‘’এইখন মূল্যবোধৰ ৰাজনীতিৰ মহীৰূহ স্বৰূপ জননেতা শৰৎ চন্দ্ৰ সিংহৰ জন্মভূমি।ইয়াত তেখেতৰ আদৰ্শ ভূলুণ্ঠিত হোৱা কাৰ্য্য আমি কোনোপধ্যে সহ্য নকৰো। আমাৰ কোচ-ৰাজবংশী সকলৰ এজন ব্যক্তি থকালৈকে জননেতাগৰাকীৰ ইচ্ছাৰ বিৰুদ্ধে সুৰা বিপণী স্থাপন কৰাৰ যোজা চলোৱা কাৰ্যৰ প্ৰতিবাদ কৰি যাম । শৰীৰৰ শেষ বিন্দুলৈকে তেজ দি হলেও জননেতাৰ আদৰ্শক জীয়াই ৰখাৰ হকে আন্দোলন চলাই যাম। আমি অসম চৰকাৰক দাবী জনাইছোঁ শীঘ্ৰে চাপৰত সুৰা বিপণী স্থাপনৰ সিদ্ধান্ত বাতিল কৰক, অন্যথা আমাৰ সংগঠনে চাপৰবাসীৰ সহযোগত তীব্ৰ গণ আন্দোলন গঢ়ি তুলিম ।”
এইদৰে মন্তব্য তথা হুংকাৰ দিছে কোচ ৰাজবংশীৰ ছাত্ৰ সংগঠন ‘আক্ৰাছু’ নেতা-কৰ্মীয়ে।
চাপৰ চক্ৰ বিষয়াৰ কাৰ্য্যালয়ৰ সন্মুখত মঙলবাৰে আক্ৰাছুৰ ধুবুৰী পূব জিলা সমিতিৰ উদ্যোগত আৰু চাপৰ আঞ্চলিক সমিতিৰ সহযোগত চাপৰ অঞ্চলত সুৰা বিপণী স্থাপনৰ অনুমতি দিয়াৰ সিদ্ধান্ত বাতিলৰ দাবীত ৰূপায়িত কৰা দুঘন্টীয়া বিশাল ধৰ্ণা কাৰ্যসূচীত অংশ গ্ৰহণ সংগঠনটোৰ নেতা কৰ্মীয়ে এইদৰে কয়।
Also Read: যোৱা ছয় মাহত পুঁজিপতিৰ ৪৬,৩৮২ কোটি টকাৰ ঋণ মাফ কৰিলে ভাৰত চৰকাৰে
উল্লেখ্য যে মঙলবাৰে পুৱা১১-00 বজাৰ পৰা ৰূপায়িত হোৱা এই প্ৰতিবাদী কাৰ্যসূচীত আক্ৰাছুৰ লগতে কলিতা জনগোষ্ঠীয় সন্মিলন, গৰীয়া মৰিয়া দেশী জাতীয় পৰিষদ, দেশী জনগোষ্ঠীয় মঞ্চ, লেখিকা সমাৰোহ সমিতিকে ধৰি বহুকেইটা দল সংগঠনে অংশগ্ৰহণ কৰি প্ৰতিবাদ সাব্যস্ত কৰে।
এই প্ৰতিবাদী কাৰ্যসূচীত কে এ চি ৰ কাৰ্যবাহী সদস্য কৰ্মেশ্বৰ ৰায় ,আক্ৰাছুৰ ধুবুৰী পূব জিলা সমিতিৰ সভাপতি দেৱজিৎ ৰায়, সম্পাদক অনন্ত ৰায়, কেন্দ্ৰীয় সমিতিৰ প্ৰচাৰ সম্পাদক পুলকেশ ৰায়চৌধুৰী, সাংগঠনিক সম্পাদক ললিত কুমাৰ ৰায়, আঞ্চলিক সমিতিৰ সভাপতি হিতেশ ৰায়, সম্পাদক বিৰাজ সিংহ ,ৰত্নপীঠ মহাবিদ্যালয়ৰ অৱসৰ প্ৰাপ্ত অধ্যক্ষ তৰণী কান্ত ৰায়, সমাজকৰ্মী গংগাধৰ ৰায়, লেখিকা সমাৰোহ সমিতিৰ সভানেত্ৰী চন্দ্ৰা বৰ্মণ, সম্পাদিকা প্ৰণতি অধিকাৰীকে ধৰি বিভিন্ন দল সংগঠনৰ নেতা কৰ্মী উপস্থিত থাকি দুঘন্টীয়া ধৰ্ণা কাৰ্যসূচী ৰূপায়িত কৰাৰ অন্তত চাপৰৰ চক্ৰ বিষয়াৰ জৰিয়তে অসমৰ মুখ্যমন্ত্ৰীলৈ দাবী সম্বলিত স্মাৰক পত্ৰ প্ৰেৰণ কৰে।
