২০২১ ৰ নিৰ্বাচনৰ পূৰ্বে কংগ্ৰেছ এআইয়ুডিএফ, আঞ্চলিক গণ মৰ্চা, চিপিআই, চিপিআইএমৰ মিত্ৰতা তথা মহাজোঁটৰ বাবে যেন এখোজ আগবাঢ়িছে।
গুৱাহাটী প্ৰেছক্লাৱত যৌথভাৱে প্ৰদেশ কংগ্ৰেছ, আঞ্চলিক গণমৰ্চা, চিপিআই আৰু চিপিআইএমৰ নেতাই সম্বোধন কৰা এক সংবাদমেলেই তাৰ চূড়ান্ত নিদৰ্শন দাঙি ধৰিলে।
২০২১ ৰ নিৰ্বাচনত বিজেপিক উৎখাত কৰাৰ স্বাৰ্থত একত্ৰিত হোৱাৰ যেন পূৰ্ণ সম্ভাৱনা প্ৰকট হৈ পৰিছে আজিৰ এই সংবাদমেলত।
যৌথভাৱে সম্বোধন কৰা এই সংবাদমেলত প্ৰথমে প্ৰদেশ কংগ্ৰেছৰ সভাপতি ৰিপুন বৰাই নিজৰ বক্তব্য ৰাখে আৰক্ষীৰ SIৰ কেলেংকাৰিৰ বিৰুদ্ধে।
বৰাই কয়, ‘গোটেই প্ৰশাসন ব্যৱস্থা আৰ.এছ.এছে হস্তগত কৰাটোৱেই তেওঁলোকৰ মূল এজেণ্ডা। সেইকাৰণে বিজেপি শাসিত ৰাজ্যৰ মুখ্যমন্ত্ৰীৰ লগত অনানুষ্ঠানিকভাৱে OSD দিছে। এই OSD জন আৰ.এছ.এছৰ প্ৰতিনিধি হিচাপে চৰকাৰৰ লগত থাকে।‘
‘এই গোপন এজেণ্ডাৰ জৰিয়তে চৰকাৰী ব্যৱস্থাটোকে গেৰুৱাকৰণ কৰিছে। বিশেষকৈ তেওঁলোকে পুলিচ বিভাগটো নিৰ্বাচিত কৰি লৈছে। সেয়েহে তেওঁলোকে আগতীয়াকৈ তেওঁলোকৰ কেডাৰ বিলাকৰ মাজত প্ৰশ্ন কাকত ফাদিল কৰি এটা মক ট্ৰায়েল পাতিছিল।‘ সংবাদমেলত এইদৰে কয় ৰিপুন বৰাই।
ইপিনে, লিখিত পৰীক্ষা অনুষ্ঠিত হোৱাৰ নিৰ্দিষ্ট সময়ৰ পূৰ্বে মকট্ৰায়েল বহু ঠাইতে পাতিছিল বুলি দাবী কৰি তেওঁ লগতে কয় ‘কিন্তু থেংক ইউ লজৰ কথাটোহে পোহৰলৈ আহিল। আমাৰ হাতত বহু তথ্য আছে। যদি এই বিষয়ত তদন্ত হয় আমি এই তথ্যবোৰ যোগান ধৰিম।‘
ৰিপুন বৰাৰ মতে ‘আৰক্ষীয়েই আৰক্ষীৰ বিৰুদ্ধে তদন্ত কৰিবলৈ দিছে। গতিকে এই তদন্ত কেতিয়াও নিৰপেক্ষ নহয়।‘
‘প্ৰশ্নকাকত ফাদিল হোৱাৰ পাছত নিযুক্তি বৰ্ডৰ অধ্যক্ষজনৰ দায়িত্ব থাকে। কিন্তু এতিয়ালৈকে অধ্যক্ষজনক জবাবদিহি কৰা নাই। তেওঁ স্ব-ইচ্ছাৰে পদত্যাগ কৰি গুছি গৈছে।‘ বৰাই এইদৰে কয়।
ইপিনে, গৃহ বিভাগৰ দায়িত্বত মুখ্যমন্ত্ৰী আছে, তেওঁৰ কাৰ্য্যালয়ৰ পৰাই এই কেলেংকাৰি হৈছে বুলি দাবী কৰি বৰাই লগতে কয় ‘তেওঁৰ বিভাগৰ বিৰুদ্ধে CID য়ে তদন্ত কৰাৰ কি সাহস আছে? তেওঁলোকৰ মুখ্যমন্ত্ৰীৰ বিৰুদ্ধে তদন্ত কৰাৰ কোনো সাহস নাই।‘
