তিনিচুকীয়াৰ ঘটনাৰ বাবে উচটনিমূলক মন্তব্যই দায়ী : অনুপ চেতিয়া

আলোচনাপন্থী আলফা নেতা তথা খিলঞ্জীয়া মঞ্চৰ আহ্বায়ক অনুপ চেতিয়াই হোজাই সমষ্টিৰ বিজেপি বিধায়ক শিলাদিত্য দেবক গ্ৰেপ্তাৰ কৰাৰ দাবী তুলিছে। বিধায়কগৰাকীয়ে উচটনিমূলক মন্তব্য প্ৰকাশ কৰাৰ বাবে শেহতীয়াভাৱে খেৰবাৰীত নৰহত্যাৰ ঘটনা সংঘটিত হৈছে বুলি অভিযোগ তুলি তেওঁক গ্ৰেপ্তাৰ কৰাৰ দাবী তুলিছে চেতিয়াই।

গুৱাহাটীত এখন সংবাদমেলক সম্বোধন কৰি চেতিয়াই প্ৰৰোচনামূলক মন্তব্য দিয়া  অভয়াপুৰীৰ বিধায়ক চন্দন সৰকাৰ, কংগ্ৰেছৰ প্ৰাক্তন মন্ত্ৰী অৰ্ধেন্দু দে আৰু সদৌ কৰিমগঞ্জ হাইলাকান্দি ছাত্ৰ সন্থাৰ প্ৰতিষ্ঠাপক সভাপতি প্ৰদীপ দত্তকো গ্ৰেপ্তাৰ কৰি তেওঁলোকক এই হত্যাকাণ্ডৰ অনুসন্ধানৰ খাতিৰতে কোঠোৰ নিৰীক্ষণৰ মাজত ৰখাৰ দাবী তোলে।

আলফা নেতাগৰাকীয়ে আৰু অভিযোগ কৰে যে একাংশ লোকে অসমীয়া আৰু বাঙালীসকলৰ মাজত সাম্প্ৰদায়িক সংঘৰ্ষ সৃষ্টি কৰাৰ প্ৰচেষ্টাত আছে।

চেতিয়াই আৰু কৈছে যে সমাজত ভেদাভেদৰ ৰাজনীতি কৰি অসমত অশান্তিৰ সৃষ্টি কৰিব বিচৰাসকলৰ উদ্দেশ্য সফল হ’বলৈ দিয়া নহ’ব। তেওঁ কয়, ”নাগৰিকত্ব (সংশোধনী) বিধেয়ক-২০১৬ ৰদ কৰাৰ বাবে খিলঞ্জীয়া মঞ্চই মুখ্য মন্ত্ৰী সৰ্বানন্দ সোণোৱালৰ ওচৰত এখন স্মাৰকপত্ৰ দাখিল কৰিব।”

‘আলোচনাপন্থী আলফা নেতা মৃণাল হাজৰিকা আৰু জিতেন দত্তক গুলীয়াই মাৰক’ বুলি ভাষ্য প্ৰদান কৰিবলৈ অৰ্ধেন্দু কোন বুলি আলোচনাপন্থী আলফা নেতাগৰাকীয়ে প্ৰশ্ন কৰে।

আইন সকলোৰে বাবে সমান আৰু ই ইয়াৰ নিজৰ পথেৰে গতি কৰিব বুলি চেতিয়াই মন্তব্য কৰে। ‘‘আমি যিহেতু শান্তি আলোচনাৰ প্ৰক্ৰিয়াৰ সৈতে সমন্বয় স্থাপন কৰি আছোঁ সেয়েহে ৰাষ্ট্ৰৰ বিৰুদ্ধে আমি একো ক’ব নোৱাৰোঁ। কিন্তু অসম খিলঞ্জীয়া মঞ্চৰ পৰা আমি এনেধৰণৰ বিষয়ত মাত মাতিম।’’ তেওঁ কয়।

উল্লেখ্য যে দেওবাৰে কটনৰ চুডমাৰ্চন প্ৰেক্ষাগৃহত কৃষক মুক্তি সংগ্ৰাম সমিতিকে ধৰি ৬০টা সংগঠনে অনুষ্ঠিত ‘ৰাইজমেল’ত অনুপ চেতিয়াই উল্লেখ কৰিছিল যে চৰকাৰে কেন্দ্ৰই আলফাক অসমৰ সাম্প্ৰতিক ঘটনাৱলী সন্দৰ্ভত নিৰৱতা অৱলম্বন কৰাৰ বাবে হেঁচা প্ৰয়োগ কৰিছে।