আগন্তুক উত্তৰ প্ৰদেশ বিধান সভা নিৰ্বাচনত বিজেপিক উৎখাত কৰিবলৈ এখন ৰাজনৈতিক মঞ্চ নিৰ্মাণত ব্যস্ত থকা সমাজবাদী পাৰ্টিৰ নেতা অখিলেশ যাদৱে মুকলি সমৰ্থন আগবঢ়াইছে তৃণমূল কংগ্ৰেছৰ মুৰব্বী মমতা বেনাৰ্জীলৈ।
মমতা বেনাৰ্জীৰ নেতৃত্বত হ’ব লগা এক বৈকল্পিক ৰাজনৈতিক মৰ্চাত যোগদান কৰাৰ সম্ভাৱনা প্ৰকাশ কৰিছে উত্তৰ প্ৰদেশৰ প্ৰাক্তন মুখ্যমন্ত্ৰীজনে। লগত উত্তৰ প্ৰদেশত বৰ্তমানৰ শাসকীয় দল বিজেপি বংগ নিৰ্বাচনত মমতা বেনাৰ্জীৰ হাতত নিশ্চিহ্ন হোৱাৰ দৰে উত্তৰ প্ৰদেশতো নিশ্চিহ্ন হ’ব বুলি মন্তব্য কৰে অখিলেশ যাদৱে।
“মই মমতা বেনাৰ্জীক স্বাগতম জনাইছো। যিদৰে তেওঁ বংগত বিজেপিক মচি পেলাইছিল, উত্তৰ প্ৰদেশৰ ৰাইজে বিজেপিক নিশ্চিহ্ন কৰিব।” ঝান্সীত সাংবাদিকৰ আগত অখিলেশ যাদৱে কয়।
অৱশ্যে তৃণমূলৰ সৈতে মিত্ৰতাৰ সন্দৰ্ভত সাংবাদিকৰ প্ৰশ্নৰ উত্তৰত সঠিক সময় আহিলে এই বিষয়ে কথা পাতিম বুলি উল্লেখ কৰে প্ৰাক্তন মুখ্যমন্ত্ৰীজনে।
সভাত সমাজবাদী পাৰ্টিৰ নেতাজনে কংগ্ৰেছকো সমালোচনাৰ লক্ষ্য কৰি লয়। “ৰাইজে তেওঁলোকক অস্বীকাৰ কৰিব আৰু তেওঁলোকে আগন্তুক নিৰ্বাচনত শূন্য আসন লাভ কৰিব” বুলি মন্তব্য কৰি তেওঁ কংগ্ৰেছ নেত্ৰী প্ৰিয়ংকা গান্ধী ভাদ্ৰাৰ উপহাসৰ প্ৰত্যুত্তৰ দিয়ে।
বৃহস্পতিবাৰে পশ্চিম উত্তৰ প্ৰদেশৰ মোৰাদাবাদত এক ৰেলীত শ্ৰীমতী গান্ধী ভাদ্ৰাই কেন্দ্ৰীয় মন্ত্ৰী অজয় মিশ্ৰৰ পুত্ৰৰ কনভয়ে কৃষকক হত্যা কৰাৰ পিছত প্ৰতিবাদৰ সময়ত অখিলেশ যাদৱৰ অনুপস্থিতিৰ ওপৰত প্ৰশ্ন উত্থাপন কৰিছিল।
ঝান্সীত প্ৰধানমন্ত্ৰী নৰেন্দ্ৰ মোদীয়ে উদ্বোধন কৰা পূৰ্বাঞ্চল এক্সপ্ৰেছ ৱেক লৈও যাদৱে বিজেপিক সমালোচনা কৰে। তেওঁ দাবী কৰে যে বিজেপিয়ে তেওঁৰ দলৰ দ্বাৰা আৰম্ভ কৰা প্ৰকল্পৰ কৃতিত্ব লৈ আছে।
“যদি সমাজবাদী পাৰ্টিয়ে ২২ মাহত এক্সপ্ৰেছৱে নিৰ্মাণ কৰিব পাৰে তেন্তে বিজেপিয়ে একেটা কাম কৰিবলৈ কিয় ৪-৫ বছৰ সময় লৈছিল? ইয়াৰ কাৰণ হৈছে তেওঁলোকে উত্তৰ প্ৰদেশৰ লোকসকলৰ কল্যাণৰ বাবে কাম কৰিব নিবিচাৰে।” তেওঁ মন্তব্য কৰে।