ভাৰতৰ দ্বিতীয়টো চন্দ্ৰ অভিযান ‘চন্দ্ৰযান-২’ ই মঙলবাৰে সফলতাৰে চন্দ্ৰৰ কক্ষপথত প্ৰৱেশ কৰিবলৈ সক্ষম হৈছে।
‘চন্দ্ৰযান-২’ ৰ ঐতিহাসিক সফলতাৰ বিষয়ে ভাৰতীয় মহাকাশ গৱেষণা সংস্থাই টুইটাৰত এনেদৰে প্ৰকাশ কৰিছে-
‘‘আজি(২০ আগষ্ট,২০১৯)ত ভাৰতৰ ‘চন্দ্ৰযান-২’ য়ে চন্দ্ৰৰ লুনাৰ কক্ষপথত প্ৰৱেশ কৰিছে। চন্দ্ৰ পৃষ্ঠত ৭ ছেপ্তেম্বৰ,২০১৯ ত বিক্ৰমে অৱতৰণ কৰিব’’।
ইছৰোৰ ফালৰ পৰা প্ৰকাশিত জাননি অনুসৰি ‘চন্দ্ৰযান-২’ৰ সকলো অংশই সফলভাৱে কাম কৰি আছে।
বাংগালুৰুত থকা ইছৰোৰ মিশ্যন অপাৰেশ্যন কমপ্লেক্সৰ ট্ৰেকিং এণ্ড কামাণ্ড নেটৱৰ্কৰ পৰা মহাকাশযানখনৰ সকলো অংশ প্ৰতিটো সময়ত সুক্ষ্মভাৱে নিৰীক্ষণ কৰি থকা হৈছে।
কৰ্ণাটকত থকা ‘ইণ্ডিয়ান ডীপ স্পেচ নেটৱৰ্ক’ৰ সহায়ত নিৰীক্ষণ অভিযান অতি সক্ৰিয়ভাৱে কৰি থকা হৈছে।
ভাৰতে ২২ জুলাইত সফলভাৱে ‘চন্দ্ৰযান-২’ মুকলি কৰি ইতিহাস ৰছনা কৰিবলৈ সক্ষম হৈছিল।
অন্ধ্ৰপ্ৰদেশৰ সতীশ ধাৱান মহাকাশ গৱেষণা কেন্দ্ৰৰ পৰা ৯৭৮ কোটি টকা ব্যয় সাপেক্ষে ‘চন্দ্ৰযান-২’ চন্দ্ৰ অভিমুখে প্ৰেৰণ কৰা হৈছিল।
ভাৰতৰ সমগ্ৰ ‘চন্দ্ৰযান-২’ অভিযানৰ সৈতে অসমৰ তিনিগৰাকী বিজ্ঞানী ক্ৰমে জিতেন্দ্ৰ নাথ গোস্বামী, দীপক কুমাৰ দাস আৰু হিদাম ৰাজীৱ সিঙ জড়িত হৈ আছে।
জেষ্ঠ মহাকাশ বিজ্ঞানী জিতেন্দ্ৰ নাথ গোস্বামীয়ে ‘চন্দ্ৰযান-২’ৰ পৰামৰ্শদাতা সমিতিৰ অধ্যক্ষ হিচাপে কাৰ্য্যনিৰ্বাহ কৰি আছে।
আনহাতে, দীপক কুমাৰ দাস আৰু হিদাম ৰাজীৱ সিঙে ক্ৰমে ইছৰোৰ স্পেচ এপ্লিকেশ্যন চেণ্টাৰৰ সঞ্চালক আৰু প্ৰডাকশ্যন ষ্টেজৰ সদস্য হিচাপে দায়িত্ব পালন কৰিছে।
স্বাভাৱিকতে চন্দ্ৰযান-২ৰ সফলতাই সমগ্ৰ ভাৰতৰ লগতে অসমবাসীক গৌৰৱান্বিত কৰিব।
