এ পি এছ চিৰ কেলেংকাৰিৰ ধনৰ বিনিময়ত বক্ৰ পথেৰে চাকৰি লোৱা আৰু দুজন বিতৰ্কিত ৰাজপত্ৰিত বিষয়া আৰক্ষীৰ জালত পৰাৰ সম্ভাৱনা প্ৰকট হৈছে।
তাৎপৰ্যপূৰ্ভাৱে দীৰ্ঘদিন বিতৰ্কৰ আৱৰ্তত থকাৰ পাছতো লোকসেৱা আয়োগৰ তদন্তকাৰী আৰক্ষীয়ে বিশেষ পদক্ষেপ নোলোৱাৰ অভিযোগ উত্থাপন হৈ অহা এগৰাকী সাংবাদিকৰ দুজন আত্মীয়ক এইবাৰ আৰক্ষীয়ে জেৰা কৰাৰ বাবে সাজু হোৱা বুলি জানিব পৰা গৈছে।
অৱশ্যে আৰক্ষীৰ এক সূত্ৰই তেওঁলোকক জেৰাৰ বাবে এই পৰ্যন্ত তলৱ কৰা হোৱা নাই বুলি সদৰী কৰিলেও তেওঁলোকৰ বিৰুদ্ধে ব্যৱস্থা লোৱাৰ কথা অস্বীকাৰ কৰা নাই।
জানিব পৰা মতে যি দুজন ৰাজপত্ৰিত বিষয়াক তদন্তকাৰী আৰক্ষীয়ে জেৰা কৰিবৰ বাবে যোজা চলাইছে তাৰ এজন বিষয়াৰ বিৰুদ্ধে বৰ্তমান বিভাগীয় তদন্ত চলি আছে। তদুপৰি দুৰ্নীতিৰ অভিযোগত তেওঁক ইতিমধ্যে চাকৰিৰ পৰা নিলম্বন কৰা হৈছে।
উল্লেখ্যোগ্য যে, অনিয়মৰ জৰিয়তে ৰাকেশ পাল আমোলত ৰাজপত্ৰিত বিষয়াৰ চাকৰি লোৱাৰ অভিযোগত এই দুজন বিষয়াক তদন্তৰ আওতালৈ আনিবৰ বাবে কৃষক নেতা অখিল গগৈকে ধৰি বিভিন্নজনে দাবী উত্থাপন কৰি আহিছিল।
ইমানদিনে আৰক্ষীয়ে এই দুজন বিষয়াৰ বিৰুদ্ধে ব্যৱস্থা লোৱা নাছিল। কিন্তু শেহতীয়াকৈ তেওঁলোকক জেৰা কৰিবৰ বাবে আৰক্ষীয়ে সিদ্ধান্ত লোৱা বুলি জানিব পৰা গৈছে। সেয়ে হ’লে আৰক্ষীৰ তদন্ত সঠিক দিশত আগবঢ়া সম্পৰ্কত সৃষ্টি হোৱা শংকাও ম্লান হৈ পৰিব বুলি একাংশ সচেতন লোকে মত প্ৰকাশ কৰিছে।
