বিশ্ববিদ্যালয় অনুদান আয়োগে (UGC)য়ে চৰকাৰী স্কলাৰশ্বিপৰ অনলাইন আবেদনৰ সময়সীমা বৃদ্ধি কৰিছে।
যিসকল শিক্ষাৰ্থীয়ে এতিয়াও ২০২০-২১শিক্ষাবৰ্ষত পুনৰ্নবীকৰণ কৰা নাই তেওঁলোকে অহা ২০ জানুৱাৰিৰ ভিতৰত সেয়া কৰিব পাৰিব।
এক বিজ্ঞপ্তিত আয়োগে জানিবলৈ দিছে যে ত্ৰুটিপূৰ্ণ আবেদন পুনৰ জমা দিয়া তথা শিক্ষাৰ্থীসকলে শিক্ষা প্ৰতিষ্ঠানৰ জৰিয়তে আবেদন দাখিলৰ অন্তিম তাৰিখ অহা ৫ ফেব্ৰুৱাৰি ধাৰ্য কৰা হৈছে।
আবেদন জনোৱাৰ প’ৰ্টেলটো অহা ১ ছেপ্টেম্বৰলৈকো মুকলি থাকিব। আবেদন গ্ৰহণ কৰিবলগীয়া স্কলাৰশ্বিপসমূহৰ ভিতৰত আছে ইন্দিৰা গান্ধী পিজি স্কলাৰশ্বিপ ফৰ ছিংগল গাৰ্ল চাইল্ড (SGC), পিজি স্কলাৰশ্বিপ ফৰ ইউনিভাৰ্ছিটি ৰেংক হল্ডাৰ কেণ্ডিডেট (URH), ইশান উদয় স্পেছিয়েল স্কীম ফৰ নৰ্থইষ্টাৰ্ণ ৰিজিয়ন(NER) আৰু পিজি স্কলাৰশ্বিপ ফৰ প্ৰফেছনেল কোৰ্ছেছ ফৰ এছ চি/এছ টি কেণ্ডিডেট (PGSPROF)।
আয়োগৰ বিজ্ঞপ্তিটোত লগতে কোৱা হৈছে যে শিক্ষাৰ্থীসকলে যাতে শীঘ্ৰে আবেদনসমূহ জমা কৰে। কিয়নো ইয়াৰ ফলত শিক্ষা প্ৰতিষ্ঠানসমূহে সেইবোৰ নিৰ্দিষ্ট সময়ৰ ভিতৰতে দাখিল কৰিব পাৰে।
প্ৰতিটো স্কলাৰশ্বিপৰ বাবে আবেদনৰ নিৰ্দেশাৱলীসমূহ নেশ্যনেল স্কলাৰশ্বিপ প’ৰ্টেলৰ ৱেবছাইট scholarships.gov.in ত গৈ শিক্ষাৰ্থীসকলে চোৱাৰ লগতে অনলাইন আবেদনো কৰিব পাৰিব।
আনহাতে, বিশ্ববিদ্যালয় অনুদান আয়োগে MPhil আৰু PhDৰ থেচিছ জমা দিয়াৰ অন্তিম তাৰিখো বৃদ্ধি কৰিছে। সেই অনুসৰি এতিয়া শিক্ষাৰ্থীসকলে অহা ৩০ জুনলৈকে থেচিছসমূহ জমা দিব পাৰিব।