‘মুখ্যমন্ত্ৰী চকীত থকালৈকে এই তদন্ত নিৰপেক্ষ হ’ব নোৱাৰে। এই কেলেংকাৰিৰ বিৰুদ্ধে উচ্চ ন্যায়ালৰ ন্যায়াধীশৰ দ্বাৰা ন্যায়িক তদন্ত হ’ব লাগে আৰু তদন্ত সমাপ্ত নোহোৱালৈকে মুখ্যমন্ত্ৰী চকীখনৰ পৰা আঁতৰি থাকিব লাগে।‘ এইদৰে কয় বৰাই।
ইপিনে, উক্ত সংবাদমেলত উপস্থিত থাকি ৰাজ্যসভাৰ সাংসদ তথা আঞ্চলিক গণ মৰ্চাৰ নেতা অজিত ভুঞাই প্ৰধান মন্ত্ৰী নৰেন্দ্ৰ মোদীক সমালোচনা কৰে।
‘প্ৰধান মন্ত্ৰীয়ে সংসদত প্ৰৱেশ কৰিয়েই সাষ্টাঙ্গে সেৱা কৰিছিল কিন্তু তেওঁ গণতন্ত্ৰ ৰক্ষা কৰিব পৰা নাই। কিন্তু বাকী প্ৰধানমন্ত্ৰীসকলে সেৱা কৰা নাছিল যদিও গণতন্ত্ৰ ৰক্ষা কৰিছিল। তেওঁ সেৱা কৰাটোও যে এক নাটক আছিল সেয়া পাছত প্ৰমাণ পোৱা গৈছিল।‘ ভূঞাই এইদৰে কয়।
তদুপৰি, সংসদতো প্ৰশ্নোত্তৰ শিতান আৰু প্ৰাইভেট মেম্বাৰ বিল আঁতৰাই দিয়া হ’ল বুলি উল্লেখ কৰি ভূঞাই কয় ‘মাত্ৰ দুটা স্পেচিয়েল মেনশ্যন আৰু শূণ্যকালীন ঘন্টা ৰখা হৈছে। যিটোত আমাৰ দৰে নিৰ্দলীয় সাংসদে কথা কোৱাৰ বাবে মাত্ৰ এক-ডেৰ মিনিট সময় পাওঁ।‘
‘দেশত যিখিনি গণতন্ত্ৰ আছিল তাকো হত্যা কৰা হৈছে। সমগ্ৰ গণতান্ত্ৰিক ব্যৱস্থাটো প্ৰধানমন্ত্ৰীয়ে উপলুঙা কৰিছে। এইখন চৰকাৰৰ প্ৰতিটো কথা প্ৰতিটো পদক্ষেপত মিথ্যাচাৰ আৰু জনসাধাৰণক মুৰ্খ জ্ঞান কৰা কথাটোৱেই প্ৰতিফলিত হৈছে।‘ বিজেপি চৰকাৰক সমালোচনা কৰি এইদৰে কয় ভূঞাই।
ইপিনে, বিজেপিয়ে ৰাজনীতিক অপৰাধীকৰণ কৰিছে বুলি অভিযোগ তুলি তেওঁ লগতে কয় ‘ডিমা হাচাওৰ গাৰ্লোছাৰ বিৰুদ্ধে পুৰ্ণেন্দু লাংথাচা আৰু নিন্দু লাংথাচাক হত্যা কৰাৰ বাবে ইতিমধ্যে চাৰ্জশ্বীট হৈছে। কিন্তু বিজেপিয়ে এইবোৰ কেয়াৰ কৰা নাই আৰু তেওঁক ৰাখি থৈছে। বেছি হিন্দুত্ব দেখুৱাবলৈ গৈ তেওঁ ডিমা-হাচাওত মুছলমান শূণ্য কৰাৰ কথা ক’বলৈ সাহস কৰিছে। এই কথা ৰাজ্যসভাত মই উত্থাপন কৰিছিলো। শুনিছো ৰাজ্যৰ মুখ্য সচিবৰ পৰা এই সন্দৰ্ভত উত্তৰ বিচাৰি পত্ৰ প্ৰেৰণ কৰিছে।‘
‘বিজেপিয়ে গাৰ্লোছাৰ দৰে মানুহ ক্ষমতাত ৰাখি প্ৰমাণ কৰিছে যে তেওঁলোকে সংবিধান, গণতন্ত্ৰ একোৱেই বিশ্বাস নকৰে।‘ ভূঞাই কয়।
উক্ত সংবাদমেলত চিপিআই(এম) ৰ হৈ সাধাৰণ সম্পাদক বিবেক দাস আৰু চিপিআইৰ সাধাৰণ সম্পাদক মুনীন মহন্ত উপস্থিত থাকে।
আজিৰে পৰাই চাৰিওটা ৰাজনৈতিক দলে বিজেপি চৰকাৰৰ জন বিৰোধী নীতিৰ বিৰুদ্ধে একেলগে প্ৰতিবাদ তথা সংগ্ৰাম কৰি যাব বুলি নেতৃত্বই সদৰী কৰে।