কৰ’নাৰ ভেকচিনৰ বিষয়তো ৰাজনীতি সোমাল। কৰ’নাৰ ভেকচিনক ‘বিজেপিৰ ভেকচিন’ বুলি কটাক্ষ কৰিছে সমাজবাদী দলৰ সভাপতি অখিলেশ যাদবে। তেওঁ লগতে এই ভেকচিন নলয় বুলি জানিবলৈ দিয়ে।
বাতৰি অনুসৰি, শনিবাৰে সমাজবাদী নেতাগৰাকীয়ে কয় যে তেওঁ এতিয়া ভেকচিন নলয়। তেওঁ লগতে কয় যে ‘বিজেপিৰ ভেকচিনক কেনেকৈ বিশ্বাস কৰিম?’
অখিলেশ যাদবে লগতে কয় যে তেওঁ দলে ক্ষমতালৈ আহিলে সকলোৱে বিনামূলীয়াকৈ কৰ’নাৰ ভেকচিন পাব। কিন্তু বিজেপিৰ ভেকচিন কোনো কাৰণতে লোৱা নাযাব।
সমাজবাদী নেতাগৰাকীৰ এনে মন্তব্যৰ বিৰুদ্ধে প্ৰতিক্ৰিয়া প্ৰকাশ কৰিছে বিজেপিয়ে। অখিলেশৰ এনে মন্তব্যই ভেকচিনক লৈ সাধাৰণ লোকৰ মনত বিভ্ৰান্তিৰ সৃষ্টি কৰিব পাৰে বুলি অভিযোগ কৰা হৈছে।
উত্তৰ প্ৰদেশৰ উপ-মুখ্যমন্ত্ৰী কে পি মৌৰ্যই কটাক্ষ কৰি কয় যে অখিলেশ যাদবে ভেকচিনক বিশ্বাস নকৰে আৰু উত্তৰ প্ৰদেশৰ মানুহে অখিলেশক বিশ্বাস নকৰে। ভেকচিনক লৈ প্ৰশ্ন তুলি নেতাগৰাকীয়ে দেশখনৰ চিকিৎসক তথা বিজ্ঞানীসকলক অপমান কৰিছে।
তেওঁ সমাজবাদী দলৰ সভাপতিগৰাকীয়ে ক্ষমা বিচৰাৰো দাবী তোলে।
ইপিনে, অখিলেশ যাদবৰ মন্তব্যক সমৰ্থন জনাই আৰু এখোপ আগবাঢ়ি উদ্ভট মন্তব্য কৰিছে সমাজবাদী দলটোৰ আন এগৰাকী নেতা আশুতোষ সিনহাই।
সিনহাই দাবী কৰে,’’ অখিলেশ যাদবে যেতিয়া ভেকচিন নলওঁ বুলি কৈছে তাৰ আঁৰত নিশ্চয় যুক্তি থাকিব। হয়তো ই মানুহৰ ক্ষতি কৰিব। ভেকচিন ল’লে আপুনি নপুসকতো পৰিণত হব পাৰে। অখিলেশ যাদবে ভেকচিন নোলোৱাৰ সিদ্ধান্ত ল’লে সমাজবাদী দলৰ কোনোৱে ভেকচিন নল’ব।