২৭ বছৰ বয়সতে ৯ হাজাৰ কোটি টকাৰ মালিক হোৱাৰ গৌৰৱ অৰ্জন কৰিছে এগৰাকী যুৱতীয়ে। যুৱতীৰ নাম অংকিতি বসু।
উল্লেখ্য যে মাত্ৰ কেইটামান বছৰৰ আগতে ২১ লাখ টকাৰে ব্যৱসায় আৰম্ভ কৰিছিল অংকিতিয়ে। ব্যৱসায় আৰম্ভ কৰাৰ পিছত যুৱতী গৰাকীৰ ব্যৱসায় ৯৮০০ কোটি টকালৈ বৃদ্ধি পালে।
অংকিতিৰ ফেশ্বন ই-কমাৰ্চ কোম্পানী জিলিংগোৱে ইতিমধ্যে সমগ্ৰ দেশতে এক পৰিচিতি লাভ কৰিছে।
২০১২ চনত অংকিতিয়ে মুম্বাইৰ ছেইণ্ট জেভিয়াৰ কলেজত অৰ্থনীতি আৰু গণিত বিষয়ত অধ্যয়ন কৰে। ইয়াৰ পিছত তেওঁ আমেৰিকাৰ কনচালটিং ফাৰ্ম মেককিনজীৰ মুম্বাই শাখাত কাম কৰিবলৈ আৰম্ভ কৰে। তাৰ পৰাই তেওঁ আমেৰিকাৰ আন এটা প্ৰতিষ্ঠান চেকুয়া কেপিটেলছৰ বেংগালুৰু কাৰ্যালয়ত যোগদান কৰে।
উল্লেখ্য যে, তেত্ৰিশ বছৰ বয়সত বাংগালুৰুত চৌবিশ বছৰীয়া ধ্ৰুৱ কাপুৰৰ লগত চিনাকী হৈছিল অংকিতিয়ে। গুৱাহাটীৰ আই আই টিৰ পৰা স্নাতক হোৱাৰ পিছত ধ্ৰুৱে গেমিং ষ্টুডিঅ’ Qiy Inc ত চফটৱেৰ ইঞ্জিনিয়াৰ হিচাপে কাম কৰিছিল।
দুয়োৰে সপোন আছিল চাকৰি এৰি নিজাকৈ কিবা এটা কৰাৰ। প্ৰথমে তেওঁলোকে এটা ই-কমাৰ্চ চাইট খোলাৰ কথা ভাবিলে। কিন্তু ইতিমধ্যে ভাৰতত তেতিয়া ফ্লিপকাৰ্ট, আমাজনৰ দৰে বৃহৎ কোম্পানীবোৰ আছিলেই। গতিকে, তেওঁলোকে বুজি পাইছিল যে তেওঁলোকে এনে বৃহৎ কোম্পানীসমূহৰ লগত প্ৰতিযোগিতা কৰাতো যথেষ্ট কঠিন হ’ব।
কিন্তু তাৰপিছতেই বেংকক ভ্ৰমণৰ সময়ত চকু খোল খাইছিল অংকিতিৰ । বেংককৰ চতুচক বজাৰত প্ৰৱেশ কৰিয়েই তেওঁৰ চকুত পৰিল স্থানীয় ডিজাইনাৰসকলে তৈয়াৰ কৰা কাপোৰ-কানি, জোতা, বেগ আৰু আনুষংগিক সামগ্ৰী। অংকিতিয়ে উপলব্ধি কৰিলে যে ভাষাৰ বাধাৰ বাবে স্থানীয় ব্যৱসায়ীসকলে সেইবোৰ বাহিৰৰ মানুহলৈ প্ৰেৰণ কৰাটো সম্ভৱ নহয়। তেতিয়াই মনলৈ আহিল ধাৰণাটো। অংকিতিয়ে ঘৰলৈ উভতি আহি ধ্ৰুৱৰ লগত কথা পাতে আৰু চাকৰি এৰি ২১ লাখ টকাৰ মূলধনেৰে এই কাম আৰম্ভ কৰিলে।
কিন্তু এই যাত্ৰা সহজ নাছিল তেওঁলোকৰ বাবে। বজাৰ গৱেষণা সম্পূৰ্ণ কৰিবলৈ তেওঁলোকৰ প্ৰায় এবছৰ সময় লাগিছিল। বেংককৰ বজাৰ ভ্ৰমণ কৰি ব্যৱসায়ীসকলৰ মাজত অনলাইন ব্যৱসায়ৰ প্ৰতি আগ্ৰহ গঢ়ি তোলাৰ কাম আৰম্ভ কৰিছিল অংকিতিয়ে।
ইফালে বাংগালুৰুত বহি ধ্ৰুৱে কাৰিকৰী দিশটো চম্ভালিবলৈ ধৰিলে। তেওঁলোকে তেনেকৈয়ে কাম কৰিবলৈ আৰম্ভ কৰিছিল।
যোৱা চাৰি বছৰত তেওঁলোকৰ কোম্পানী ‘জিলিংগো’- এ ছিংগাপুৰ, ফিলিপাইনছ, ইণ্ডোনেছিয়া, মালয়েছিয়া, টাইৱান, চীন, কোৰিয়া আৰু কম্বোডিয়াৰ বজাৰ দখল কৰাত সফল হৈছে। ভাৰত আৰু অষ্ট্ৰেলিয়াতো লেনদেন আৰম্ভ হৈছে।
