আজি অংগনৱাড়ী কৰ্মী আৰু সহায়িকাৰ প্ৰতিবাদত উত্তাল হৈ পৰে শিৱসাগৰ। শিৱসাগৰ জিলা সমাজ কল্যাণ বিভাগৰ কাৰ্যালয়ৰ সন্মুখত জিলাখনৰ কেইবা শতাধিক অংগনৱাড়ী কৰ্মী আৰু সহায়িকাই বিক্ষোভ প্ৰদৰ্শন কৰি এই প্ৰতিবাদ সাব্যস্ত কৰে।
নতুন ৰাষ্ট্ৰীয় শিক্ষা নীতি প্ৰয়োগৰ নামত অংগনবাদী কেন্দ্ৰক গুৰুত্বহীন কৰাৰ ষড়যন্ত্ৰ বন্ধ কৰা, অংগনৱাড়ী কৰ্মী-সহায়িকাক নিয়মীয়া চৰকাৰী কৰ্মচাৰী হিচাপে নিযুক্তি দিয়া, অংগনৱাড়ী কৰ্মীৰ নিম্নতম মজুৰি ২১ হাজাৰ ধাৰ্য কৰা, এককালীন সাহায্য অবিহনে অংগনৱাড়ী কৰ্মী সহায়িকাক অৱসৰ দিয়া কাৰ্য বন্ধ কৰাৰ দাবীৰে উত্তাল প্ৰতিবাদ সাব্যস্ত কৰে।
ৰাজ্য চৰকাৰে নতুন ৰাষ্ট্ৰীয় শিক্ষা নীতিৰ অধীনত ৩ বছৰৰ পৰা ৬ বছৰৰ শিশুসকলক প্ৰাথমিক বিদ্যালয়ত শিক্ষা দিয়াৰ কথা উল্লেখ কৰিছে।
যিহেতু এই শিশু সকলে বৰ্তমান অংগনৱাড়ী কেন্দ্ৰত প্ৰাকঃপ্ৰাথমিক শিক্ষা গ্ৰহণ কৰি আছে। বৰ্তমান এখন প্ৰাথমিক বিদ্যালয়ৰ অধীনত চাৰিখন অংগনৱাড়ী কেন্দ্ৰ পৰিচালিত হৈ আছে। নতুন শিক্ষা নীতি অনুসৰি এখন বিদ্যালয়ত মাত্ৰ অংগনৱাড়ী কৰ্মীয়ে নিযুক্তি লাভ কৰিব।
বাকী তিনিগৰাকী কৰ্মীৰ আৰু সহায়িকা সকলৰ চাকৰি কি হব বুলি প্ৰশ্ন কৰে প্ৰতিবাদী অংগনৱাড়ী কৰ্মী তথা সহায়িকা সকলে। নিজৰ চাকৰি সুৰক্ষিত কৰাৰ দাবীত আজি ৰাজ্যজুৰি অংগনৱাড়ী কৰ্মীসকলে প্ৰতিবাদ সাব্যস্ত কৰা দেখা গ’ল।