এটা অভাৰৰ আটাইকেইটা বলতেই ছিক্সাৰ মৰাটো মুখৰ কথা নহয়। অৱশ্যে এই অভিলেখ গঢ়ি থৈছে কেইবাগৰাকীও ক্ৰিকেটাৰে। ভাৰতৰো দুগৰাকী ক্ৰিকেটাৰ এই অভিলেখৰ গৰাকী।
এইবাৰ ইউৰোপীয় ক্ৰিকেট ছিৰিজত এনে অভিলেখ গঢ়িলে অৰিথৰন বছিকৰনে। এটা অভাৰত ছয়টা ছিক্সাৰ মাৰি ক্ৰিকেটাৰ এলিট তালিকাত নাম অন্তৰ্ভুক্ত কৰিছে ৩৪বছৰীয়া ক্লাৱ ক্ৰিকেটাৰগৰাকীয়ে।
ইউৰোপীয়ান ছিৰিজৰ টী-১০ লীগত বি ইউ বুষ্টাৰ্ছৰ হৈ বেটিং কৰিবলৈ নামি এনে অনবদ্য কৃতিত্ব গঢ়িছে অৰিথৰনে। তেওঁ কন ছেলেঞ্জাৰ্ছৰ বিৰুদ্ধে নিজৰ ইনিংছৰ পঞ্চম অভাৰত আয়ুস শৰ্মাৰ বলত ৬টা ছিক্সাৰ মাৰে।
অৱশেষত ৩টা চাৰি আৰু ৭টা ছয়ৰ সহায়ত ২৫বলত ৬১ৰাণ কৰি শ্ৰীনিবাসৰ বলত আউট হয় অৰিথৰন। তেওঁৰ দল বি ইউ বুষ্টাৰ্ছে নিৰ্ধাৰিত ১০ অভাৰত ৮টা উইকেট হেৰুৱাই ১১৫ৰাণ সংগ্ৰহ কৰে।
প্ৰত্যুত্তৰত বেটিং কৰিবলৈ নামি কন ছেলেঞ্জাৰ্ছে নিৰ্ধাৰিত ১০ অভাৰত ৬টা উইকেট হেৰুৱাই ৬৩ৰাণত ইনিংছ সামৰে। দলৰ হৈ শ্ৰীনিবাসে ২২ৰাণ কৰে। অৰিথৰনে ১ অভাৰ বলিং কৰি ৪ৰাণৰ বিনিময়ত ১টা উইকেটো লয়।
আন্তৰ্জাতিক তথা ঘৰুৱা ক্ৰিকেটকে ধৰি মুঠতে কেইবাজনেও এটা অভাৰত ৬টা ছিক্সাৰ মৰাৰ অভিলেখ গঢ়িলেও সেই তালিকা বৰ বেছি দীঘলীয়া বুলি ক’ব নোৱাৰি।
অৰিথৰনৰ পূৰ্বে এই অভিলেখৰ গৰাকী হৈছে যুৱৰাজ সিং, হাৰ্ছেলি গিবছ, কিৰেন পোলাৰ্ড, ৰবি শাস্ত্ৰী, গেৰী ছোবাৰ্ছ, হোৱাইটলি, হজৰতুল্লাহ, লিও কাৰ্টাৰ আৰু থিছাৰা পেৰেৰা।