উত্তৰ প্ৰদেশৰ কানপুৰত সংঘটিত হৈছে এক আচৰিত ঘটনা।ইতিমধ্যে ঘটনাৰ মূল অভিযুক্তক গ্ৰেপ্তাৰ কৰিছে আৰক্ষীয়ে। এগৰাকী বৃদ্ধাই বাকীত বিড়ি খোজাত দিবলৈ অস্বীকাৰ কৰাৰ পাছতেই এজন যুৱকে বৃদ্ধাগৰাকীক মৰিয়াই হত্যা কৰে৷
সংবাদ মাধ্যমৰ বাতৰি অনুসৰি ৰামকালী দেৱীয়ে কানপুৰৰ ফিৰোজপুৰ গাঁৱত পুত্ৰ জয়বীৰ সিং আৰু নাতিনীয়েকৰ সৈতে বাস কৰিছিল। তেওঁলোকৰ এখন গেলামালৰ দোকান আছিল। ৪ মে’ত দোকানখনত ৰামকালী অকলে আছিল। আৰক্ষীৰ সূত্ৰৰ পৰা জানিব পৰা মতে, নিশা ঘৰলৈ উভতি অহা জয়বীৰে মাতৃক মৃত অৱস্থাত পৰি থকা অৱস্থাত উদ্ধাৰ কৰে। বৃদ্ধাগৰাকীৰ মূৰ, ডিঙি, বুকু আৰু পিঠিত আঘাত পাইছে।
সেই অৱস্থাত মাতৃক দেখি জয়বীৰে আৰক্ষীক খবৰ দিয়ে। আৰক্ষীয়ে আহি মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে। মাতৃৰ মৃত্যুৰ বাবে জয়বীৰে বিনয় কাটিয়া নামৰ গাঁৱৰ এজন লোকক দোষাৰোপ কৰে। লগতে থানাত তেওঁৰ নামত এজাহাৰ দাখিল কৰে। জয়বীৰে কেৱল বিনয়কে নহয়, ছিপু নামৰ এজন ব্যক্তিৰ বিৰুদ্ধেও হত্যাৰ অভিযোগ উত্থাপন কৰিছিল।পাছত আৰক্ষীয়ে তদন্ত আৰম্ভ কৰি অভিযুক্তক বিচাৰিবলৈ আৰম্ভ কৰে। দুদিনমান পাছত মূল অভিযুক্ত বিনয়ক আৰক্ষীয়ে গ্ৰেপ্তাৰ কৰে। লগতে উদ্ধাৰ কৰে এডাল লাঠি। আৰক্ষীৰ মতে, সেই লাঠিৰেই বৃদ্ধাগৰাকীক প্ৰহাৰ কৰি হত্যা কৰা হৈছিল৷
আৰক্ষীৰ জেৰাত বিনয়ে হত্যাকাণ্ডৰ কথা স্বীকাৰ কৰে। তেওঁ আৰক্ষীক জনাইছিল যে আগতে ৰামকালীৰ দোকানৰ পৰা বস্তু বাকীলৈ লৈছিল। এহাজাৰ টকা বিনয়ৰ বাকী আছিল। ৪ মে’ত যেতিয়া ৰামকালীয়ে দোকানলৈ গৈ বিড়িৰ পেকেট এটা খুজিছিল, তেতিয়া তাই বিড়ি দিবলৈ অমান্তি হৈছিল। তেওঁ বিনয়ক কয়, যদি ঋণ পৰিশোধ নহয়, তেন্তে আৰু একো দিয়া নহ’ব। সেই কথা শুনি বিনয়ৰ খং উঠিল। বিনয়ে বৃদ্ধাগৰাকীক হাতত থকা লাঠিৰে কোবাবলৈ ধৰিলে। ঘটনাৰ সময়ত তেওঁৰ লগত আছিল আন এজন গাঁৱৰ মানুহ। তেওঁৰ বিৰুদ্ধেও হত্যাৰ অভিযোগো উত্থাপন হৈছে।
