ল’কডাউনৰ সময়ছোৱাত বিজেপিয়ে দৰিদ্ৰ লোকক সাহায্য বিতৰণৰ ক্ষেত্ৰত গেৰুৱাকৰণ কৰাৰ অভিযোগ উত্থাপন কৰিছে প্ৰদেশ কংগ্ৰেছৰ সভাপতি ৰিপুন বৰাই।
‘দৰিদ্ৰ লোকক আঁচনি বিতৰণৰ গোটেই প্ৰক্ৰিয়াটো গেৰুৱাকৰণ হৈছে। বিজেপিৰ কৰ্মীক বাছি বাছি তেওঁলোকে আঁচনিত অন্তৰ্ভুক্ত কৰিছে। অবিজেপি লোকসকলক সম্পূৰ্ণৰূপে বঞ্চিত কৰিছে। সংশ্লিষ্ট বিভাগক পঞ্চায়তৰ অন্তৰ্গত লোকৰ তালিকা প্ৰস্তুত কৰিবলৈ নিদি এই দায়িত্ব বিজেপিৰ নেতাক দিছে।‘ সংবাদ মাধ্যমলৈ প্ৰেৰণ কৰা এটা ভিডিঅ’ত ৰিপুন বৰাই এইদৰে কয়।
ইয়াৰোপৰি ‘বিজেপি চৰকাৰে মাছৰ তেলৰে মাছ ভাজিছে’ বুলি উল্লেখ কৰি বৰাই লগতে কয় ‘ৰাষ্ট্ৰীয় খাদ্য সুৰক্ষা আইনৰ অধীনত দৰিদ্ৰ পৰিয়ালে ৫ কিঃ গ্ৰাঃ চাউল লাভ কৰি আহিছে। এই আঁচনিৰ লগত ল’কডাউন বা কৰ’না ভাইৰাচৰ কোনো সম্পৰ্ক নাই। কিন্তু চৰকাৰে এই আঁচনিৰ চাউল বিতৰণ কৰি তেওঁলোকে ল’কডাউনৰ ক্ষতিপূৰণ হিচাপে দি আভুৱা ভাৰিছে।‘
ল’কডাউনৰ ক্ষতিপূৰণ হিচাপে নিৰ্মলা সীতাৰমণে ঘোষণা কৰা পাঁচ কেজি চাউল আৰু ১ কিঃ গ্ৰাঃ দালি অসমৰ দুখীয়া জনসাধাৰণে লাভ কৰা নাই বুলিও বৰাই গুৰুতৰ অভিযোগ তোলে।
বৰাই বিজেপিৰ মন্ত্ৰী-বিধায়কসকলৰ বিৰুদ্ধে অভিযোগ তুলি কয়, ‘বিজেপিৰ মন্ত্ৰী-বিধায়কসকলে ঠাই বিশেষে ৰাজহুৱাভাৱে বিতৰণ কৰিবলগীয়া চাউল সমবায়সমূহক ভয়-ভিতী দেখুৱাই এটা অংশ চাউল কৰ্তন কৰি লৈ গৈছে। সেই চাউলখিনি দলৰ ফালৰ পৰা বিতৰণ কৰা বুলি ৰাইজৰ মাজত বিতৰণ কৰিছে।‘
‘মানৱ জাতিৰ আজি জীয়াই থকাৰ সন্ধিক্ষণ আহিছে। এইখিনি সময়ত বিজেপি দলে ক্ষুদ্ৰ ৰাজনৈতিক লাভালাভৰ বাবে এনেকুৱা অমানৱীয় আচৰণ কৰিছে। সেয়া অতি লজ্জাজনক কথা।‘ বিজেপিক কটাক্ষ কৰি বৰাই কয়।
আনহাতে, ক্ষুদ্ৰ উপাৰ্জনৰ ওপৰত নিৰ্ভৰ কৰি যিসকল লোকে জীৱিকা নিৰ্বাহ কৰি আছিল সেইসকৱল ল’কডাউনৰ ফলত বেয়াকৈ ক্ষতিগ্ৰস্ত হৈছে বুলি বৰাই উল্লেখ কৰি লগতে কয় ‘এইসকল লোকক অনুদান দিবৰ বাবে চৰকাৰে কোনোধৰণৰ আঁচনি লোৱা নাই। এইসকল লোককো সাহায্য প্ৰদান কৰিব লাগে বুলি চৰকাৰক দাবী জনাইছো।’
তদুপৰি চৰকাৰৰ কৃষি বিভাগে কৃষক ৰাইজক জলসিঞ্চনৰ বাবে প্ৰয়োজনীয় ডিজেল বিনামূলীয়াকৈ বা সুলভ মূল্যত যোগান ধৰিবলৈ বৰাই দাবী জনায়।
বৰাই আৰু কয় ‘কংগ্ৰেছ কৰ্মীসকলে দুখীয়া ৰাইজক সহায় কৰিবলৈ আগবাঢ়ি আহিছে যদিও প্ৰশাসনে তেওঁলোকক অনুমতি দিয়া নাই। অন্য হাতেদি বিজেপিৰ কৰ্মীসকলক ল’কডাউনৰ নিয়ম ভংগ কৰি বা সামাজিক ব্যৱধানৰ নিয়ম ভংগ কৰি জাকে জাকে মানুহ ওলাই ৰাইজৰ মাজত সাহায্য বিতৰণৰ বাবে চৰকাৰে সুবিধা কৰি দিছে।‘
ওপৰোক্ত দাবীসমূহৰ লগতে মুঠ ১৫ টা দাবী পূৰণৰ ব্যৱস্থা কৰিবলৈ আহ্বান জনাই আজি অসম প্ৰদেশ কংগ্ৰেছে প্ৰধান মন্ত্ৰী আৰু মুখ্য মন্ত্ৰীলৈ এখন স্মাৰকপত্ৰ প্ৰেৰণ কৰে।
