অসম তথা ভাৰতৰ জনপ্ৰিয় কণ্ঠশিল্পী অংগৰাগ পাপন মহন্তই ২৫ বছৰ আগতে কণ্ঠদান কৰা এমুঠিমান গান শ্ৰোতাসকলৰ বাবে মুকলি কৰি দিয়ে। ২৫ বছৰ আগতে বাণীবদ্ধ হোৱা কিন্তু বিভিন্ন কাৰণত মুক্তি নোহোৱা ‘তোমাৰ খোজৰ ধূলি’ নামৰ গীতৰ এলবামটোত কণ্ঠদান কৰিছিল কিশোৰ পাপন আৰু মাতৃ অৰ্চনা মহন্তই। সংকলনটোৰ প্ৰযোজনা কৰিছিল পাপনৰ পিতৃ খগেন মহন্তই।
উল্লেখযোগ্য, পাপনে হঠাৎ গানৰ সংকলনটো উদ্ধাৰ কৰিছিল আৰু আধুনিক পদ্ধতিৰে গীতসমূহ পুৰণি টেপ ৰেকৰ্ডাৰৰ পৰা সংগ্ৰহ কৰি নৱ প্ৰজন্মৰ বাবে মুকলি কৰি দিয়ে। এতিয়া য়ু টিউবত উপলব্ধ হ’ব ‘তোমাৰ খোজৰ ধূলি’ৰ গীতসমূহ।
আনহাতে, বহুবছৰ ধৰি পৰি থকা গীতকেইটা শ্ৰোতাৰ বাবে মুকলি কৰি দিব পাৰি আনন্দিত হয় পাপন। গুৱাহাটীৰ নিজা বাসগৃহত অৰ্চনা মহন্ত আৰু পাপনে গীতকেইটা মুকলি কৰে।
সাংবাদ মাধ্যমৰ আগত জনপ্ৰিয় কণ্ঠশিল্পীগৰাকীয়ে দেউতাকৰ স্মৃতিৰোমন্থন কৰি আবেগিক হৈ পৰাৰ লগতে কেশৱ মহন্ত, চিদা দাস, ড০ নিৰ্মল প্ৰভা বৰদলৈ আদিৰ দৰে ব্যক্তিয়ে ৰচনা কৰা আৰু খগেন মহন্ত, হীৰালাল বেনাৰ্জী, জিতেন দেৱ আদিৰ দৰে সংগীতজ্ঞই সুৰ কৰা গীতকেইটা শুনাৰ বাবে দৰ্শকক অনুৰোধ কৰে।
নিজৰ ফেইচবুক একাউণ্টত পাপন সংগীত অনুৰাগীসকলৰ বাবে এনেদৰে লিখে- ‘‘মোৰ বাবে অতিকে গুৰুত্বপূৰ্ণ তথা মৰমৰ কেইটিমান গীত কাইলৈ মুকলি কৰিবলৈ ওলাইছো। এই গীতবোৰ মোৰ সংগীত জীৱনৰ আৰম্ভণি, মোৰ প্ৰথম খোজ।
আচলতে মই মোৰ প্ৰথমটো শ্ৰব্য এলবাম ‘জোনাকী ৰাতি’ মুকলি কৰাৰ বহু আগতেই কেইটামান গীত দেউতা খগেন মহন্তই প্ৰযোজনা কৰিছিল। সেই গীতসমূহৰ ভিতৰত কেইটিমান গীতত মা অৰ্চনা মহন্তয়ো কণ্ঠদান কৰিছিল। মোৰ কণ্ঠ সেই সময়ত পৈণত আছিল বুলি ক’ব নোৱাৰি। কিন্তু দূৰ্ভাগ্যজনকভাৱে সেই গীতসমূহৰ কাম সম্পূৰ্ণ হৈ উঠা নাছিল। গায়কীৰ দিশৰ পৰাও চূড়ান্ত পৰ্যায়ত কাম হোৱা নাছিল তথা শব্দ সংমিশ্ৰণো হোৱা নাছিল। এনেকৈয়ে সময় বাগৰি গৈ থাকিল।
হঠাৎ এদিন মই এই গীতসমূহৰ টেপ মোৰ পুৰণা ট্ৰাংক এটাত বিচাৰি পালো। তাৰ পৰাই আৰম্ভ হ’ল মোৰ বুকুৰ আপোন সেই পুৰণা গীতবোৰৰ এক নতুন যাত্ৰা। গীতসমূহ টেপৰ পৰা উদ্ধাৰ কৰি ডিজিটাইজড্ কৰি শুনিব পৰা ব্যৱস্থা কৰিলো। সেই গীতসমূহেই মই কাইলৈ অনলাইনত মুকলি কৰিবলৈ ওলাইছো।
এয়া দেউতাৰ সেই আন্তৰিক প্ৰয়াস তথা তেওঁ তাহানিতে দেখা সপোনটোৰ প্ৰতি মোৰ শ্ৰদ্ধাঞ্জলি। তেওঁ এতিয়া আমাৰ মাজত নাই, কিন্তু তেওঁ নিশ্চয় দূৰৈৰ পৰা সকলো চাই আছে। গীতবোৰ তেওঁৰ চৰণতে সঁপিলো। কাইলৈ মোৰ ইউটিউব চেনেলতে গীতবোৰ উপলব্ধ হ’ব”।
