পঞ্জাৱ কংগ্ৰেছৰ প্ৰবীণ নেতা তথা ৰাজ্য খনৰ সদ্য অপসাৰিত মুখ্যমন্ত্ৰী অমৰিন্দৰ সিং অৱশেষত ক্ষোভত ফাটি পৰিল।
পঞ্জাৱৰ মুখ্যমন্ত্ৰী পদৰ পৰা নিশাটোৰ ভিতৰত অপসাৰিত কৰা কংগ্ৰেছৰ শীৰ্ষ নেতৃত্বৰ বিৰুদ্ধে এতিয়া সেয়ে মুকলি বিদ্ৰোহ ঘোষণা কৰিছে অমৰিন্দৰ সিঙে।
বিজেপিৰ জ্যেষ্ঠ নেতা তথা কেন্দ্ৰীয় গৃহমন্ত্ৰী অমিত শ্বাহক সাক্ষাৎ কৰাৰ পিছতে সাংবাদিকৰ আগত অমৰিন্দৰ সিঙে ক্ষোভেৰে কয়—’ বাৰে বাৰে অপমানিত হৈছো, আৰু নহয়, কংগ্ৰেছ এৰিম’।
মুখ্যমন্ত্ৰী পদৰ পৰা অপসাৰিত হোৱাৰ পিছতে পঞ্জাৱৰ প্ৰাক্তন মুখ্যমন্ত্ৰী অমৰিন্দৰ সিঙে বুধবাৰে সাক্ষাৎ কৰিছিল অমিত শ্বাহক।
অমিত শ্বাহক সাক্ষাৎ কৰাৰ পিছতে সিঙে সাক্ষাৎ কৰিছিল ৰাষ্ট্ৰীয় নিৰাপত্তা উপদেষ্টা অজিত দোভালক।
অমিত শ্বাহক সাক্ষাৎ কৰাৰ পিছতে অমৰিন্দৰ সিঙে কংগ্ৰেছে তেওঁক বিশ্বাসত নোলোৱা বুলি কোৱাৰ লগতে তেওঁক দলটোৱে বাৰে বাৰে অপমান কৰি থকা বুলিও মন্তব্য কৰে।
অৱশ্যে কংগ্ৰেছ ত্যাগ কৰিলেও অমৰিন্দৰ সিঙে বিজেপিত যোগদান নকৰে বুলিও স্পষ্ট কৰি দিছে।
ইপিনে পঞ্জাৱত শাসনাধিষ্ঠিত কংগ্ৰেছক শলঠেকত পেলাই পঞ্জাৱ প্ৰদেশ কংগ্ৰেছৰ সভাপতি নৱজ্যোৎ সিং সিদ্ধুৱেও পদত্যাপত্ৰ দাখিল কৰিছে।
অৱশ্যে শেহতীয়াকৈ তেওঁ পদত্যাগ পত্ৰ খন প্ৰত্যাহাৰ কৰি সভাপতি পদত বাহাল থাকিব বুলিও ঘোষণা কৰিছে।
কংগ্ৰেছৰ শীৰ্ষ নেতৃত্বক সিদ্ধুৱে চৰ্ত সাপেক্ষেহে সভাপতি পদত থাকিব বুলি জনাই দিছে।
কংগ্ৰেছৰ শীৰ্ষ নেতৃত্বই সিদ্ধুৰ কেইটামান চৰ্ত মানি লৈছে যদিও ভালে কেইটা চৰ্ত মানি নোলোৱা বুলি জানিব পৰা গৈছে।
