ধৰ্ষণৰ বলি হোৱা এগৰাকী বিশেষভাৱে সক্ষম কিশোৰীৰ পৰিয়ালক ধৰ্ষণৰ অভিযোগ নাকচ কৰি দুৰ্ঘটনা বুলি স্বীকাৰ কৰিবলৈ জোৰ দিছে আৰক্ষীয়ে। আৰক্ষীৰ বিৰুদ্ধে এই গুৰুতৰ অভিযোগ আনিছে কিশোৰীগৰাকীৰ পিতৃয়ে।
উল্লেখ্য যে কিছুদিন পূৰ্বে ৰাজস্থানৰ আলৱাৰত যৌনাঙ্গৰ ওচৰত আঘাতপ্ৰাপ্ত অৱস্থাত বিশেষভাৱে সক্ষম কিশোৰীগৰাকীক উদ্ধাৰ কৰা হৈছিল।
পৰিয়ালৰ লোকসকলে কিশোৰীগৰাকীক স্থানীয় চিকিৎসালয়লৈ লৈ যোৱাৰ পিছতে চিকিৎসকসকলে এইয়া ধৰ্ষণৰ ঘটনা বুলি সন্দেহ প্ৰকাশ কৰিছিল।
পিছত কিশোৰীগৰাকীক জয়পুৰৰ জে কে ল’ন চিকিৎসালয়লৈ প্ৰেৰণ কৰা হয় আৰু কিশোৰীগৰাকীক অস্ত্ৰোপচাৰ কৰা হয়।
আনহাতে আৰক্ষীয়েও প্ৰথমতে ইয়াক ধৰ্ষণৰ ঘটনা বুলি সন্দেহ কৰিছিল যদিও পিছত এক চিকিৎসা প্ৰতিবেদনৰ আধাৰত জিলা আৰক্ষী অধীক্ষকে ধৰ্ষণৰ সম্ভাৱনা অস্বীকাৰ কৰি দুৰ্ঘটনা বুলি বৰ্ণনা কৰে।
কিন্তু আৰক্ষীৰ এই দাবী কিশোৰীগৰাকীৰ পিতৃয়ে মানি ল’বলৈ অনিচ্ছা প্ৰকাশ কৰে। তেওঁ কয় যে তেওঁলোক আৰক্ষীৰ তদন্তত সন্তুষ্ট নহয় আৰু ন্যায়ৰ আশা কৰিছে।
“আৰক্ষীয়ে আমাক এইয়া এটা দুৰ্ঘটনা বুলি স্বীকাৰ কৰিবলৈ বাধ্য কৰিছে। আমি ভয় খাইছো আৰু কেৱল ন্যায় বিচাৰো।” সাংবাদিকৰ আগত কিশোৰীগৰাকীৰ পিতৃয়ে কয়।
“এতিয়া আৰক্ষী বিষয়াসকলে আমাক ইয়াক দুৰ্ঘটনা হিচাপে গ্ৰহণ কৰিবলৈ কৈছে। আমি আৰক্ষীৰ তদন্তত সন্তুষ্ট নহয়। আমাক ফৰেনচিক বিজ্ঞান পৰীক্ষাগাৰৰ প্ৰতিবেদনৰ বিৱৰণও দিয়া হোৱা নাই।” তেওঁ কয়।
তেওঁ লগতে অভিযোগ কৰে যে আৰক্ষী বিষয়াসকলে এই ঘটনাক দুৰ্ঘটনা হিচাপে গ্ৰহণ কৰিলে তেওঁ অধিক ধন লাভ কৰিব বুলিও লোভ দেখুৱায়।
আনহাতে কিশোৰীগৰাকীৰ পিতৃৰ এই গুৰুতৰ অভিযোগ সন্দৰ্ভত মন্তব্য প্ৰকাশৰ পৰা বিৰত আছে আলৱাৰৰ আৰক্ষী অধীক্ষক তেজাৱানী গৌতম।
ইতিমধ্যে সমগ্ৰ বিষয়টো বিতৰ্কৰ মাজত সোমাই পৰাৰ পিছতে ৰাজ্য চৰকাৰে গোচৰটোৰ তদন্তৰ দায়িত্ব চিবিআইক হস্তান্তৰ কৰাৰ সিদ্ধান্ত লৈছে।