ইট ৱাজ জাষ্ট এন এক্সিডেন্ট-জফৰ পনাহিৰ এই চলচ্চিত্ৰখনি বৰ্তমান বিশ্ব চিনেমাৰ জগতত চৰ্চিত এটি নাম। ছবিখনৰ পৰিচালনা জফৰ পনাহিৰ। ইট ৱাজ জাষ্ট এন এক্সিডেন্টৰ কাহিনীভাগৰ লগতে চিত্ৰনাট্যও লিখিছে জফৰ পনাহিয়ে। ছবিখন ২০২৫ বৰ্ষৰ কাঁ চলচ্চিত্ৰ মহোৎসৱত প্ৰথম প্ৰদৰ্শিত হৈছিল। পৰৱৰ্তী পৰ্যায়ত ২০২৫ ৰে ১ অক্টোবৰত ফ্ৰান্সত মুক্তি দিয়ে। ৭৮ সংখ্যক কাঁ চলচ্চিত্ৰ মহোৎসৱত ইট ৱাজ জাষ্ট এন এক্সিডেন্টে,পামে ডি’অ’ৰ(Palme d’or)বঁটা লাভ কৰিবলৈ সক্ষম হৈছিলে। লগতেই ৮৩ সংখ্যক গ’ল্ডেন গ্ল’ব বঁটা প্ৰতিযোগিতাত শ্ৰেষ্ঠ চলচ্চিত্ৰ,শ্ৰেষ্ঠ পৰিচালক আৰু শ্ৰেষ্ঠ চিত্ৰনাট্যৰ বাবে মনোনীত হোৱা প্ৰথমখন ইৰাণীয়ান ছবি ৰূপে পৰিগণিত হৈছিল। লগতেই ৯৮ সংখ্যক একাডেমি বঁটা প্ৰতিযোগিতালৈ শ্ৰেষ্ঠ আন্তঃৰাষ্ট্ৰীয় চলচ্চিত্ৰ শিতানত তালিকাভুক্ত হৈছে। বিদ্ৰোহী ছবি পৰিচালক,অভিনেতা ৰূপে খ্যাত জফৰ পনাহিৰ এই ছবিখন নিৰ্মাণ কৰোতেও তেওঁৰ পূৰ্বৰ কেইখনমান ছবিৰ দৰে ইৰাণৰ চৰকাৰী কতৃপক্ষৰ অনুমতি লোৱা নাছিল। বৰ্তমান এই ছবিখন প্ৰাইম ভিডিঅ’ আৰু মুবি এপত উপলব্ধ।
ছবিৰ আৰম্ভণি হয় নিশাৰ ৰাজপথত। চলন্ত গাড়ীত দুই স্বামী-স্ত্ৰী আৰু তেওঁলোকৰ শিশু কন্যা সন্তান। পত্নী গৰ্ভৱতী। বাটত স্বামী(ৰছিদ)য়ে এটা কুকুৰ খুন্দিয়াই মাৰে। দুৰ্ঘটনাবশতঃ হোৱা এই কথাটোত ছোৱালীজনী(নিলুফাৰ)য়ে খুব অসন্তুষ্টি প্ৰকাশ কৰে। তেতিয়াই পত্নীয়ে কয়-“ইট ৱাজ জাষ্ট এন এক্সিডেণ্ট”বুলি। তেনেতে তেওঁলোকৰ গাড়ীখনে সমস্যা দিয়াত কাষতে পোৱা গেৰেজ এটাত ঠিক কৰাবলৈ সোমাই। গাড়ী ঠিক হয়,পিছে গেৰেজৰ এজন মেকানিক ভাহিদে ৰছিদহঁতৰ গাড়ীখনৰ পিছ লয়। পিছ লৈ লৈ ৰছিদৰ ঘৰ ওলাইগৈ। পিছদিনাৰ কথা-ৰছিদৰ গাড়ীখন ভালকৈ ঠিক কৰাবলৈ লৈ যায়। ভাহিদে পুনৰ অনুসৰণ কৰে। ভাহিদৰ মুখাবয়বত প্ৰচণ্ড খঙ আৰু আক্ৰোশৰ ভাৱ প্ৰকট হৈ পৰে। হঠাৎ ভাহিদে মূলপথতেই ৰছিদক মুৰত টঙনিয়াই মাৰে। মাৰি গাড়ীৰ ভিতৰৰ বাকচত ভৰাই মৰুৰ মাজলৈ লৈ যায় গাত খান্দি পুতিবৰ বাবে। এইখিনিৰ পৰাই কাহিনীলৈ এক তীব্ৰ উৎকন্ঠা আহি পৰে। এক অপ্ৰত্যাশিত মোৰ আহি পৰে। ভাহিদৰ সন্দেহ আছিল যে ভাহিদ ৰাজবন্দী হৈ থকা অৱস্থাত জেইলত ৰছিদ ওৰফে ইকবালে তাক অবৰ্ণনীয় অত্যাচাৰ চলাইছিল। কিন্তু ৰছিদে বাৰম্বাৰ কৈছিলে সি ইকবাল নহয় বুলি। উপায়ন্তৰ হৈ পৰৱৰ্তী পৰ্যায়ত ভাহিদ যায় চালাৰ নামৰ বন্ধু এজনৰ ওচৰলৈ। চালাৰে ফোন নাম্বাৰ দিয়ে এগৰাকী ফটোগ্ৰাফাৰ ছিভাৰ। তেওঁক লগ কৰি থাকোতেই তেওঁৰ ওচৰত ফ’টো উঠিবলৈ অহা এটা দৰা-কইনাৰ যুটীৰ সংস্পৰ্শলৈ আহে। শেষত দৰা-কইনাও ছিভাৰ সহিতে ভাহিদৰ গাড়ীত উঠে। এইবাৰ ছিভাই লগ কৰে হামিদক। হামিদো গাড়ীত উঠে। এই সকলোবোৰৰ ভিতৰত একমাত্ৰ হ’বলগীয়া দৰা আলিৰ বাদে সকলোৱেই ৰাজবন্দী আছিলে,আৰু জেইলত ইকবালে তেওঁলোকৰ চকু বান্ধি নিৰ্মম অত্যাচাৰ চলাইছিলে। গতিকে সিহঁতে অকল ৰছিদৰ কন্ঠস্বৰ আৰু প্ৰেগ-লেগ(প্ৰষ্ঠেটিক লেগ)অৰ্থাৎ লগোৱা ভৰিখনৰ পৰা গাড়ীত বন্দী ৰছিদক ইকবাল বুলি ভাবিছিলে। ছবিখনৰ কাহিনীভাগ আৰম্ভণিৰে পৰাই গতিশীল। ক’তো ৰৈ যোৱাৰ অৱকাশ নাই। বৰঞ্চ উৎকন্ঠা আৰু উত্তেজনাই ছবিখনক ইয়াৰ পৰম ছন্দত তুলি ধৰিবলৈ সক্ষম হৈছে। সু্-সংৰচিত চিত্ৰনাট্যখনৰ কথাও এইখিনিতে উল্লেখ কৰিবই লাগিব। পৰৱৰ্তী সময়ত কি হয়,ৰছিদক শাস্তি দিয়ে নে নিদিয়ে,তাক লৈয়েই কাহিনীভাগ আগবাঢ়ে। আটাইকেইজনৰ মাজত তুমুল তৰ্কাতৰ্কি হয়। এবাৰত হামিদে গাড়ীখনত ৰছিদক লৈ পলাবৰো চেষ্টা কৰে,কিন্তু বিফল হয়। তেনেতে এপাকত ৰছিদৰ ঘৰৰ পৰা কন্যাই ৰছিদৰ ফোনত ফোন কৰি খবৰ দিয়ে যে সন্তানসম্ভৱা মাক অচেতন হৈ পৰিছে। দুবাৰ ভাবি ভাহিদে ৰছিদৰ ঘৰলৈ যায় আৰু ৰছিদৰ অচেতন পত্নীক হস্পিটেলত ভৰ্তি কৰাই। এটি সন্তানো হয় আৰু খৰছো ভাহিদেই দিয়ে। ইফালে ৰছিদ,ভাহিদৰ গাড়ীৰ ভিতৰতেই অচেতন অৱস্থাত। অন্তত গৈ মাত্ৰ ছিভা আৰু ভাহিদেই থাকে ৰছিদৰ লগত। ৰছিদক এখন আওহতীয়া ঠাইলৈ লৈ যায় দুয়ো। সেয়া নিশাৰ কথা। গছ এডালত বান্ধি থোৱা ৰছিদে বাৰম্বাৰ নুই কৰাৰ পিছত,অৱশেষত স্বীকাৰ কৰে যে তেৱেই সেই ইকবাল আছিল।
ছবিখনত পোহৰৰ ব্যৱহাৰ খুব সুন্দৰ হৈছে। চিনেমেট’গ্ৰাফী কৰিছে-আমিন জাফাৰীয়ে। সম্পাদনা কৰিছে আমিৰ ইটমিনানে। চিনেমেট’গ্ৰাফীৰ লগতেই সম্পাদনাৰ দিশটোও প্ৰশংসনীয়। অভিনয়ৰ ক্ষেত্ৰত প্ৰথমেই নাম ল’ব লাগিব ভাহিদৰ চৰিত্ৰত অভিনয় কৰা ভাহিদ ম’বাছোৰ কথা। সমগ্ৰ ছবিখন জুৰি কম সংলাপত আৰু অধিক দেহভংগীমাৰে তেওঁৰ অভিনয় অনবদ্য। ইট ৱাজ জাষ্ট এন এক্সিডেণ্টৰ আন আন অভিনয় শিল্পীসকলৰো অভিনয় সাৱলীল। ছবিখনৰ অন্তত ভাহিদৰ পিছফালে সেই লেঙেৰাই অহা ভৰিৰ শব্দ কাষ চাপি অহা আৰু ক্ৰমশঃ দূৰলৈ গুছি যোৱাৰ দৃশ্যৰে। অন্তও উৎকন্ঠাৰ মাজেৰেই হয়। কলামোদী দৰ্শকে ছবিখন চাই নিৰাশ নহয়।
