গোৱালপাৰা জিলাৰ এখন ব্যক্তিগত খণ্ডৰ ব্যতিক্ৰমী বিদ্যালয়৷ জিলাখনৰ মাটিয়াত অৱস্থিত “আমাৰ বিদ্যালয়” নামৰ ব্যক্তিগত খণ্ডৰ বিদ্যালয়খনৰ ব্যতিক্ৰমী শিক্ষা ব্যৱস্থাই দৃষ্টি কাঢ়িছে শৈক্ষিক মহলৰ৷
অঞ্চলটোৰ অজয় নাথ নামৰ সৰবৰহী ব্যক্তি এগৰাকীৰ মহান প্ৰচেষ্টাত গঢ়ি উঠা বিদ্যালয়খনত পাঠদানৰ উপৰিও চলে কৃষি কৰ্মৰ শিক্ষাও৷ বিদ্যালয় খনে গোৱালপাৰা কৃষি বিজ্ঞান কেন্দ্ৰৰ সহযোগিতাত প্ৰায় এক হেক্টৰ মাটিত উন্নত মানৰ আলু খেতি কৰি এশ কুইণ্টল আলু উৎপাদন কৰিবলৈ সক্ষম হৈছে৷
উৎপাদিত আলু বিক্ৰী কৰি লাভ কৰিছে এক লাখৰো অধিক ধন৷ এই কৃষি কৰ্মত “আমাৰ বিদ্যালয়”ৰ ছাত্ৰ-ছাত্ৰী,শিক্ষক-শিক্ষয়িত্ৰী সকলো জড়িত৷
ইপিনে, নিজ হাতে ৰোপন কৰা খেতিৰ ফচল বজাৰত বিক্ৰী কৰি যথেষ্ট আনন্দিত হৈ পৰিছে ছাত্ৰ-ছাত্ৰী সকল৷উল্লেখ্য যে বিদ্যালয় খনত অধ্যয়নৰ বাবে কোনো মাচুলৰ প্ৰয়োজন নহয়৷
বিদ্যালয় খনত সকলো সুবিধা বিনামূলীয়াকৈ লাভ কৰে শিক্ষাৰ্থীয়ে৷ বিদ্যালয়ৰ অধ্যক্ষ গৰাকীৰ পৰা জানিব পৰা মতে আলু বিক্ৰী কৰি পোৱা সকলো ধন খৰচ হ’ব বিদ্যালয়ত৷
এনে দৰে বতৰৰ প্ৰতিটো খেতি কৰি পোৱা ধনেৰে পৰিচালিত হৈছে বিনামূলীয়া “আমাৰ বিদ্যালয়”৷ কেৱল পুথিগত জ্ঞান প্ৰদানেই নহয় বিদ্যালয় খনত প্ৰদান কৰা হয় ব্যৱহাৰিক শিক্ষাও৷
সকলোকে পুথিগত জ্ঞান প্ৰদান কৰাৰ লগতে কৃষি কাৰ্যৰ বাবে প্ৰদান কৰা হৈছে ব্যৱহাৰিক শিক্ষাও৷ বিদ্যালয়ৰ ছাত্ৰ-ছাত্ৰীসকলে বছৰৰ প্ৰতিটো খেতি কৰাটো বাধ্যতামূলক বিদ্যালয়খনত।
বিদ্যালয়খনে বিনা মাচুলেৰে শিক্ষা প্ৰদান কৰি দৃষ্টি কাঢ়িবলৈ সক্ষম হৈছে সকলোৰে৷ এইখন বিদ্যালয়ত অধ্যয়ন কৰা ছাত্ৰ-ছাত্ৰী সকলও আনন্দ মনেৰে পাঠ্যপুথিৰ শিক্ষাৰ লগতে ব্যৱহাৰিক শিক্ষাও গ্ৰহণ কৰি আহিছে৷
এনেদৰে ব্যতিক্ৰমী চিন্তাৰ ফচল “আমাৰ বিদ্যালয়”ৰ শেহতীয়া ব্যতিক্ৰমী পদক্ষেপৰ বাবে পুনৰ এবাৰ চৰ্চাৰ কেন্দ্ৰ বিন্দু হৈ পৰিছে জিলাখনত৷