কলিংগ ইনষ্টিটিউট অৱ ইণ্ডাষ্ট্ৰিয়েল টেকন’লজিৰ মহিলা হোষ্টেলৰ পৰা উদ্ধাৰ হৈছে এগৰাকী নেপালী ছাত্ৰীৰ ওলমি থকা মৃতদেহ।
আৰক্ষীয়ে জনোৱা মতে, বৃহস্পতিবাৰে পুৱা ছাত্ৰীগৰাকীক তেওঁৰ হোষ্টেলৰ কোঠাৰ চিলিং ফেনত ওলমি থকা অৱস্থাত উদ্ধাৰ কৰা হয়।
বিশ বছৰীয়া যুৱতীগৰাকীয়ে ওড়িশাৰ ভুৱনেশ্বৰৰ সেই শিক্ষানুষ্ঠানৰ কম্পিউটাৰ বিজ্ঞান বিভাগত বি টেক পঢ়ি আছিল।
আৰক্ষী আয়ুক্তগৰাকীয়ে কয়, “কে আই আই টিৰ মহিলা হোষ্টেলৰ এটা কোঠাৰ পৰা এগৰাকী নেপালী ছাত্ৰৰ মৃতদেহ উদ্ধাৰ কৰা হৈছে। সম্ভৱতঃ তেওঁ আত্মহত্যা কৰিলে।” এগৰাকী জ্যেষ্ঠ আৰক্ষী বিষয়াই জনোৱা মতে, হোষ্টেলৰ ১১১ নম্বৰ কোঠাৰ পৰা ছাত্ৰীগৰাকীৰ মৃতদেহটো উদ্ধাৰ কৰা হৈছে।
একেখন প্ৰতিষ্ঠানৰ আন এগৰাকী নেপালী ছাত্ৰী প্ৰকৃতি লামছালে যোৱা ১৬ ফেব্ৰুৱাৰীত আত্মহত্যা কৰিছিল। সেই ঘটনাটোৱেও আলোড়নৰ সৃষ্টি কৰিছিল। সেই ঘটনাৰ মাত্ৰ আঢ়ৈ মাহৰ পিছতে এই ঘটনাটো ঘটিল। একেদৰে একে ঠাইতে একেটা গোষ্ঠীৰ দুই ছাত্ৰীৰ মৃত্যুৰ ঘটনাই উদ্বেগৰ সৃষ্টি কৰিছে।
প্ৰথম ঘটনাটোত লক্ষ্ণৌৰ এজন চিভিল ইঞ্জিনিয়াৰৰ পুত্ৰ আৰক্ষীৰ হাতত ধৰা পৰে। ল’ৰাটোৱে ভুক্তভোগীক চিনি পাইছিল। অভিযোগ অনুসৰি তেওঁ গোপনে কেইবাখনো ফটোও তুলিছিল আৰু অহৰহ ব্লেকমেইল কৰিছিল।
ইয়াৰ পিছতে মৃত্যুৰ সন্দৰ্ভত কূটনৈতিক পৰ্যায়তো প্ৰতিক্ৰিয়া আৰম্ভ হৈছে। লগতে বিশ্ববিদ্যালয় কৰ্তৃপক্ষই নেপালী ছাত্ৰ-ছাত্ৰীক শীঘ্ৰে হোষ্টেল খালী কৰিবলৈ নিৰ্দেশ দিয়ে। তাক লৈ তীব্ৰ প্ৰতিবাদ আৰম্ভ হয় ।
সেই ঘটনাৰ ঢৌ মাৰ নৌযাওতেই সেই একেটা প্ৰতিষ্ঠানে পুনৰ শিৰোনাম দখল কৰিলে। আকৌ তেনে ঘটনাৰ পুনৰাবৃত্তি ঘটিল। অৱশ্যে কেআইআইটি কৰ্তৃপক্ষই এই সন্দৰ্ভত কোনো মন্তব্য কৰা নাই। ছাত্ৰীগৰাকীৰ আত্মহত্যাৰ সম্ভাৱ্য কাৰণ সন্দৰ্ভত আৰক্ষীয়ে তদন্ত আৰম্ভ কৰিছে।
উল্লেখ্য যে KIIT হৈছে ভুৱনেশ্বৰৰ এখন আগশাৰীৰ ব্যক্তিগত শিক্ষানুষ্ঠান। দেশ-বিদেশৰ বহু ছাত্ৰ-ছাত্ৰীয়ে উচ্চ শিক্ষাৰ বাবে তাত নামভৰ্তি কৰে। দক্ষিণ এছিয়াৰ দেশসমূহৰ পৰা বহু ছাত্ৰ-ছাত্ৰী তাত নামভৰ্তি কৰে।
একেৰাহে দুগৰাকী নেপালী ছাত্ৰীৰ মৃত্যুত তাত থকা ছাত্ৰ সমাজৰ মাজত আতংকৰ সৃষ্টি হৈছে। তদুপৰি সামাজিক সুৰক্ষা আৰু মানসিক স্বাস্থ্যৰ সজাগতা সম্পৰ্কেও নতুন নতুন প্ৰশ্নৰ উত্থাপন হ’বলৈ আৰম্ভ কৰিছে।
