সোমবাৰে আঞ্চলিক গণ মৰ্চাৰ সভাপতি অজিত কুমাৰ ভূঞাই এক সংবাদমেল যোগে মুখ্যমন্ত্ৰী হিমন্ত বিশ্ব শৰ্মাই এনকাউন্টাৰৰ জৰিয়তে ৰাজ্যক দেশৰ ভিতৰতে তৃতীয় স্থানলৈ আনিবলৈ সফল হ’ল বুলি অভিযোগ কৰে।
তেওঁ কয় “মুখ্যমন্ত্ৰীয়ে অসমক দেশৰ ভিতৰত ৩ নম্বৰ ৰাজ্যলৈ আনিব বুলি নিৰ্বাচনত দাংকোপ মাৰিছিল। কিন্তু ই কিমান দূৰ সফল হ’ল সেই কথা লক্ষ্যণীয়। কিন্তু এনকাউন্টাৰৰ জৰিয়তে ৰাজ্যখনক ৩ নম্বৰ স্থানলৈ আনিবলৈ তেওঁ সফল হ’ল।
“কীৰ্তি কমল বৰাৰ এনকাউন্টাৰৰ ঘটনাই বহু লোকৰ চকু খুলি দিলে। তেতিয়াহে এনকাউন্টাৰ সমৰ্থন কৰা বহু লোকে বুজিলে যে এনকাউন্টাৰ ৰাজনীতি কিমান ভয়ংকৰ হ’ব পাৰে।”- অজিত ভূঞাই কয়।
হিমন্ত বিশ্বৰ চৰকাৰৰ আমোলত অসমৰ সাধাৰণ মানুহৰ জীৱনৰ নিৰাপত্তা শূণ্য হৈ পৰিছে বুলি উল্লেখ কৰি ভূঞাই মুখ্যমন্ত্ৰী হিমন্ত বিশ্ব শৰ্মাই আইন-কানুন, বিচাৰক সকলো হৈ পৰিছে বুলি অভিযোগ কৰে।
“হিমন্ত বিশ্ব শৰ্মা পুলিচৰ সেনাপতি ৰূপত অৱৰ্তীৰ্ণ হৈছে। মুখ্যমন্ত্ৰী গৰাকীয়ে বিৰোধী শক্তিৰ বাহিনীক আওঁপকীয়াকৈ হত্যা কৰিবলৈ পুলিচ বাহিনীক টিগাৰ টিপিবলৈ উৎসাহিত কৰিছে।”
“চৰকাৰৰ অপকৰ্মৰ বিৰুদ্ধে অসমৰ ৰাইজ প্ৰতিবাদ কৰিবলৈ ওলাই আহিছে। কিন্তু প্ৰতিবাদ কৰিবলৈ ওলাই অহা লোকসকলক ভাবুকি দিবলৈ পুলিচক টিগাৰ টিপিবলৈ ট্ৰেইনিং দিছে মুখ্যমন্ত্ৰীয়ে।”
“অসমত মানুহে এতিয়া মুকলিকৈ কথা ক’বলৈ ভয় কৰে। মুকলিকৈ কথা কোৱাৰ এতিয়া অসমত অৱকাশ নাই। ক্ষমতাই মূৰত ধৰা অপৰিপক্ক ৰাজনীতিকে ক্ষমতা হেৰুৱাৰ ভয় খালে এনেধৰণৰ ৰাজনীতি কৰিবলৈ আৰম্ভ কৰে আৰু হিমন্ত বিশ্ব শৰ্মা ইয়াৰ উদাহৰণ।”
অসমৰ জনতা ৮০ আৰু ৯০ দশকলৈ উভতি যাব নিবিচাৰে বুলি মন্তব্য কৰি প্ৰতিটো এনকাউন্টাৰৰ উচ্চ পৰ্যায়ৰ তদন্তৰ দাবী কৰে অজিত কুমাৰ ভূঞাই।
কীৰ্তি কমল বৰাক বিনা দোষত গুলিওৱাৰ অপৰাধত অতি সোনকালে আনন্দ মিশ্ৰক চাকৰিৰ পৰা বৰ্খাস্ত কৰিব লাগে বুলি দাবী জনায় তেওঁ। লগতে হিমন্তৰ আশীৰ্বাদত আনন্দ মিশ্ৰই সমাজ সংস্কাৰৰ সমগ্ৰ দায়িত্ব লৈছিল বুলিও অভিযোগ কৰে অজিত ভূঞাই।
আনহাতে ক্ষমতা বিকেন্দ্ৰীকৰণ নীতিৰ আধাৰত দেশৰ আটাইতকৈ গুৰুত্বপূৰ্ণ প্ৰশাসনিক ব্যৱস্থা পঞ্চায়ত তথা পৌৰ সভা আৰু নিগম হিমন্ত বিশ্ব শৰ্মাৰ আমোলত আটাইতকৈ শোষিত আৰু অৱহেলিত বুলি অভিযোগ কৰিছে ভূঞাই।
হিমন্ত বিশ্ব শৰ্মাই মোদীৰ ‘সবকা সাথ সবকা বাত’ৰ সুৰত সুৰ মিলাই আওৰালেও এইয়া মাত্ৰ শ্ল’গানতে সীমাবদ্ধ থকাৰ অভিযোগ কৰি ভূঞাই প্ৰশাসনৰ আটাইতকৈ নিম্ন পৰ্যায়ত কাম কৰি যোৱা পঞ্চায়ত কৰ্মচাৰীৰ মৰ্মবেদনা বুজিবলৈ আহ্বান জনায়।
