তামিলনাডুৰ প্ৰাক্তন বিজেপি সভাপতি তথা প্ৰাক্তন আই পি এছ বিষয়া কে. আন্নামালাইয়ে দল ত্যাগ কৰি এক নতুন ৰাজনৈতিক দল গঠন কৰিব বুলি চলি থকা জল্পনা-কল্পনাই ৰাজ্যখনৰ ৰাজনৈতিক মহলত তীব্ৰ চাঞ্চল্যৰ সৃষ্টি কৰিছে। সোমবাৰে তেওঁ দলৰ শীৰ্ষ নেতৃত্বক সাক্ষাৎ কৰাৰ উদ্দেশ্যে চেন্নাইৰ পৰা নতুন দিল্লীলৈ ৰাওনা হোৱাৰ পাছতেই এই চৰ্চাই অধিক তিব্ৰতা লাভ কৰিছে। ইণ্টাৰনেট আৰু সামাজিক মাধ্যমত তেওঁৰ পৰৱৰ্তী ৰাজনৈতিক ভৱিষ্যতক লৈ ব্যাপক আলোচনা অব্যাহত থকাৰ মাজতে তেওঁ অতি সোনকালেই এক নতুন ৰাজনৈতিক মঞ্চ গঠনৰ আনুষ্ঠানিক ঘোষণা কৰিব পাৰে বুলি ধাৰণা কৰা হৈছে।
দিল্লীলৈ ৰাওনা হোৱাৰ পূৰ্বে সংবাদ মাধ্যমৰ আগত তেওঁৰ ৰাজনৈতিক ভৱিষ্যতক লৈ চলি থকা উৰাবাতৰি সন্দৰ্ভত সাংবাদিকে প্ৰশ্ন উত্থাপন কৰে। বিজেপি ত্যাগ আৰু নতুন দল গঠনৰ প্ৰসংগত পোনে পোনে কোনো উত্তৰ নিদি আন্নামালাইয়ে কেৱল কয় যে সকলোৱে অনুগ্ৰহ কৰি দুদিন অপেক্ষা কৰক আৰু দুদিনৰ ভিতৰতে তেওঁলোকে একেলগে বহি এই বিষয়ত কথা পাতিব। তেওঁৰ এই মন্তব্যই চৰ্চাৰ কেন্দ্ৰবিন্দু হৈ পৰাৰ সমান্তৰালভাৱে আন এক ঘটনাই বিশেষভাৱে দৃষ্টি আকৰ্ষণ কৰিছে। চেন্নাই বিমানবন্দৰলৈ যোৱা আন্নামালাইৰ বাহনখনত ভাৰতীয় জনতা পাৰ্টীৰ কোনো দলীয় পতাকা নাছিল, যিটো বিষয়ক ৰাজনৈতিক বিশ্লেষকসকলে এক তাৎপৰ্যপূৰ্ণ ইংগিত হিচাপে গ্ৰহণ কৰিছে।
ইফালে, অহা ৪ জুনত হ’বলগীয়া আন্নামালাইৰ জন্মদিনৰ পূৰ্বে চেন্নাইৰ প্ৰধান পথ আৰু বিভিন্ন স্থানত তেওঁৰ সমৰ্থকসকলে ব্যাপক হাৰত পোষ্টাৰ লগোৱা পৰিলক্ষিত হৈছে। এই পোষ্টাৰসমূহত ‘আমাৰ নেতা, আহক আৰু আমাক নেতৃত্ব দিয়ক’ আদি শ্লোগান ব্যৱহাৰ কৰা হৈছে, যিয়ে তেওঁৰ সমৰ্থকসকলৰ সক্ৰিয়তা আৰু এক নতুন ৰাজনৈতিক যাত্ৰাৰ প্ৰতি থকা আগ্ৰহকে প্ৰতিফলিত কৰিছে। শেহতীয়াকৈ সমাপ্ত হোৱা ২০২৬ চনৰ তামিলনাডু বিধানসভা নিৰ্বাচনৰ পাছতেই এই সামগ্ৰিক ৰাজনৈতিক প্ৰেক্ষাপট গঢ় লৈ উঠিছে, য’ত টিভিকে দলে নিজৰ প্ৰথমটো নিৰ্বাচনতেই ১০৮ খন আসন লাভ কৰি ৰাজ্যখনৰ ৰাজনীতিৰ গতিপথ সলনি কৰি দিছে। এনে এক গুৰুত্বপূৰ্ণ সময়ত সকলোৰে চকু এতিয়া আন্নামালাইৰ পৰৱৰ্তী পদক্ষেপৰ ওপৰত নিবদ্ধ হৈ আছে।
উল্লেখযোগ্য যে, ২০২০ চনত এগৰাকী প্ৰাক্তন আই পি এছ বিষয়া হিচাপে কে. আন্নামালাইয়ে বিজেপিত যোগদান কৰিছিল আৰু ২০২১ চনৰ পৰা ২০২৫ চনলৈকে তেওঁ দলটোৰ তামিলনাডু ৰাজ্যিক সভাপতি হিচাপে সফলতাৰে কাৰ্যনিৰ্বাহ কৰিছিল। নিজৰ কাৰ্যকালত তেওঁ ৰাজ্যখনত বিজেপিৰ আটাইতকৈ জনপ্ৰিয় আৰু প্ৰভাৱশালী মুখ হিচাপে পৰিগণিত হোৱাৰ লগতে যুৱপ্ৰজন্ম আৰু সামাজিক মাধ্যমৰ ব্যৱহাৰকাৰীসকলৰ মাজত ব্যাপক সমৰ্থন আদায় কৰিবলৈ সক্ষম হৈছিল। বৰ্তমান আন্নামালাইৰ দিল্লী ভ্ৰমণ আৰু দলীয় নেতৃত্বৰ সৈতে হ’বলগীয়া বৈঠকত কি সিদ্ধান্ত গ্ৰহণ কৰা হয়, সেয়া পৰৱৰ্তী দুদিনৰ ভিতৰত সম্পূৰ্ণৰূপে স্পষ্ট হৈ পৰাৰ সম্ভাৱনা আছে।
