শ্বেপ অৱ ম’ম’-অৰ্থাৎ ম’ম’ৰ আকৃতি। নামটি অৰ্থবহ, ঠিক এই চিনেমাখনৰ দৰেই। শ্বেপ অৱ ম’ম’-এই নেপালী ভাষাৰ ছবিখনে মুক্তি লাভ কৰিছে গত ২৯ মে’,২০২৬ তাৰিখে। ইতিপূৰ্বে ৩০তম বুছান আন্তঃৰাষ্ট্ৰীয় চলচ্চিত্ৰ মহোৎসৱত প্ৰদৰ্শিত হোৱাৰ লগতে বহুকেইটা বঁটা লাভ কৰিবলৈ সক্ষম হৈছিল। তদুপৰি আন আন চলচ্চিত্ৰ মহোৎসৱতো বৰ্তমান পৰ্যন্ত বহুতো বঁটা লাভ কৰিবলৈ সক্ষম হৈছে। ত্ৰিবেণী ৰায় আৰু কিশলেৰ দ্বাৰা লিখা চিত্ৰনাট্যৰে এই ছবিখনৰ পৰিচালনাও কৰিছে ত্ৰিবেণী ৰায়ে। ভাৰতৰ বিভিন্ন ছবিগৃহত বৰ্তমান এই ছবিখন চলি আছে।
শ্বেপ অৱ ম’ম’ৰ আৰম্ভণি হয় সমাজৰ বহু লোকৰ মাজত নিজৰ লিখা এটা পঢ়ি শুনাই থকা বিষ্ণু(গৌমায়া গুৰুঙ)ক লৈ। ৰাইজে লিখাৰ প্ৰশংসা কৰাতকৈ বিষ্ণুৰ বাবে ভাল বিবাহৰ প্ৰস্তাৱ আহে নেকি হে কথা পাতিবলৈ লয়। বিষ্ণু সংকুচিত হৈ পৰে। শ্বেপ অৱ ম’ম’ৰ কাহিনীৰ আৰম্ভণি অগতানুগতিক নহয়। কিন্তু ইয়াৰ চিত্ৰায়ণ অগতানুগতিক। দিল্লীত নিজৰ চাকৰি এৰি বিষ্ণু তাইৰ গাঁৱৰ ঘৰলৈ উভতি আহে। ঘৰত কোনো পুৰুষ নাই বুলি বিষ্ণুৰ মাক সদা-সতৰ্ক হৈ থাকে। বিষ্ণু বাহিৰত থাকিলে,মাকে বিষ্ণুৰ গা কাপোৰেৰে ঢাকি দিয়া,ঘৰত এজন পুৰুষৰ উপস্থিতি আছে বুলি জহাবলৈ চেষ্টা কৰা আদি কাৰ্য কৰি থাকিছিল। বিষ্ণুৰ বায়েকে বিষ্ণুৱে ম’ম’ৰ সঠিক আকৃতি প্ৰস্তুত কৰিবলৈ সক্ষম নহয় বুলি জোকাই। বিষ্ণুৰ দুৰ্বলতা থকা এজন পুৰুষ বন্ধুৱে বিষ্ণুক চিগাৰেট যাঁচিও,নাৰীয়ে ধূম্ৰপান কৰিবলৈ নেপাই ধৰণৰ মন্তব্য কৰে। দুয়োৰে মাজত নৈকট্য বাঢ়ে যদিও,সেয়াও বিষ্ণুৰ বাবে এক বোজা হেন হে হৈ পৰে। বিষ্ণুৰ ঘৰখনত মাক(যি নিজে ব্যৱসায়ী হৈয়ো),আইতাক,গৰ্ভৱতী বায়েক-আটাইবোৰ পুৰুষৰ ওপৰত নিৰ্ভৰশীল। কাৰো সেই লৈ একো আক্ষেপো নাই। তাৰ পৰিৱৰ্তে সময়ে সময়ে বিষ্ণুৱেহে “এইখন তোৰ দিল্লী নহয়”-জাতীয় কথা শুনিবলৈ পাই। এখন পুৰুষতান্ত্ৰিক সমাজত দৈনন্দিন জীৱন কটাই,বিষ্ণুৰ শ্বাসৰুদ্ধকৰ অৱস্থা এটা হ’বলৈ ধৰে। মানসিক চাপত ভূগে বিষ্ণু। অৱশেষত বিষ্ণুৱে কি সিদ্ধান্ত লয় বা ল’বলৈ গৈ থাকে,তাক লৈয়েই ছবিখনৰ পৰৱৰ্তী অংশ আগবাঢ়ে। ছবিখনৰ পোহৰৰ ব্যৱস্থাপনা খুবেই সুন্দৰ। প্ৰথমাৰ্দ্ধ কিছু লেহেমীয়া যেন লাগে যদিও,মধ্যাংশৰ পৰা কাহিনীয়ে গতি সলাই,এক ভিন্ন দিশ লয়। দ্বিতীয়াৰ্দ্ধত ছবিখন অধিক মনোগ্ৰাহী হৈ পৰে। ছবিখনৰ চিনেমেট’গ্ৰাফীৰ কাম সুন্দৰ। লগতে আৱহ সংগীতৰ ব্যৱহাৰ পৰিস্থিতি-সাপেক্ষ। শ্বেপ অৱ ম’ম’ত মূলতঃ বিষ্ণুৰ এক দ্বিধাগ্ৰস্ত সময়ৰ খতিয়ানক তুলি ধৰিছে পৰিচালক,কাহিনীকাৰে।
শ্বেপ অৱ ম’ম’ৰ আন এটি সুন্দৰ দিশ হৈছে ইয়াৰ চৰিত্ৰ নিৰ্বাচন। বিষ্ণুৰ চৰিত্ৰত গৌমায়া গুৰুঙৰ অভিনয় প্ৰশংসনীয়। লগতেই আন আন শিল্পীসকলৰ অভিনয়ো পুৰঠ। একেমুখে ক’বলৈ গ’লে এঘন্টা ৫৪ মিনিটৰ এই ছবিখন চাই আপুনি মুঠেও নিৰাশ নহয়।
-ৰিমলী বৰকটকী।
mail- [email protected]
