জাতীৰ স্বাৰ্থত মাঘ বিহুৰ উৰুকাৰ ভোজ এৰি অনশনত বহা ৭০ সংগঠনৰ প্ৰতিনিধিয়ে আজি বিয়লি দুই বজাত অনশন ভংগ কৰে। বিশিষ্ট সাংবাদিক অজিত কুমাৰ ভূঞাই সংকল্প পাঠ কৰোৱাৰ পাছত ভংগ হয় কৃষক মুক্তি সংগ্ৰাম সমিতিসহ ৭০ সংগঠনৰ এই অনশন কাৰ্যসূচী।
নাগৰিকত্ব সংশোধনী বিধেয়ক বাতিলৰ দাবীত গুৱাহাটীৰ চচলত থকা প্ৰতিবাদ স্থলীত কালিৰে পৰা আৰম্ভ হৈছিল এই অনশন।
অনশন ভংগ কৰাৰ পাছতেই বিজেপি চৰকাৰে গৃহীত কৰাব বিচৰা জাতিধ্বংসী নাগৰিকত্ব সংশোধনী বিধেয়ক বাতিল নকৰিলে ইয়াৰ বিৰূদ্ধে সৰ্বাত্মক গণ প্ৰতিৰোধৰ জৰিয়তে বিধেয়ক বিৰোধী আন্দোলনক এক জাতীয় আন্দোলনৰ ৰূপ দিব বুলি অখিল গগৈয়ে প্ৰকাশ কৰে।
সাংবাদিকৰ আগত মত প্ৰকাশ কৰি তেওঁ কয়, ‘নাগৰিকত্ব সংশোধনী বিধেয়কৰ বিৰূদ্ধে সমগ্ৰ অসমৰ ৰাইজ একলগ হৈছে। জাতীয় সংগঠন, ৰাজনৈতিক দল, বুদ্ধিজীৱী, সাংবাদিক, মহিলা, দিব্যাংগ সকলো ঐক্যবদ্ধ হৈ ওলাই আহিছে। গতিকে চৰকাৰে ৰাইজৰ কথা বুজি বিধেয়কখন বাতিল কৰা উচিত।’
বিধেয়কখন বাতিল নকৰিলে বিজেপিক অসমত শান্তিত থাকিবলৈ নিদিয়াৰ হুংকাৰ দি তেওঁ ‘২০১৯ৰ নিৰ্বাচনত অসমত বিজেপিক পৰাভূত কৰা হ’বই আৰু অসমৰ ৰাজনীতিৰ পৰা বিজেপিক উভালি পেলোৱা হ’ব’ বুলি মন্তব্য কৰে।
তেওঁ বিধেয়কবিৰোধী সংগ্ৰামখন গাঁৱে-ভূঞে আগুৱাই নিয়া প্ৰচেষ্টা হাতত লোৱা বুলিও মন্তব্য কৰে।
উল্লেখযোগ্য যে বিধেয়ক বিৰোধী এই আন্দোলনলৈ সমৰ্থন জনাবলৈ কালি উৰুকাৰ নিশাটোত বিভিন্ন স্থানৰ লোক আহি এই অনশন কাৰ্যসূচীত যোগ দিয়ে।