৭৫ শতাংশ বেয়া হৈছে মেগাষ্টাৰ অমিতাভ বচ্চনৰ লিভাৰ
‘কৌন বনেগা কড়োৰপতি’ৰ নতুন চিজনৰ বাবে অনুৰাগীৰ মাজত ‘বিগ বি’ অমিতাভ বচ্চন চৰ্চিত হৈ আছে যদিও বৰ্তমান তেওঁ কিছু পৰিমানে শাৰিৰীক অসুস্থতাৰ সৈতে যুঁজ দি থাকিব লগা হৈছে।
সদাই সুস্থ আৰু সক্ৰিয় ৰূপত দেখি থকা সকলোৰে আপোন অমিতাভ বচ্চনৰ লিভাৰ ৭৫ শতাংশ বেয়া হোৱা বুলি জানিব পৰা গৈছে। এটা অনুষ্ঠানত ‘বিগ বি’য়ে এই কথা নিজে ৰাজহুৱা কৰে।
৭৬ বছৰীয়া অমিতাভ বচ্চনে যক্ষ্মা ৰোগ সম্পৰ্কে আয়োজিত এক অনুষ্ঠানত উপস্থিত থাকি সময়ে সময়ে নিজৰ শৰীৰৰ চেক আপ কৰি থকাটো অত্যন্ত প্ৰয়োজনীয় বুলি উল্লেখ কৰে।
‘যক্ষ্মাৰোগৰ উপৰি আৰু অন্যান্য বেমাৰৰ সৈতে যুঁজি আছো। সময়ত যদি এই বেমাৰ সমূহ ধৰা পৰে তেন্তে ইয়াৰ চিকিৎসা সম্ভৱ’। এইদৰে কয় বচ্চনে।
বিভিন্ন বেমাৰ তথা সমস্যাৰ সৈতে যুঁজ দি থকা অমিতাভ বচ্চনে নিজৰ শৰীৰ সুস্থ ৰাখিবলৈ বিভিন্ন যতন লোৱা পৰিলক্ষিত হয়। অভিনেতা গৰাকীয়ে দৈনিক ব্যায়ামৰ লগতে খোজো কাঢ়ে। খোৱা-বোৱাৰ ক্ষেত্ৰতো অভিনেতা গৰাকী খুব সচেতন।
শৰীৰ সুস্থ সবল কৰি ৰখাৰ বাবেই হয়তো অভিনেতা গৰাকীয়ে পূৰ্বৰ দৰে আজিও উজলি আছে অভিনয় জগতখনত।
উল্লেখ্য যে মাত্ৰ ২৫ শতাংশ সক্ৰিয় হৈ থকা লিভাৰৰ সহায়ত জীয়াই থকা বলিউদৰ মেগাষ্টাৰ অমিতাভ বচ্চনৰ জনপ্ৰিয় ৰিয়েলিটি শ্ব’ ‘কৌন বনেগা কড়োৰপতি’ ছনি টিভিৰ জৰিয়তে সম্প্ৰচাৰ হৈ থকাৰ লগতে শীঘ্ৰে মুক্তি পাব ‘ব্ৰহ্মাস্ত্ৰ’ নামৰ এখন বিগ বাজেটৰ হিন্দী ছবি।
ইয়াৰ উপৰি ‘গুলাব’ ছিতাবো’ নামৰ আন এখন হিন্দী ছবিৰ শ্বুটিং চলি থকাৰ লগতে ‘ছই ৰা নৰছিম্হা ৰেড্ডী’ নামৰ আন এখন ছবিৰ কামতো ব্যস্ত হৈ আছে অমিতাভ বচ্চন। ইতিমধ্যে এই ছবিখনৰ প’ষ্টাৰো মুকলি কৰা হৈছে।