অসমৰ সকলো গাঁৱলৈ ফ্ৰী ৱাই ফাই!

সমগ্ৰ দেশৰ লগতে অসমৰ সকলো গাঁৱে অহা তিনি মাহৰ ভিতৰত চৰকাৰী বিনামূলীয়া ৱাই ফাইৰ সুবিধা লাভ কৰিব।

অসমত বৰ্তমানলৈকে এই চৰকাৰী সুবিধাৰ উপলব্ধতা সম্পৰ্কে জানিব পৰা নাই|

কিন্তু দেশৰ টেলিকম আৰু তথ্য প্ৰযুক্তি মন্ত্ৰী ৰৱি শংকৰ প্ৰসাদে বুধবাৰে সদৰী কৰামতে, ২০২০ চনৰ মাৰ্চ মাহৰ ভিতৰত BharatNetৰ জৰিয়তে ভাৰতৰ সকলো গাঁৱতে বিনামূলীয়া ৱাই ফাই যোগান ধৰা হ’ব।

মন্ত্ৰীগৰাকীয়ে জনোৱামতে, এই অপ্তিকেল ফাইবাৰ নেটৱৰ্কৰ জৰিয়তে ইতিমধ্যে দেশৰ ১.৩ লাখ গাওঁ পঞ্চায়ত সামৰি লোৱা হৈছে আৰু চৰকাৰৰ লক্ষ্য হৈছে ২.৫ লাখ গাওঁ পঞ্চায়তলৈ এই সুবিধা লৈ যোৱা।

প্ৰসাদে কয় যে গাওঁসমূহত ডিজিটেল সেৱা আগবঢ়োৱাৰ বাবে উমৈহতীয়া সেৱা কেন্দ্ৰ (common service centres) খোলা হ’ব আৰু এই কেন্দ্ৰসমূহে বেংকিঙৰ পৰা আৰম্ভ কৰি বিভিন্ন সেৱা আগবঢ়াব।

তেওঁ কোৱামতে, এনে সেৱা কেন্দ্ৰ ২০১৪ চনৰ ৬০ হাজাৰটাৰ পৰা বৃদ্ধি হৈ বৰ্তমান ৩.৬০ লাখটা হৈছেগৈ।

CSC e-Governance Services India Ltdএ এই আঁচনি ৰূপায়ণ কৰি আছে।