চলিত আৰ্চাৰী বিশ্বকাপত আজি স্বৰ্ণ পদক অৰ্জনেৰে উজ্বলি উঠিল ভাৰতীয় ৰিকাৰ্ভ মিক্সড্ দল। স্বৰ্ণ জয়ৰ পথত আজি তৰুণদীপ ৰায় আৰু ৰিধিৰে গঠিত মিক্সড্ দলে গ্ৰেট ব্ৰিটেইনক পৰাস্ত কৰে।
ফাইনেলত দুবাৰকৈ পিছ পৰিও সফল প্ৰত্যাৱৰ্তনেৰে শ্বুট অফত ব্ৰিটেইনৰ ব্ৰয়নি পিটমেন আৰু এলেক্স ৱাইজক পৰাস্ত কৰি স্বৰ্ণ পদক দখল কৰে ভাৰতীয় যুটিটোৱে।
প্ৰথম ছেটট ৩৫-৩৭ ব্যৱধানত পৰাস্ত হোৱাৰ পিছত দ্বিতীয় ছেট ৩৬-৩৩ ব্যৱধানত দখল কৰে ভাৰতে।
কিন্তু তৃতীয় ছেটত ভাৰতীয় যুটিটো পুনৰ ব্ৰিটিছ যুটিৰ হাতত ৩৯-৪০ ব্যৱধানত পৰাজিত হয়। অৱশ্যে চতুৰ্থ ছেটত সফল প্ৰত্যাবৰ্তনেৰে ৩৮-৩৭ ব্যৱধানত জয়ী হৈ মেচখন ৪-৪ পইণ্টত টাই কৰে ভাৰতে।
অৱশেষত উত্তেজনাপূৰ্ণ শ্বুট-অফত ১৮-১৭ ব্যৱধানত জয়লাভ কৰি স্বৰ্ণ নিশ্চিত কৰে তৰুণদীপ আৰু ৰিধিৰ যুটিয়ে।
ইয়াৰ পূৰ্বে শনিবাৰে ভাৰতৰ পুৰুষৰ কমপাউণ্ড দলে ফাইনেলত ফ্ৰান্সক পৰাস্ত কৰি আৰ্চাৰী বিশ্বকাপ ২০২২ ত ভাৰতৰ প্ৰথমটো পদক জয় কৰিছিল।
অভিষেক বাৰ্মা, অমন চাইনী আৰু ৰজত চৌহানেৰে গঠিত দলটোৱে ফ্ৰান্সক ২৩২-২৩০ ত পৰাস্ত কৰি স্বৰ্ণ অৰ্জন কৰিছিল।
