বিকাশ ডুবেক আটক কৰিবলৈ যোৱা আৰক্ষীৰ হত্যাকাণ্ডত সহযোগ কৰাৰ অভিযোগত গ্ৰেপ্তাৰ কৰা হৈছে বিকাশ ডুবেৰ বোৱাৰীসহ ৩ গৰাকীক।
কাণপুৰ ডন বিকাশ ডুবেৰ বোৱাৰী, পৰিচাৰিকা আৰু এগৰাকী প্ৰতিবেশী গ্ৰেপ্তাৰ কৰিছে উত্তৰ প্ৰদেশ আৰক্ষীয়ে।
ধৃতসকলৰ নাম হ’ল শ্যামা, ৰেখা আৰু সুৰেশ ভাৰ্মা।
আৰক্ষীয়ে প্ৰকাশ কৰা অনুসৰি যোৱা ৩ জুলাইত ৰাতি কাণপুৰৰ দেহাত অঞ্চলৰ বিকাৰু গাঁৱত বিকাশ ডুবে আৰু তেওঁৰ সহযোগীসকলক আটক কৰিবলৈ যোৱা আৰক্ষীৰ ওপৰত কৰা নিৰ্বিচাৰ গুলীচালনাৰ সময়ত উক্ত ধৃত তিনিগৰাকী উপস্থিত আছিল।
আৰক্ষীৰ অৱস্থান সম্পৰ্কে দুষ্কৃতিকাৰীক খবৰ দিয়াৰ লগতে তেওঁলোকে সহায় কৰিছিল বুলি অভিযোগ কৰিছে আৰক্ষীয়ে।
আনকি বিকাশ ডুবেৰ বোৱাৰীয়েকৰ বিৰুদ্ধে দুৱাৰ বন্ধ কৰি দিয়াৰো অভিযোগ কৰিছে প্ৰত্যক্ষদৰ্শীয়ে।
স্মৰ্তব্য যে, যোৱা বৃহস্পতিবাৰৰ ৰাতি কাণপুৰৰ বিকাৰু গাঁওত বিকাশ ডুবেক আটক কৰিবলৈ এটা আৰক্ষী দলে অভিযান চলাইছিল।
আৰক্ষীৰ যোৱাৰ সম্ভেদ লাভ কৰি ডন বিকাশ ডুবেই সহযোগীসহ আৰক্ষী দলটোৰ ওপৰত নিৰ্বিচাৰে গুলীচালনা কৰে।
উক্ত গুলীচালনাত তিনিজন আৰক্ষী বিষয়াসহ আঠ গৰাকী আৰক্ষী নিহত হয়।
