দেশত নতুন দেৱতাৰ আৱিৰ্ভাৱ হৈছে। এজন নহয়, দুজনকৈ দিব্যপুৰুষে দেশবাসীৰ মংগলৰ বাবে দিনে-ৰাতিয়ে কাম কৰি আছে।
দেশবাসীক দেৱতা দুজনে চাকৰি দিছে। দেশবাসীৰ বাবে দেৱতা দুজনে লৈ আহিছে অপৰিসীম সুবিধা।
হয়, হিন্দুসকলৰ তেত্ৰিশ কোটি দেৱতা থাকিলেও এতিয়া আৰু দুজনকৈ দেৱতা যোগ কৰা হৈছে। তেওঁলোক আন কোনো নহয়। তেওঁলোক হৈছে সকলোৰে পৰিচিত মুকেশ আম্বানী আৰু আদানী।
বিজেপি সাংসদ তথা প্ৰাক্তন কেন্দ্ৰীয় মন্ত্ৰী কে জে আলফনছে এই দাবী কৰিছে। তেওঁ দাবী কৰিছে যে আম্বানী আৰু আদানী হৈছে একোজন দেৱতা। ইয়াৰ কাৰণ হৈছে দুয়োজনে দেশবাসীৰ বাবে জীৱিকাৰ সৃষ্টি কৰে।
সেয়ে দেশবাসীয়ে আম্বানী আৰু আদানীক পূজা-আৰাধনা কৰিব লাগে! সাংসদজনে এই মন্তব্য কৰিছে সংসদৰ বাজেট বিতৰ্কত।
তেওঁ কয় যে দেশখনত যিসকল লোকে জীৱিকাৰ সৃষ্টি কৰে, তেওঁলোকক পূজা কৰা উচিত!
শেহতীয়াকৈ দেশত বৰ্ধিত নিবনুৱা আৰু অৰ্থনৈতিক অনগ্ৰসৰতাৰ ওপৰত শাসক-বিৰোধীৰ মাজত বাকযুদ্ধ তুংগত আছে।
বিৰোধী দলসমূহে দেশৰ সম্পদসমূহ মোদী চৰকাৰে আম্বানী-আদানীৰ দৰে পুঁজিপতিক গটাই দিয়াক লৈ প্ৰতিবাদ সাব্যষ্ট কৰিছে।
আনহাতে, দেশৰ অৰ্থনৈতিক অৱস্থাৰ বাবে মোদী চৰকাৰে কংগ্ৰেছ আৰু নেহৰুক দোষাৰোপ কৰি আহিছে। তেনে সময়তে সাংসদজনৰ এই মন্তব্যৰ ব্যাপক চৰ্চা লাভ কৰিছে।