নাগৰিকত্ব (সংশোধনী) আইন-২০১৯ বাতিলৰ আৰু কৃষক নেতা অখিল গগৈৰ মুক্তিৰ দাবীত আজি কৃষক মুক্তি সংগ্ৰাম সমিতি, ছাত্ৰ মুক্তি সংগ্ৰাম সমিতি আৰু নাৰী মুক্তি সংগ্ৰাম সমিতিৰ উদ্যোগত তিনিচুকীয়া জিলাৰ দহতীয়া চুক বিহুতলীৰ পৰা জিলা উপায়ুক্ত কাৰ্যালয়লৈ এক প্ৰতিবাদী কাৰ্যসূচী ৰূপায়ণ কৰা হয়।
অসমবাসীৰ ব্যাপক প্ৰতিবাদৰ পিছতো বিজেপি চৰকাৰে ‘কা’ গৃহীত কৰি কোটি কোটি বাংলাদেশীক নাগৰিকত্ব দিবলৈ যো-জা চলাই অসমৰ ৰাজনীতি, অৰ্থনীতি, ভাষা আৰু সংস্কৃতিৰ ক্ষেত্ৰত প্ৰত্যাহ্বানৰ সৃষ্টি কৰিছে।
এই বিতৰ্কিত ‘কা’ বিৰুদ্ধে যাতে জনগণক সজাগ কৰি সংগঠিত কৰিব নোৱাৰে আৰু ২০২১ চনৰ নিৰ্বাচিনত যাতে সন্মুখৰ পৰা নেতৃত্ব দিব নোৱাৰে সেইবাবেই অখিল গগৈক প্ৰায় ৩৮৫ দিন ধৰি কাৰাবন্দী কৰি ৰাখিছে। ‘কা’ বিৰুদ্ধে সমগ্ৰ অসমৰ ৰাইজে প্ৰতিবাদ কৰিছিল যদিও কেৱল অখিল গগৈক এন আই এ ৰ অধীনত বছৰ বছৰ ধৰি কাৰাবন্দী কৰি থোৱা কাৰ্যই প্ৰমাণ কৰে যে বিজেপি চৰকাৰখন অখিল গগৈৰ ভয়ত কম্পমান। এই অভিযোগ প্ৰতিবাদকাৰীসকলৰ।
তিনিচুকীয়াৰ বিভিন্ন স্থানৰ পৰা অহা প্ৰতিবাদী ৰাইজে অখিল গগৈক মুক্তি দিয়ক, ‘কা’ আমি নামানো, অমিত শ্বাহৰ গুণ্ডাগিৰী নচলিব, বিজেপি চৰকাৰ হুচিয়াৰ, আৰএছএছ হুচিয়াৰ আদি শ্লোগানেৰে আকাশ বতাহ কপাই তোলে।
আজিৰ প্ৰতিবাদী কাৰ্যসূচীত অংশগ্ৰহণ কৰি ছাত্ৰ মুক্তি সংগ্ৰাম সমিতিৰ সভাপতি বিতু সোণোৱালে বিজেপি চৰকাৰখনক প্ৰত্যাহ্বান জনাই কয়, “বিজেপিৰ যদি দম আছে তেনেহ’লে অখিল গগৈক মুক্তি দি ২১ৰ নিৰ্বাচনত অৱতীৰ্ণ হৈ দেখাওক। বিজেপিক অসমৰ মাটিৰ পৰা উৎখাত কৰি দিয়া হ’ব। ‘কা’ বিৰুদ্ধে আন্দোলন কৰাৰ বাবে ৭ মাহ আমাক জেইলত দিছিল, কিন্তু আমি স্পষ্ট কৰি দিছো ৭ মাহ নহয়, ৭ বছৰ কাৰাগাৰত ৰাখিলেও ‘কা’ মানি লোৱা নহব।”
গৃহমন্ত্ৰী অমিত শ্বাহে আন্দোলন কৰিলে শ্বহীদৰ সংখ্যা বাঢ়িব বুলি এখন জনসভাত দিয়া মন্তব্যৰ সন্দৰ্ভত ছাত্ৰ মুক্তি সংগ্ৰাম সমিতিৰ উপ-সভাপতি লক্ষ্যজ্যোতি গগৈয়ে কয়, “অসমৰ মানুহে অমিত শ্বাহৰ দাদাগিৰীলৈ ভয় নকৰে, অসমীয়া জাতিয়ে আন্দোলন কৰি প্ৰাপ্য অধিকাৰ কাঢ়ি আনিব জানে, অসমীয়া জাতিক ভয় দেখুৱাই লাভ নাই, অমিত শ্বাহক বুঢ়া আঙুলি দেখুৱাই আজি আন্দোলন কৰিবলৈ ওলাই আহিছো।”
প্ৰতিবাদৰ নেতৃত্ব বহন কৰি ছাত্ৰ মুক্তি সংগ্ৰাম সমিতি তিনিচুকীয়া জিলা সমিতিৰ সভাপতি পাপু দত্তই কয়, “বিজেপি চৰকাৰখনে ক্ষমতালৈ অহাৰ আগত জাটি-মাটি-ভেটি ৰক্ষাৰ কথা কৈছিল। কিন্তু শাসনত অধিষ্ঠিত হৈয়ে চৰকাৰখনে জাতিধ্বংসী নাগৰিকত্ব সংশোধনী আইনৰ জৰিয়তে হিন্দু বাংলাদেশীক অসমত সংস্থাপিত কৰাৰ যো-জা চলাইছে। এফালে কা আন্দোলনত সক্ৰিয় নেতৃত্ব বহন কৰা অখিল গগৈক কাৰাৰুদ্ধ কৰি চৰকাৰখনে নামনি জলবিদ্যুৎ প্ৰকল্প, টোল গেট মুকলিকে আৰম্ভ কৰি এটাৰ পিছত এটাকৈ অসমবিৰোধী সিদ্ধান্ত গ্ৰহণ কৰিছে আৰু ইয়াৰ প্ৰত্যুত্তৰ আগন্তক নিৰ্বাচনত অসমবাসী ৰাইজে নিশ্চয়কৈ দিব।”
নাগৰিকত্ব সংশোধনী আইন বাতিল, কৃষক নেতা অখিল গগৈৰ মুক্তিৰ দাবীৰ উপৰিও বিতৰ্কিত তিনিখন কৃষি আইন বাতিল কৰিবলৈ, দুখীয়া ৰাইজক মাইক্ৰফাইনেন্সৰ ঋণ ৰেহাই দিবলৈ, বিদ্যুৎ খণ্ড ব্যক্তিগতকৰণ বন্ধ কৰিবলৈ আৰু দধীয়া লাইকাবাসী ৰাইজক সংস্থাপন দিবলৈ দাবী জনায় অতিৰিক্ত উপায়ুক্তৰ জৰিয়তে ৰাজ্যপাললৈ এখন স্মাৰক পত্ৰ প্ৰদান কৰে সংগঠনকেইটাই।
প্ৰতিবাদী কাৰ্যসূচীত কৃষক মুক্তি সংগ্ৰাম সমিতিৰ তিনিচুকীয়া জিলা সমিতিৰ সভাপতি মানৱ চেতিয়া, সাধাৰণ সম্পাদক ক্ৰমে বিমান গগৈ, ৰুদ্ৰ দহতীয়া, নাৰী মুক্তি সংগ্ৰাম সমিতিৰ তিনিচুকীয়া জিলা সমিতিৰ সম্পাদিকা সবিতা হাজৰিকা, চুমী গগৈ উপস্থিত থাকে।