কিছু সংখ্যক আজমলৰ সমৰ্থকে তথা এ আই য়ু ডি এফ দলৰ কৰ্মীৰ মুখত পাকিস্তান জিন্দাবাদ বুলি দিয়া ধ্বনি স্পষ্টকৈ ভিডিঅ’টোত প্ৰকাশ পোৱা বুলি বহুতে অভিযোগ কৰিছে।
ইতিমধ্যে সামাজিক মাধ্যমত ভাইৰেল হৈ পৰিছে ভিডিঅ’টো।
আৰক্ষী-অৰ্ধ সামৰিক বাহিনীৰ উপস্থিতি তথা সন্মুখতে পাকিস্তান জিন্দাবাদ ধ্বনি দিয়াৰ পিছতো সেই লোকসকলৰ বিৰুদ্ধে কিন্তু কোনো ব্যৱস্থা গ্ৰহণ কৰা নাই বুলিও বহুতে কৈছে।
কিছুদিন পূৰ্বে আৰৱী ভাষাৰ বেনাৰক কেন্দ্ৰ কৰি বিতৰ্কত সোমোৱা বদৰুদ্দিন আজমল পুনৰ এক নতুন বিতৰ্কত সোমাই পৰিছে।
তেওঁৰ সন্মুখত কিদৰে পাকিস্তান জিন্দাবাদ দিবলৈ সাহস কৰিলে বা তেওঁ কিয় এবাৰো বাধা নিদিলে বুলিও বহুতে প্ৰশ্ন উত্থাপন কৰিছে।
ড০ হিমন্ত বিশ্ব শৰ্মাইয়ো এই সন্দৰ্ভত ছ’চিয়েল মিডিয়াযোগে প্ৰতিক্ৰিয়া প্ৰকাশ কৰিছে।
নিজৰ ফেইচবুক পেইজৰ পৰা তেওঁ আপলোড কৰিছে এই ভিডিঅ’টো।
ইয়ে কংগ্ৰেছক ভালদৰে উদঙাই দিছে যিয়ে মিত্ৰতা কৰি এনে শক্তিক উৎসাহিত কৰি আছে বুলিও কটাক্ষ কৰে হিমন্তই।
“আমি ইয়াৰ বিৰুদ্ধে সৰ্বতোপ্ৰকাৰে যুঁজ দিম।” হিমন্তই এইদৰে কয়।
