অসমত চলি থকা ৰাষ্ট্ৰীয় নাগৰিকপঞ্জী উন্নীতকৰণ প্ৰক্ৰিয়াটোৰ কাৰণে লাখ লাখ লোক হাৰাশাস্তিৰ সন্মুখীন হোৱা, বহুজনে আত্মহত্যা কৰা, বহুজন দুৰ্ঘটনাত পতিত হোৱাৰ পিছত এইবাৰ ইয়াৰ সৈতে সাঙুৰ খাইছে বিয়া ভগাৰ ঘটনা।
খচৰাত দৰাৰ নাম নথকা বাবেই কইনা ঘৰে ছোৱালী দিবলৈ অস্বীকাৰ কৰা ঘটনাটো শিলচৰৰ মাজমজিয়াৰ বেৰেংগা পঞ্চম খণ্ডৰ নয়াগ্ৰামৰ। বাতৰিটো প্ৰকাশ কৰিছে “বৰাক বুলেটিন” নামৰ নিউজ পৰ্টেলটোৱে।
এই বিড়ম্বনাৰ সন্মুখীন হোৱা পাত্ৰজনৰ নাম দিলৱাৰ হুছেইন লস্কৰ আৰু তেওঁ কইনাগৰাকীৰ প্ৰতিৱেশীও। দিলৱাৰৰ ছোৱালীগৰাকীৰ সৈতে দীৰ্ঘদিনৰ পৰা প্ৰেমৰ সম্পৰ্ক আছিল।
দুয়োঘৰে বুজাবুজিত উপনীত হৈ আনুষ্ঠানিকভাৱে বিয়া পাতি দিবলৈ আগ বাঢ়ে যদিও বিয়াৰ সকলো কথাবতৰাৰ মাজতে দৰাৰ এন আৰ চিত নাম আছে নাই জানিব বিচাৰোতেই গণ্ডগোল লাগে।
দৰাৰ এন আৰ চিৰ খচৰাত নাম নাই বাবে কইনাৰ দেউতাক নিজৰ ছোৱালীক বিয়া দিবলৈ অমান্তি হয়।
অৱশ্যে কইনা আৰু দৰাৰ মাজত এই ঘটনাই বিচ্ছেদ ঘটাব নোৱাৰিলে। কইনাঘৰে ছোৱালী দিবলৈ অমান্তি হোৱা জানিব পাৰি দুয়ো গোপনে ঘৰ এৰি গুচি যায়। এতিয়ালৈকে তেওঁলোকৰ সন্ধান নাই বুলি জানিব পৰা গৈছে।
ইপিনে পাত্ৰ দিলৱাৰ হুছেইন লস্কৰ আৰু তেওঁৰ পৰিয়ালৰ বিৰুদ্ধে শিলচৰ থানাত যোৱা ১৭ আগষ্টত শিলচৰ থানাত গোচৰো দিছে কাইনাৰ দেউতাকে। এজাহাৰত দিলৱাৰে তেওঁৰ জীয়েকক অপহৰণ কৰা বুলি অভিযোগ কৰিছে কইনাৰ দেউতাকে।
দৰা দিলৱাৰ হুছেইন লস্কৰৰ পৰিয়ালে জনোৱামতে, পৰিয়ালৰ আন সকলোৰে নাম আছে যদিও দিলৱাৰৰ নাম খচৰাত নাই। কিবা ভুলত থাকি যোৱা বুলি ধৰি লৈ মূল এন আৰ চিত তেওঁৰ উঠোৱাৰ বাবে সকলো যাৱতীয় প্ৰক্ৰিয়া সম্পূৰ্ণ কৰা হৈছে।
দিলৱাৰৰ পৰিয়ালৰ অভিযোগ, দাবী কৰা টকা নোপোৱা বাবেহে কইনাৰ পৰিয়ালে এইবোৰ কৰিছে। তেওঁলোকৰ মতে কইনাৰ দেউতাকে ৫ লাখ টকা দাবী কৰিছিল আৰু দিবলৈ অমান্তি হোৱা বাবেই এই ষড়যন্ত্ৰ।