Mohammed Zubair gets bail in all cases উচ্চতম ন্যায়ালয়ত মহম্মদ জুবেইৰে সকাহ লাভ কৰিলে। আদালতে অল্ট নিউজৰ সহ-প্ৰতিষ্ঠাপকক অন্তৱৰ্তীকালীন জামিন প্ৰদান কৰে। উচ্চতম ন্যায়ালয়ে তেওঁক কাৰাগাৰৰ পৰা মুকলি কৰিবলৈকো নিৰ্দেশ দিছে।
উল্লেখ্য যে যোৱা ২৭ জুনত অল্ট নিউজৰ সহ-প্ৰতিষ্ঠাপক মহম্মদ জুবেইৰক দিল্লী আৰক্ষীয়ে গ্ৰেপ্তাৰ কৰিছিল। মহম্মদ জুবেইৰে প্ৰায় চাৰি বছৰ আগতে কৰা এটা টুইটত হিন্দী চিনেমাৰ এটা স্ক্ৰীণশ্বট পোষ্ট কৰিছিল। ইয়াৰ বাবে তেওঁৰ ওপৰত ধৰ্মীয় অনুভূতিক আঘাত কৰাৰ অভিযোগ উত্থাপিত হৈছিল। এই অভিযোগৰ ভিত্তিতে আৰক্ষীয়ে মহম্মদ জুবেইৰক গ্ৰেপ্তাৰ কৰিছিল।
জুবেইৰক পিছত দুটা গোচৰত জামিন দিয়া হৈছিল যদিও উত্তৰ প্ৰদেশ আৰক্ষীয়ে তেওঁৰ বিৰুদ্ধে আৰু ছয়খন এজাহাৰ দাখিল কৰিছিল। যাৰ বাবে মহম্মদ জুবেইৰ কাৰাগাৰৰ পৰা মুকলি হ’ব পৰা নাছিল।
অল্ট নিউজৰ সহ-প্ৰতিষ্ঠাপগৰাকীয়ে সেই এজাহাৰবোৰ প্ৰত্যাহাৰ কৰিবলৈ শীৰ্ষ আদালতৰ কাষ চাপিছিল। তাৰপিছতেই এক সাময়িক সকাহ লাভ কৰিলে।
উচ্চতম ন্যায়ালয়ে স্পষ্ট কৰি দিছে যে পৰৱৰ্তী শুনানিলৈকে মহম্মদ জুবেইৰৰ বিৰুদ্ধে কোনো ব্যৱস্থা ল’ব নোৱাৰিব।
জুবেইৰ গ্ৰেপ্তাৰ হোৱাৰ পিছতে অল্ট নিউজৰ আন এজন প্ৰতিষ্ঠাপক প্ৰতীক সিনহাই টুইট কৰি কৈছিল, “আজি দিল্লী আৰক্ষীয়ে বিভিন্ন বিষয়ত সোধা-পোছাৰ বাবে জুবেইৰক মাতি পঠিয়াইছিল। কিন্তু তেওঁক এটা গোচৰত গ্ৰেপ্তাৰ কৰা হৈছে। বহু অনুৰোধৰ পাছতো এজাহাৰৰ কোনো প্ৰতিলিপি দিয়া হোৱা নাই।”
লগতে পঢ়ক: ঐশ্বৰ্য ৰায়-শচীনৰ পিতৃৰ নাম কালিম উল্লাহ খান! দেশৰ ‘মেংগো মেন’-এ লগাইছে চমক
অল্ট নিউজ প্ৰকৃততে এক তথ্য পৰীক্ষা কৰা পৰ্টেল। প্ৰতীক সিনহা আৰু মহম্মদ জুবেইৰৰ অল্ট নিউজে ভাইৰেল একাধিক বাতৰি ভুল প্ৰমাণ কৰিছে। এনে কৰাৰ বাবে, অল্ট নিউজক সামাজিক মাধ্যমত ট্ৰ’ল আৰু আক্ৰমণৰ সন্মুখীন হ’ব লগা হৈছিল। লগতে কেইবাটাও গোচৰৰ সন্মুখীন হ’ব লগাও হৈছে।
