আশাপ্ৰদভাৱেই চলিত টি-২০ বিশ্বকাপৰ আজি গ্ৰুপ পৰ্যায়ৰ দ্বিতীয়খন মেচত তুলনামূলকভাৱে দুৰ্বল নেডাৰলেণ্ডৰ বিৰুদ্ধে বিজয় সাব্যস্ত কৰিছে উদ্বোধনী বৰ্ষৰ টি-২০ বিশ্বকাপ জয়ী ভাৰতে। বিশ্ব খিতাপৰ সন্ধানত অষ্ট্ৰেলিয়ান ভূমিত অৱতীৰ্ণ হোৱা ভাৰতে আজি দুৰন্ত অলৰাউণ্ড প্ৰদৰ্শনেৰে নেডাৰলেণ্ডক ৫৬ ৰানত পৰাস্ত কৰে।
প্ৰথম মেচত পাকিস্তানৰ বিপক্ষে ৰোমাঞ্চকৰ জয়েৰে বিশ্বকাপ অভিযান আৰম্ভ কৰা ভাৰতে আজি ছিডনীত অনুষ্ঠিত হোৱা মেচখনত প্ৰথমে বেটিং কৰি শীৰ্ষক্ৰমৰ তিনিগৰাকীকৈ বেটাৰৰ অৰ্ধশতকৰ সহায়ত দুই উইকেটৰ বিনিময়ত ১৭৯ ৰান সংগ্ৰহ কৰে।
ইনিংছৰ আৰম্ভণিতে অপেনাৰ লোকেশ ৰাহুলৰ উইকেট হেৰুৱালেও অধিনায়ক ৰোহিত শৰ্মা, প্ৰাক্তন অধিনায়ক বিৰাট কোহলী আৰু মিডল অৰ্ডাৰ বেটাৰ সূৰ্যকুমাৰ যাদৱে দুৰ্দান্ত বেটিঙেৰে নেডাৰলেণ্ডৰ বলিং আক্ৰমণক তচনচ কৰি ভাৰতক এক শক্তিশালী স্ক’ৰত উপনীত কৰায়।
অধিনায়ক ৰোহিত শৰ্মাই ৩৯ বলত ৫৩ ৰান সংগ্ৰহ কৰি বিদায় ল’লেও চলিত বিশ্বকাপত ক্ৰমাগত দ্বিতীয়টো অৰ্ধশতক অৰ্জন কৰা কোহলী ৪৪ বলত ৬২ ৰান সংগ্ৰহ কৰি অপৰাজিত থাকে। কোহলীৰ লগতে আনগৰাকী বেটাৰ সূৰ্যকুমাৰ যাদৱে বিস্ফোৰক বেটিঙেৰে মাত্ৰ ২৫ বলত ৫১ ৰান সংগ্ৰহ কৰি অপৰাজিত হৈ ৰয়।
ভাৰতীয় বেটিং লাইন-আপত এক নৱ শক্তি হিচাপে পৰিগণিত হোৱা যাদৱে ইনিংছৰ অন্তিমটো বলত এটা দৰ্শনীয় ছয় কোবাই নিজৰ অৰ্ধশতক সম্পূৰ্ণ কৰে। অৱশ্যে পুনৰ এবাৰ ভাৰতীয় অনুৰাগীক নিৰাশ কৰে অপেনাৰ ৰাহুলে। ইনিংছৰ তৃতীয়টো অভাৰত মাত্ৰ ৯ ৰান কৰিয়ে বিদায় লয় অপেনাৰগৰাকীয়ে।
ইফালে ১৮০ ৰানৰ বিজয় লক্ষ্য অনুসৰণ কৰি ভাৰতীয় বলিং আক্ৰমণৰ সমুখত কোনো সময়তে মূৰ দাঙি উঠিব নোৱাৰিলে নেডাৰলেণ্ডে। তাৰকা পেচাৰ বুমৰাহৰ অনুপস্থিতিত দলৰ বলিং আক্ৰমণৰ নেতৃত্ব কান্ধ পাতি লোৱা ভুৱনেশ্বৰ কুমাৰে ইনিংছৰ প্ৰথমটো অভাৰ মেইডেন দিয়াৰ পিছত তৃতীয়টো অভাৰত অপেনাৰ বিক্ৰমজিত সিঙক পেভিলিয়নৰ পথ দেখায়।
আনগৰাকী অপেনাৰ মেক্স অডাউদে কিছু আক্ৰমণাত্মক শৈলীৰে বেটিং কৰাৰ চেষ্টা চলায় যদিও পঞ্চম অভাৰত অক্সৰ পেটেলৰ চিকাৰ হয় মেক্স। ভাৰতীয় বলাৰৰ সন্মিলিত আক্ৰমণত দিশহাৰা হোৱা নেডাৰলেণ্ডে সঘন উইকেটৰ পতনৰ ফলত ২০ অভাৰত ৯ উইকেটৰ বিনিময়ত মাত্ৰ ১২৩ ৰান সংগ্ৰহ কৰিবলৈ সক্ষম হয়।
ভাৰতৰ হৈ ভুৱনেশ্বৰ, অৰ্শদ্বীপ, অক্সৰ আৰু অশ্বিনে দুটাকৈ আৰু মহম্মদ ছামিয়ে এটা উইকেট লাভ কৰে। দুৰন্ত বেটিঙেৰে ভাৰতক শক্তিশালী স্থিতিত উপনীত কৰোৱা যাদৱ মেচৰ শ্ৰেষ্ঠ খেলুৱৈ বিবেচিত হয়।
এই জয়েৰে ভাৰত গ্ৰুপত শীৰ্ষস্থানত উপনীত হয়। গ্ৰুপৰ তৃতীয়খন মেচত ভাৰত ৩০ অক্টোবৰত দক্ষিণ আফ্ৰিকাৰ সন্মুখীন হ’ব।
