সন্ত্ৰাসবাদী বা মাওবাদীক অসমলৈ নিমন্ত্ৰণ কৰাৰ বাবে অখিল গগৈক গ্ৰেপ্তাৰ কৰা হৈছিল। চন্দ্ৰপুৰত এই বিস্ফোৰক মন্তব্য কৰিছে মন্ত্ৰী হিমন্ত বিশ্ব শৰ্মাই।
অখিলৰ বিৰুদ্ধে NIA ৰ গোচৰ মাওবাদীৰ সৈতে সম্পৰ্ক থকাৰ বাবে চলাইছে বুলি দাবী কৰি মন্ত্ৰীগৰাকীয়ে NIA ৰ চাৰ্জশ্বীটত কি আছে সেই কথাও ৰাজহুৱা কৰে।
তেওঁ কয় ‘NIA ৰ চাৰ্জশ্বীটত তেওঁলোকে এই ল’ৰাজনে মাওবাদীৰ প্ৰশিক্ষণ ল’বৰ বাবে কিদৰে ল’ৰা পঠিয়াইছিল বা কিধৰণে তেওঁলোকে প্ৰশিক্ষণ লৈ ঘূৰি আহি অসমত মাওবাদী আন্দোলন আৰম্ভ কৰিছিল সেইবোৰ কথা উল্লেখ আছে।‘
ইপিনে, কোনোধৰণৰ কা বিৰোধী আন্দোলন কৰি অখিল গগৈৰ গ্ৰেপ্তাৰ হোৱা নাই বুলি দাবী কৰি মন্ত্ৰীগৰাকীয়ে লগতে কয় ‘কোনোবা মানুহক জেইলত থৈ আমি ৰাজনীতি নকৰো। জেইলত থকা- নথকাৰ সিদ্ধান্ত আদালতে ল’ব তাৰ লগত ৰাজনীতিৰ কথা নাই। অখিল গগৈৰ গ্ৰেপ্তাৰ কোনো ৰাষ্ট্ৰদ্ৰোহৰ কাৰণে হোৱা নাই বা ‘কা’ আন্দোলন সমৰ্থন কৰাৰ বাবে হোৱা নাই।‘
তেওঁ দোষী হয় নে নিৰ্দোষী হয় সেয়া আইন আৰু আদালতে চাব বুলি হিমন্তই কয়।
