কেন্দ্ৰীয় চৰকাৰে অনা বিতৰ্কিত নাগৰিকত্ব (সংশোধন) আইনখনৰ অধীনত নাগৰিকত্ব পাবৰ বাবে অবৈধ বিদেশীয়ে মাত্ৰ দুটা প্ৰমাণ দিব পাৰিলেই হ’ব।
কেন্দ্ৰীয় চৰকাৰৰ এটা সূত্ৰৰ উদ্ধৃতিৰে ইণ্ডিয়া টুডেইত প্ৰকাশিত এটা বাতৰিত কোৱা হৈছে যে এই আইনৰ অধীনত নাগৰিকত্ব পাবৰ আৱেদনকাৰীয়ে নিজৰ ধৰ্মৰ প্ৰমাণ দিব লাগিব।
তাৰোপৰি ২০১৪ চনৰ ৩১ ডিচেম্বৰৰ পূৰ্বে ভাৰতত প্ৰৱেশ কৰা বা থকাৰ প্ৰমাণ দিব লাগিব।
কেন্দ্ৰীয় চৰকাৰে প্ৰস্তুত কৰি থকা নিয়মাৱলী মতে, ঘাইকৈ এই দুটাই হ’ব বিতৰ্কিত আইনখনৰ অধীনত নাগৰিকত্ব পোৱাৰ চৰ্ত। আৱেদন প্ৰক্ৰিয়া সম্পূৰ্ণ অনলাইন হ’ব।
বাতৰিটোত লগতে কোৱা হৈছে যে অসমৰ বাবে নিয়মত কিছু ভিন্নতা দিয়া হ’ব পাৰে।
অসমত মাত্ৰ সীমিত সময়ৰ বাবে এই আইনৰ অধীনত নাগৰিকত্ব পাবলৈ আৱেদনৰ সুযোগ দিব পাৰে কেন্দ্ৰীয় চৰকাৰে। বাতৰিটোত তিনি মাহৰ এটা সীমিত সময়ৰ কথা কোৱা হৈছে।
কেন্দ্ৰৰ বিজেপি নেতৃত্বাধীন চৰকাৰখনে জনতাৰ বিৰোধ নেওচি নাগৰিকত্ব (সংশোধন) আইনখন যোৱা ১০ জানুৱাৰিৰ পৰা বলৱৎ কৰে। আইনখনে ভাৰতৰ চুবুৰীয়া বাংলাদেশ, পাকিস্তান আৰু আফগানিস্তানৰ পৰা ভাৰতত অবৈধভাৱে প্ৰৱেশ কৰা হিন্দু, বৌদ্ধ, জৈন, খ্ৰীষ্টান আৰু পাৰ্চীসকলক নাগৰিকত্ব দিব বিচাৰিছে।
ফলত আৱেদনকাৰীয়ে ধৰ্মৰ পৰিচয় দিয়াটো এটা দৰকাৰী কথা হ’ল আৰু এই আইনখনৰ জৰিয়তে দেশত প্ৰথমবাৰৰ বাবে ধৰ্ম নাগৰিকত্ব পোৱাৰ প্ৰথম চৰ্ত হ’ল।
বিতৰ্কিত আইনখনৰ বিৰুদ্ধে দেশৰ বিভিন্ন দল-সংগঠন আৰু ব্যক্তি উচ্চতম ন্যায়ালয়ৰ কাষ চাপিছে।
উল্লেখ কৰিব পাৰি যে মন্ত্ৰী হিমন্ত বিশ্ব শৰ্মাই সংবাদ মাধ্যমৰ আগত কৈ আহিছে যে অসমত সৰ্বাধিক ৫ লাখ লোকে এই আইনখনৰ অধীনত নাগৰিকত্ব লাভ কৰিব।