অসমত আন্তঃৰাজ্যিক পাৰপত্ৰ প্ৰৱৰ্তন, দ্বি-নাগৰিকত্ব আৰু নাগৰিকত্ব সংশোধনী বিধেয়ক বাতিলৰ দাবীত অসম জাতীয়তাবাদী যুৱ-ছাত্ৰ পৰিষদে এলানী প্ৰতিবাদী কাৰ্যসূচী গ্ৰহণ কৰিছে। আজি গুৱাহাটীত এক সংবামেল সম্বোধন কৰি যুৱ-ছাত্ৰ পৰিষদৰ সাধাৰণ সম্পাদক পলাশ চাংমায়ে এই ঘোষণা কৰে।
ইয়াৰ অন্তৰ্গত সংগঠনটোৱে ২৬ জানুৱাৰিত গণৰাজ্য দিৱসৰ দিনা ৰাজ্যৰ গাঁৱে-ভূঞে সচেতনতা বৃদ্ধিৰ বাবে পদযাত্ৰা কৰাৰ লগতে একেই দাবীত ৩০ জানুৱাৰিত ৰাজ্যজুৰি গণতান্ত্ৰিক প্ৰতিবাদী কাৰ্যসূচী আৰু ৭ ফেব্ৰুৱাৰিত ৰাজ্যৰ বিভিন্ন প্ৰান্তত ৰেল অৱৰোধ কাৰ্যসূচী গ্ৰহণ কৰিব।
আজিৰ সংবাদমেলত পলাশ চাংমায়ে কয়, ‘অসমত দ্বি-নাগৰিকত্ব আৰু আন্তঃৰাজ্যিক পাৰপত্ৰ প্ৰৱৰ্তনৰ দাবীত অসম জাতীয়তাবাদী যুৱ-ছাত্ৰ পৰিষদে ৪০ বছৰধৰি আন্দোলন কৰি আহিছে। আজিৰ ৰাজ্যখনৰ পৰিস্থিতিত আমাৰ এই দাবী এতিয়া প্ৰাসংগিক হৈ পৰিছে।’
আনহাতে বিধানসভাৰ আগন্তুক বাজেট অধিবেশনত অগপক বিৰোধীৰ সবল ভূমিকা লৈ সকলো বিৰোধী দলক একত্ৰিত কৰি নাগৰিকত্ব সংশোধনী বিধেয়ক বাতিলৰ দাবীত বিধানসভাত এক প্ৰস্তাৱ গ্ৰহণৰ বাবে হেচা প্ৰয়োগৰ বাবেও তেওঁ আহ্বান জনায়।
চাংমায়ে লগতে মুখ্য মন্ত্ৰী সৰ্বানন্দ সোণোৱালে নাগৰিকত্ব সংশোধনী বিধেয়ক সপক্ষে স্থিতি স্পষ্ট কৰাৰ কাৰ্যক ধিক্কাৰ দি কয়,
‘সৰ্বানন্দ সোণোৱাল যে এজন প্ৰকৃততে চূড়ান্ত ক্ষমতালোভী আৰু দিল্লীৰ ওচৰত আঠু লোৱা নেতা তেওঁৰ স্থিতিয়ে সেয়া স্পষ্ট কৰিলে।’
ইয়াৰ উপৰি ৬ জনগোষ্ঠীৰ জনজাতিকৰন বিজেপি চৰকাৰৰ আভূৱা আখ্যাৰে ইয়াৰ বাবে গঠন কৰি দিয়া মন্ত্ৰীগোটৰ সমিতিখনে ৰাজ্যসভাৰ অধিবেশনৰ দুদিন পাছতহে প্ৰতিবেদন দাখিল কৰাৰ বাবে দিন ঠিক কৰা বিষয়টোত তেওঁ সন্দেহ প্ৰকাশ কৰে।