“সংগীত পৰিচালক” হিচাপে চিনাকি দিয়া অজয় ফুকন নামৰ শিল্পীজনক ছ’চিয়েল মিডিয়া আৰু সংবাদ মাধ্যমৰ জৰিয়তে যুৱ প্ৰজন্মৰ হাৰ্টথ্ৰ’ব জুবিন গাৰ্গে বৰ্জন কৰাৰ পাছতে পোনপ্ৰথমবাৰলৈ নৰ্থ-ইষ্ট নাওৰ সাংবাদিকৰ আগত প্ৰতিক্ৰিয়া প্ৰকাশ কৰিছে শিল্পীজনে।
তেওঁৰ মতে, তেওঁৰ জ্যেষ্ঠ ভ্ৰাতৃস্বৰূপ শিল্পী জুবিন গাৰ্গে কাৰোবাৰ প্ৰৰোচনাত পৰিহে তেওঁৰ বিৰুদ্ধে এনে আক্ৰমণাত্মক বক্তব্য কৰিছে।
“তেওঁক কোনোবাই মোৰ বিৰুদ্ধে বেয়াকৈ লগাইছে। ইয়াত ৰাজনীতি আছে। ডাঙৰ এক ৰাজনৈতিক ষড়যন্ত্ৰ আছে। মোৰ বিৰুদ্ধে বহু বেছি বেয়াকৈ লগাইছে বাবে জুবিন দাৰ খং উঠিছে নিজৰ ভাই হিচাপে”, অজয় ফুকনে কয়।
জুবিন গাৰ্গক আদৰ্শ হিচাপে লৈ আহিছে বুলি মন্তব্য কৰি তেওঁ লগতে কয়, “মই তেওঁক আজিও ভাল পাওঁ, ভৱিষ্যতেও ভাল পাই যাম। মোক জুবিন দাই বেয়া পালেও তেওঁৰ প্ৰতি শ্ৰদ্ধা আন্তৰিকতা, মৰম থাকিবই।”
আনহাতে, ফুকনে জুবিন গাৰ্গক নোসোধাকৈ কিছুমান কাম কৰিছিল বুলি সংবাদ মাধ্যমৰ আগত কৰা অভিযোগৰ প্ৰতিক্ৰিয়া প্ৰকাশ কৰি তেওঁ কয়, “তেওঁক নোসোধাকৈ মই একো কাম কৰা নাই। কোনোবাই মিটিঙত মাতিছে তেতিয়া গৈছো। শিল্পী সমাজ হিচাপে যোৱা নাই, এগৰাকী শিল্পী হিচাপে গৈছিলো।”
তেওঁ লগতে কয়, “মই জুবিন দাক লগ কৰিম। মোৰ মনৰ কথাখিনি ক’ব লাগিব। তেওঁ মোৰ দাদাৰ নিচিনা, তেওঁ মোক ভাই বুলি ভাবে।”
তাৎপৰ্য্যপূৰ্ণভাৱে, কা বিৰোধী আন্দোলনত শিল্পী সমাজৰ মাজত বিভাজন আনিবলৈ এনেদৰে তেওঁৰ বিৰুদ্ধে জুবিন গাৰ্গক কথা লগোৱা বুলিও তেওঁ অভিযোগ তোলে।
“কা-ৰ বিৰুদ্ধে আন্দোলন চলাই নিব লাগিব। বহুতে এই কা-বিৰোধী আন্দোলনক ভাগ ভাগ কৰাৰ চেষ্টা কৰিছে। নহ’লে তেওঁক ফোন কৰি কৰি লগাই নাথাকে নহয় মোৰ বিষয়ে। মই যি আন্দোলন কৰিছো তাত কোনো অশুদ্ধতা নাই। জাতিৰ স্বাৰ্থত সকলো একেলগ হওক, তাৰ বাহিৰে বেলেগ একো উদ্দেশ্য নাই”, ফুকনে এইদৰে কয়।
উল্লেখ কৰিব পাৰি যে পূৰ্বেও বিতৰ্কত জড়িত থকাৰ নজিৰ থকা শিল্পীজনৰ বিৰুদ্ধে CAA-বিৰোধী আন্দোলনত জড়িত শিল্পীসকলৰ অভিভাৱকত্ব জাহিৰ কৰি বিভিন্ন সময়ত একাধিক বিভ্ৰান্তিকৰ মন্তব্য দি অহা বুলি অভিযোগ উঠিছে।
কালি ফেইচবুকত দিয়া এটা পোষ্টত জুবিন গাৰ্গে ফুকনৰ বিৰুদ্ধে এইদৰে লিখিছিল, “অনুগ্ৰহ কৰি তেওঁ আহ্বান জনোৱা কোনো কাৰ্য্যসূচীলৈ নাহিব। আছাম আৰ্টিষ্ট এছ’চিয়েশ্যন কলাগুৰু আৰ্টিষ্ট ফাউণ্ডেশ্যনৰ দ্বাৰা পৰিচালিত। মই আছু আৰু আন আন সংগঠনবোৰৰ সৈতে আলোচনা কৰি সকলো ঘোষণা কৰিম। কলাগুৰু আৰ্টিষ্ট ফাউণ্ডেশ্যন এটা ঐক্যবদ্ধ গোট। ইয়াত ৰাজনীতিৰ কোনো স্থান নাই। কোনোবাই সেইটো কৰিব খুজিলে মই মোহাৰি পেলাম। অজয় ফুকনৰ এতিয়া জুবিন ফেন ক্লাবৰ সৈতে সম্পৰ্ক নাই”।
আজি সংবাদ মাধ্যমৰ আগত জুবিন গাৰ্গে “হু ইজ অজয় ফুকন” বুলি প্ৰশ্ন কৰি ফুকনৰ কৰ্মকাণ্ডক সম্পূৰ্ণ নাকচ কৰে।
