বিধেয়ক গ’ল, গুৱাহাটীৰ ৰাজপথত এইবাৰ জ্বলিল অসম চুক্তি
১৯৭৯ চনৰ পৰা ৬ বছৰীয়া অসম আন্দোলনৰ পাছত সদৌ অসম ছাত্ৰ সন্থা আৰু সেই সময়ৰ প্ৰধান মন্ত্ৰী ৰাজীৱ গান্ধীৰ মাজত ১৯৭১ চনটো বিদেশী চিনাক্তকৰণৰ ভিত্তিবৰ্ষ হিচাপে লৈ স্বাক্ষৰিত হৈছিল ঐতিহাসিক অসম চুক্তি।
সেই চুক্তিক নস্যাৎ কৰি নাগৰিকত্ব সংশোধনী বিধেয়ক ২০১৬ গৃহীত কৰিবলৈ বিজেপি চৰকাৰে বিশেষ তৎপৰতা অৱলম্বন কৰিছিল যদিও অৱশেষত বুধবাৰে ৰাজ্যসভাত বিধেয়কখন উত্থাপনত ব্যৰ্থ হ’ল চৰকাৰখন।
বিধেয়কখন উত্থাপন নোহোৱাৰ মাজতে বুধবাৰে হিন্দু যুৱ ছাত্ৰ পৰিষদ, অসমৰ মহানগৰ শাখাই গুৱাহাটী প্ৰেছ ক্লাবৰ সন্মুখত দাহ কৰে অসম চুক্তি।
হিন্দুত্ববাদী সংগঠনটোৰ মতে ১৯৮৫ চনতে স্বাক্ষৰিত অসম চুক্তিখনৰ সুযোগতে অসমে ১৯৫১ চনৰ পৰা ১৯৭১ চনলৈকে ২০ বছৰৰ অতিৰিক্ত বিদেশীৰ বোজা গ্ৰহণ কৰিলে।
অসম চুক্তিক ‘পৃথিৱীৰ ইতিহাসৰ বিৰল ঘটনা’ আখ্যা দি পৰিষদৰ সভাপতি বলেন বৈশ্যই নৰ্থ ইষ্ট নাও-ক কয় যে বিদেশী খেদিবলৈ আন্দোলন কৰি ২০ বছৰৰ বিদেশীৰ বোজা গ্ৰহণ কৰা চুক্তি স্বাক্ষৰ কৰা ঘটনা পৃথিৱীৰ ইতিহাসত বিৰল।
বৈশ্যৰ মতে ‘১৯৫১ চনটোক ভিত্তি বৰ্ষ হিচাপে বিচাৰি ৮৫৫ জন চহিদ হৈছিল। সেই চনটোক ভিত্তিবৰ্ষ হিচাপে লৈ বিদেশী বহিস্কৰণৰ প্ৰক্ৰিয়া এটা আৰম্ভ কৰাৰ বাবেহে চহিদসকলে আত্ম বলিদান দিছিল।‘
তদুপৰি তেওঁলোকে বিদেশী চিনাক্তকৰণৰ ভিত্তিবৰ্ষ ১৯৭১ৰ পৰিৱৰ্তে ১৯৫১ দাবী কৰে যদিও লগতে দাবী কৰে যে ‘হিন্দু ভাৰতত বিদেশী হ’ব নোৱাৰে। ১৯৫১ৰ পাছত অহা মুছলমান বিদেশীসকলক চিনাক্ত কৰি হিন্দুসকলক ভাৰতৰ ৰাজ্যসমূহত ভগাই দিব লাগে।‘
আনহাতে, ১৯৭১ চনক ভিত্তিবৰ্ষ হিচাপে লৈ ৰাষ্ট্ৰীয় নাগৰিক পঞ্জী প্ৰস্তুত কৰিছে যদিও তাক ‘একেবাৰেই অনৰ্থক’ আখ্যা দিয়ে সংগঠনটোৰ সভাপতিজনে।