পি এফ আইৰ শীৰ্ষ নেতাক গ্ৰেপ্তাৰ, দুই কংগ্ৰেছীৰ সন্ধান জাৰি
অসম আৰক্ষীয়ে গুৱাহাটীত কেববিৰোধী হিংসাত্মক প্ৰতিবাদত জৰিত থকাৰ অভিযোগত বুধবাৰে পপুলাৰ ফ্ৰণ্ট অৱ ইণ্ডিয়াৰ দুজন শীৰ্ষ নেতাক গ্ৰেপ্তাৰ কৰিছে।
একে অভিযোগত আৰক্ষীয়ে “পলাতক” দুই কংগ্ৰেছ নেতাৰ সন্ধান চলাই আছে।
“পি এফ আইৰ ৰাজ্যিক সভাপতি আমিনুল হক আৰু প্ৰচাৰ সম্পাদক মঃ মোজাম্মিল হকক গ্ৰেপ্তাৰ কৰা হৈছে। অসম প্ৰদেশ যুৱ কংগ্ৰেছ সভাপতি কামৰুল ইছলাম চৌধুৰী আৰু এন এচ ইউ আইৰ শীৰ্ষ নেতা জুবেৰ আলমৰ সন্ধান চলাই থকা হৈছে,” অসম চৰকাৰৰ মুখপাত্ৰ চন্দ্ৰ মোহন পাটোৱাৰীয়ে কয়।
পাটোৱাৰীয়ে কয় যে এইধৰণৰ হিংসাক উৎসাহ যোগোৱা ৰাজনৈতিক শক্তিৰ বিৰুদ্ধে চৰকাৰে কঠোৰ ব্যৱস্থা গ্ৰহণ কৰিব।
“আন্দোলনকাৰীসকল হিংসাত অপৰাধী নহয়। কিন্তু তৃতীয় পক্ষ এটাই পৰিস্থিতিৰ সুযোগ লৈছে আৰু প্ৰতিবাদৰ নামত ৰাজ্যখন অস্থিৰ কৰিব খুজিছে। আমাৰ চৰকাৰ মানুহৰ জীৱন আৰু সম্পত্তি ৰক্ষাৰ বাবে প্ৰতিশ্ৰুতিবদ্ধ,” তেওঁ কয়।
পাটোৱাৰীয়ে কয় যে চৰকাৰ জাতি-মাটি-ভেটি-ভাষা সুৰক্ষাৰ বাবে প্ৰতিশ্ৰুতিবদ্ধ আৰু এই ক্ষেত্ৰত তেওঁলোকে কোনোপধ্যে আপোচ নকৰে।
সোণোৱাল চৰকাৰৰ প্ৰায় সকলো সদস্যই অসম আন্দোলনৰ পৰা অহা বুলি উল্লেখ কৰি পাটোৱাৰীয়ে কয় যে তেওঁলোকে চলিত গণতান্ত্ৰিক আন্দোলনক সন্মান কৰে।
তেওঁ কয় যে চৰকাৰে যোৱা তিনি বছৰে লোৱা উন্নয়নমূলক কাম-কাজত শেহতীয়া হিংসাত্মক ঘটনাই প্ৰভাৱ পেলাইছে।
“এই ধৰণৰ হিংসাৰ প্ৰভাৱ অসমৰ ২২ লাখ নিবনুৱাৰ ওপৰত পৰিব,” তেওঁ কয়।