নাগৰিকত্ব সংশোধনী বিধেয়কৰ গইনা লৈ অসমত সৃষ্টি হোৱা বিদ্বেষৰ পৰিস্থিতিৰ সুযোগত সুকীয়া বৰাক দাবী কৰা প্ৰদীপ দত্ত ৰয়ৰ লগতে নিখিল ভাৰত মহিলা কংগ্ৰেছৰ সভানেত্ৰী তথা শিলচৰৰ সাংসদ সুস্মিতা দেব, কৰিমগঞ্জৰ বিধায়ক কমলাক্ষ দে’ পুৰকায়স্থ, হোজাইৰ বিধায়ক শিলাদিত্য দেব, ৰাজেন গোহাঁই, কংগ্ৰেছী নেতা ছিদ্দিক আহমেদ আৰু চন্দন সৰকাৰৰ বিৰুদ্ধে শিলচৰ আৰক্ষীৰ ওচৰত এখন এজাহাৰ দাখিল কৰিছে বৰাক উপত্যকাৰ প্ৰাক্তন আলফা ঐক্য মঞ্চই।
সাম্প্ৰদায়িক ঘৃণা আৰু বিষবাষ্প বিয়পোৱা আৰু উচটনিমূলক মন্তব্য দিয়াৰ অভিযোগত নেতাকেইজনৰ বিৰুদ্ধে এই এজাহাৰ দিয়া হৈছে। মঞ্চৰ এজাহাৰৰ ভিত্তিত শিলচৰ আৰক্ষীয়ে উক্ত নেতাকেইজনৰ বিৰুদ্ধে ভাৰতীয় দণ্ডবিধিৰ ১২০(বি)/১৫৩(এ)ৰ অধীনত ৩৮৫২/১৯ নম্বৰৰ এটা গোচৰ ৰুজু কৰিছে।
এজাহাৰখনত মঞ্চই অভিযোগ কৰে যে এই সাতজন নেতা আৰু অন্যান্য কিছুমানৰ উচটনিমূলক মন্তব্যই পৰিস্থিতিৰ অৱনতি ঘটইছে আৰু তিনিচুকীয়া ঘটনাটোৰ বাবে তেওঁলোক সমানে দায়ী।
আনহাতে আজি শিলচৰ চহৰৰ পৰা আঁতৰৰ সোণাবাৰীঘাটত দিয়া সংবাদমেলত মঞ্চৰ নেতৃবৰ্গই উভতি ধৰে সদৌ কাছাৰ কৰিমগঞ্জ হাইলাকান্দি ছাত্ৰ সন্থাৰ (ACKHSA) প্ৰতিষ্ঠাপক সভাপতি তথা গুৱাহাটী উচ্চ ন্যায়ালয়ৰ অধিবক্তা প্ৰদীপ দত্ত ৰয়ক। কেৱল উভতি ধৰাই নহয়, নেতাজনক সাৱধানবাণী শুনায় বৰাকৰ প্ৰাক্তন আলফাৰ ঐক্য মঞ্চৰ নেতাসকলে।
“প্ৰদীপ দত্ত ৰয়ক কোনে সুকীয়া বৰাক ভেলি দাবী কৰাৰ অধিকাৰ দিলে?” আজি আয়োজিত সংবাদমেলত এইদৰে কয় বৰাকৰ প্ৰাক্তন আলফা ঐক্য মঞ্চৰ সাধাৰণ সম্পাদক অনমূল হক লস্কৰে। মন কৰিব লগীয়া যে অসমীয়াতে সংবাদমেল সম্বোধন কৰে উপত্যকাটোৰ প্ৰাক্তন আলফা নেতাকেইজনে।
“তেওঁক কোনে দায়িত্ব দিছে? তেওঁ নিজৰ অনুষ্ঠানটো আগে ঠিক কৰি লওক। বৰাক সুকীয়া কৰিব নে নকৰিব সেয়া ৰাইজে ক’ব।” এইদৰে কয় সাধাৰণ সম্পাদক লস্কৰে।
তেওঁ বিষবাষ্প বিয়পাই মানুহক হিংসাৰ বাবে উচটনি দিয়াক সমালোচনা কৰি কয়, “তেওঁলোক নেতা হ’ব বিচাৰিছে। মানুহৰ জীৱন লৈ খেলিছে।”
উল্লেখযোগ্য যে যোৱা ৩০ অক্টোবৰত প্ৰদীপ দত্ত ৰয়ে ‘হয় নাগৰিকত্ব বিধেয়ক নহয় সুকীয়া বৰাক ভেলি লাগিবই’ বুলি বিতৰ্কিত মন্তব্য কৰিছিল। ইয়াৰ পিছদিনাই তিনিচুকীয়াত অচিনাক্ত আততায়ীয়ে ৫জনকৈ নিৰীহ বাংলাভাষী লোকক গুলীয়াই হত্যা কৰিছিল।
প্ৰসংগক্ৰমে উল্লেখ কৰিব পাৰি যে বৰাকৰ প্ৰাক্তন আলফা ঐক্য মঞ্চই নাগৰিকত্ব সংশোধনী বিধেয়কৰ স্পষ্ট বিৰোধিতা কৰি আহিছে। নাগৰিকত্ব সংশোধনী বিধেয়কৰ বাবে গঠিত যুটীয়া সংসদীয় সমিতিৰ আগত বিধেয়কখনৰ বিৰোধ কৰি নিজৰ মত আগ বঢ়াইছিল মঞ্চই। কেৱল সেয়াই নহয়, বিধেয়কখনৰ সমৰ্থন বৰাকত সমদল উলিওৱা সংগঠনবোৰৰ বৈধতাৰ প্ৰশ্ন তুলি তাৰ এক তদন্ত কৰিবলৈ কাছাৰ, হাইলাকান্দি আৰু কৰিমগঞ্জৰ উপায়ুক্ত আৰু অসম চৰকাৰৰ গৃহ বিভাগক অনুৰোধ কৰিছিল।
