‘ছয় জনগোষ্ঠীয়ে কাৰো পৈতৃক সম্পত্তি বিচাৰি আন্দোলন কৰি অহা নাই। এটি পুৰণি জনগোষ্ঠীয়ে নিজৰ অস্তিত্ব ৰক্ষাৰ স্বাৰ্থত এখন সুকীয়া কমতাপুৰ ৰাজ্য তথা জনগোষ্ঠীটোৰ জনজাতিকৰণৰ বাবে আন্দোলন কৰি আহিছে। ইয়াক ৰোধ কৰাৰ অধিকাৰ কাৰো নাই। মাজত আৰু এটা দিনৰ সময় আছে। আগন্তুক ১৩ ফেব্ৰুৱাৰীৰ ভিতৰত পূৰ্ণ জনজাতিকৰণৰ মৰ্যাদা প্ৰদান নকৰিলে অসম জ্বলিব।’ এই মন্তব্য আক্ৰাছুৰ কেন্দ্ৰীয় সাধাৰণ সম্পাদক গকুল বৰ্মনৰ।
আজি ওদালগুৰি চহৰৰ মাজমজিয়াৰ বিষ্ণুৰাভা কৃষ্টি সংঘ প্ৰাংগণত ওদালগুৰি জিলা কোচ ৰাজবংশী সন্মিলনী, ওদালগুৰি জিলা আক্ৰাছু আৰু ওদালগুৰি জিলা কোচ ৰাজবংশী মহিলা সন্মিলনীৰ উদ্যোগত এক বিশাল গণসমাৱেশ আয়োজন কৰা হয়।
প্ৰায় ৩ সহস্ৰাধিক লোকে এই গণ সমাৱেশত অংশ গ্ৰহণ কৰি ‘কেন্দ্ৰীয় চৰকাৰ হায় হায়, কোচ ৰাজবংশী জনগোষ্ঠীক জনজাতিকৰণ কৰক, আমাক লাগে পৃথক কমতাপুৰ, ন’ কমতাপুৰ ন’ ৰেষ্ট’ আদি প্ৰতিবাদী শ্ল’গানেৰে পৰিস্থিতি উত্তাল কৰি তোলে।
তাৰোপৰি আক্ৰাছুৰ সাধাৰণ সম্পাদক গৰাকীয়ে আগন্তুক ১৩ ফেব্ৰুৱাৰিক অন্তিম সময়সীমা হিচাপে বান্ধি দি উক্ত দিনৰ ভিতৰত পূৰ্ণ জনজাতিকৰণৰ মৰ্যাদা প্ৰদান নকৰিলে ৰাজ্যত ভূমিকম্পৰ সৃষ্টি হ’ব বুলি সকীয়নি প্ৰদান কৰে। লগতে আগন্তুক লোকসভা নিৰ্বাচনত মঙলদৈ লোকসভা সমষ্টিত জনগোষ্ঠীটোৱে নিজাববীয়াকৈ প্ৰাৰ্থী প্ৰক্ষেপ কৰিব বুলিও হংকাৰ প্ৰদান কৰে।