ইটানগৰত উন্মত্ত প্ৰতিবাদকাৰীয়ে শিল্পীৰ সাংগীতিক বাদ্যযন্ত্ৰসমূহ জ্বলাই ধ্বংস কৰাৰ পাছত নাগালেণ্ডৰ সংগীতজ্ঞ এল’বো নাগাই অৰুণাচল প্ৰদেশৰ মুখ্য মন্ত্ৰী পেমা খাণ্ডু আৰু কেন্দ্ৰীয় গৃহ ৰাজ্য মন্ত্ৰী কিৰেন ৰিজিজু তথা নাগালেণ্ডৰ মুখ্য মন্ত্ৰী নেফিঅ’ ৰিঅ’ক ক্ষতিপূৰণ আদায়ৰ বাবে সহায় বিচাৰি আহ্বান জনাইছে।
এল’বো নাগাই জ্বলি যোৱা বাহনখনৰ এখন ফটো প’ষ্ট কৰি কৈছে যে প্ৰতিবাদকাৰীসকলে তেওঁলোকৰ বাহনসমূহ লগতে ইটানগৰ আন্তৰ্জাতিক চলচ্চিত্ৰ মহোৎসৱস্থলীত থকা তেওঁলোকৰ সকলোবোৰ সাংগীতিক বাদ্য যন্ত্ৰ জ্বলাই দিয়ে।
অসম তথা উত্তৰ-পূৰ্বাঞ্চলৰ আন বহু শিল্পীৰ সৈতে এল’বো নাগাইয়ো শুকুৰবাৰে নিশা অচিনাক্ত দুস্কৃতিকাৰীয়ে লণ্ডভণ্ড কৰা অৰুণাচল প্ৰদেশত প্ৰথমবাৰৰ বাবে দৰ্জী খাণ্ডু কনভেনশ্যন চেন্টাৰত আয়োজন কৰা আন্তৰ্জাতিক চলচ্চিত্ৰ মহোৎসৱত উপস্থিত আছিল।
Dear Sir @KirenRijiju @PemaKhanduBJP @Neiphiu_Rio That’s the car filled with our instruments after mob attack during International film festival in Itanagar. Request your help in getting our compensation as we are only humble #musician and our livelihood is burned.PLEASE HELP! pic.twitter.com/AVPPCg04aq
— Alobo Naga (@AloboNaga) February 24, 2019
গায়ক এল’বো নাগাই শনিবাৰে তেওঁৰ টুইটাৰ যোগে শুভাকাংখীসকলক ধন্যবাদ জনাই প্ৰকাশ কৰিছে: ‘’ আপোনালোকৰ প্ৰাৰ্থনা আৰু শুভেচ্ছাৰ বাবে ধন্যবাদ! আমি সুৰক্ষিত। দুটাকৈ স্থানত উন্মত্ত আক্ৰমণকাৰীৰ পৰা হাত সাৰি নাহৰলাগুন ৰেইল ষ্টেশ্যনত উপস্থিত হওঁ। অৰুণাচলৰ পৰা ওলাই যাবলৈ চেষ্টা কৰি আছো, আমাৰ বাবে প্ৰাৰ্থনা কৰি ৰওক। পৰিস্থিতি অৱনতি ঘটিছে, সান্ধ্য আইন চলি আছে!’’
শুকুৰবাৰে উন্মত্ত প্ৰতিবাদকাৰীয়ে নিশাৰ ভিতৰতে ইটানগৰ আন্তৰ্জাতিক চলচ্চিত্ৰ মহোৎসৱৰ কনভেনশ্যন হল, অস্থায়ী থিয়েটাৰ গৃহ, মঞ্চ, ফুড ক’ৰ্ট, অডিঅ’ আৰু ভিডিঅ’ সা-সৰঞ্জামসমূহকে ধৰি সকলোবোৰ জ্বলাই দিয়ে।
হিংসাত্মক ঘটনা আৰম্ভ হোৱাৰ পাছৰে পৰা গোটেই নিশা অসমৰ অধিকাংশ শিল্পীকে ধৰি কমেও ১০০ শিল্পীয়ে দৰ্জী খাণ্ডু কনভেনশ্যন চেন্টাৰত আশ্ৰয় লৈ থাকে। গোটেই নিশা তেওঁলোকে চেন্টাৰত জীৱনৰ শংকা লৈ ৰাতিপুৱালৈ অপেক্ষা কৰে আৰু তাৰ পাছত অসম সীমান্তত আহি উপস্থিত হয়।
অৰুণাচল চৰকাৰে অনা-অৰুণাচলী জনজাতিক স্থায়ী বাসিন্দাৰ প্ৰমান পত্ৰ দিবলৈ পদক্ষেপ গ্ৰহণ কৰাৰ পাছতে অৰুণাচল উত্তপ্ত হৈ পৰে। ইটানগৰ, নাহৰলাগুন আদি ঠাইত বিগত কেইবাদিন ধৰি হিংসাত্মক প্ৰতিবাদ অব্যাহত আছে।