শিল্পকলাৰ লগত জড়িত শিৱসাগৰৰ এহাল দম্পতি। লকডাউনৰ মাজত নিজকে ব্যস্ত ৰখাৰ লগতে ব্যস্ত ৰাখিলে আন বহুতকে। লকডাউনত সম্পূৰ্ণ কৰিলে নিজৰ আধৰুৱা কাম।
শিৱসাগৰৰ চহৰৰ এইহাল দম্পতি ৰূপম বেজবৰুৱা আৰু পৰিণীতা শৰ্মা বেজবৰুৱা। স্বামী ৰূপম বেজবৰুৱা এজন ভাস্কৰ্য শিল্পী আৰু পত্নী পৰিণীতা এগৰাকী চিত্ৰশিল্পী।
শিৱসাগৰৰ নগৰৰ বেজবৰুৱা চুকত স্থাপিত ৰূপম কলাকেন্দ্ৰত চিত্ৰ-ভাস্কৰ্যৰ লগতে চিমেন্ট, কাঠ, ফাইবাৰৰ মূৰ্ত্তি, প্ৰতিমূৰ্ত্তি বনোৱাৰ লগতে প্ৰশিক্ষণো দি আহিছে ৰূপম-পৰিণীতাই।
লকডাউনৰ ফলত ৰূপম কলা কেন্দ্ৰৰ শ্ৰেণী বন্ধ হোৱা বাবে তেওঁলোকে ছাত্ৰ-ছাত্ৰীসকলৰ মাজত এটা ৱাটচএপ গ্ৰুপৰ জড়িয়তে চিত্ৰকলা, ভাস্কৰ্য শিল্প আদিৰ প্ৰশিক্ষণ প্ৰদান কৰিছে।
এই ৱাটচএপ গ্ৰুপৰ জড়িয়তে ছাত্ৰ-ছাত্ৰীসকলক ছবি আঁকিবলৈ শিকোৱাৰ লগতে সাধু কেনেকৈ লিখিব পাৰি তাকো শিকাইছে ৰূপম-পৰীণিতাই।
চিত্ৰশিল্পী পৰীণিতা শৰ্মা বেজবৰুৱাই কয়, “লকডাউনত যাতে ছাত্ৰ-ছাত্ৰীসকল ঘৰতে থকি নিজকে ব্যস্ত ৰাখিব পাৰে আৰু ঘৰতে থাকিও নিজৰ প্ৰতিভা বিকাশ ঘটাব পাৰে তাৰ বাবে এই প্ৰচেষ্টা হাতত লৈছো।”
ভাস্কৰ্য শিল্পী ৰূপম বেজবৰুৱাই শিৱসাগৰৰ লগতে অসমৰ বিভিন্ন স্থানত বিভিন্ন ধৰণৰ মূৰ্ত্তি, প্ৰতিমূৰ্ত্তি নিৰ্মাণ কৰি প্ৰশংসা লাভ কৰিছে।
ইয়াৰোপৰি তেওঁ বিভিন্ন সময়ত শিশুসকলক কবিতা পাঠ আৰু নাটকৰ কৰ্মশলাৰ জড়িয়তে তেওঁলোকৰ প্ৰতিভা বিকাশত সহায় কৰি আহিছে।
