অসম লোকসেৱা আয়োগৰ ধনৰ বিনিময়ত চাকৰি কেলেংকাৰিৰ মূল অভিযুক্ত ৰাকেশ পালৰ অন্যতম সহযোগী ভাতৃ ৰাজীৱ পালে আত্মসমৰ্পন কৰিব। প্ৰায় দুবছৰ ধৰি আত্মগোপন কৰি থকাৰ পাছত অৱশেষত আৰক্ষীৰ ওচৰত আত্মসমৰ্পণ কৰাৰ প্ৰস্তুতি চলাইছে ৰাজীৱ পালে। এই সন্দৰ্ভত ৰাজীৱ পালে আত্মসমৰ্পনৰ বাবে আৰক্ষীৰ সৈতে যোগাযোগ কৰাৰ কথা জানিব পৰা গৈছে।
জানিব পৰা মতে, ৰাজীৱ পালে মধ্যস্থতাকাৰীৰ জৰিয়তে আত্মসমৰ্পণৰ ইচ্ছা প্ৰকাশ কৰি তদন্তকাৰী আৰক্ষীৰ সৈতে যোগাযোগ চলাই আছে।
উল্লেখযোগ্য যে অসম লোকসেৱা আয়োগৰ নিলম্বিত অধ্যক্ষ ৰাকেশ পালৰ কেলেংকাৰিৰ অন্যতম সহযোগী আছিল ভাতৃ ৰাজীৱ পাল। ৰাজীৱ পালৰ ছপাশালতে ৰাকেশ পালৰ ভুৱা পৰীক্ষাৰ উত্তৰবহীসমূহ ছপা কৰিছিল। ৰাজীৱে লগতে আয়োগৰ চাকৰি ক্ৰয় বিক্ৰয়ত মধ্যস্থতাকাৰীৰ ভূমিকাও পালন কৰিছিল। সেয়েহে, ৰাকেশৰ পালৰ জৰিয়তে সম্পন্ন হোৱা নিযুক্তিসমূহৰ মূল সাক্ষী হিচাপে পৰিগণিত হৈছে ভাতৃ ৰাজীৱ।
আনহাতে, তদন্তকাৰী সংস্থাই ৰাকেশ পালক গ্ৰেপ্তাৰ কৰাৰ সময়তে পলায়ন কৰা ৰাজীৱ পালৰ ভঙাগড়ত থকা ছপাশালত আৰক্ষীয়ে অভিযান চলাই বহু ভুৱা উত্তৰবহীৰ লগতে ভুৱা ইভালুৱেশ্যন শ্বীট উদ্ধাৰ কৰিছিল। প্ৰায় দুবছৰে পলাতক হৈ থকা ৰাজীৱক আৰক্ষীয়ে গ্ৰেপ্তাৰ কৰিবলৈ সক্ষম হোৱা নাছিল।
অসম লোকসেৱা আয়োগৰ এই বৃহৎ কেলেংকাৰিৰ তদন্ত প্ৰক্ৰিয়া প্ৰায় সমাপ্ত হোৱাৰ মুহূৰ্তত ৰাজীৱ পালে আত্মসমৰ্পণ কৰিবলৈ আগবাঢ়ি অহাৰ কথাটোৱে তদন্তকাৰী আৰক্ষীক যথেষ্ট সকাহ প্ৰদান কৰিব।
ইপিনে, ২০১৭ চনৰ ৮ নৱেম্বৰৰ পৰা পলাতক হৈ থকা আন এজন এ পি এছ বিষয়া ৰাকেশ গুপ্তায়ো অধিবক্তাৰ জৰিয়তে গুৱাহাটী উচ্চ ন্যায়ালয়ত জামিন আৱেদন কৰাৰ কথা জানিব পৰা গৈছে।