চুবুৰীয়া ৰাষ্ট্ৰ ৰঙা চীনে ভাৰতবৰ্ষৰ সুৰক্ষাৰ প্ৰতি ভাবুকি স্বৰূপ হৈ পৰা বুলি বিভিন্ন মহলত সততে চৰ্চা চলি থাকে। ইতিমধ্যে বিজ্ঞ মহলত আন এক চৰ্চা অব্যাহত আছে যে ভাৰতৰ আন এখন প্ৰতিবেশী ক্ষুদ্ৰ ৰাষ্ট্ৰ ভুটানৰ সমীপলৈকেও ৰঙা চীনে স্থলপথ নিৰ্মান কৰি ভুটানৰ সৈতে সু সম্পৰ্ক গঢ়ি তোলাৰ চেষ্টা অব্যাহত ৰাখিছে। এনে এক জটিল সন্ধিক্ষণত ভাৰতবৰ্ষৰ চুবুৰীয়া ৰাষ্ট্ৰ ৰঙা চীনক প্ৰত্যাহ্বান জনাই আৰু ৰাষ্ট্ৰখনৰ পৰা আহিব পৰা বিপদ প্ৰতিৰোধ কৰাৰ লক্ষ্য আগত ৰাখিয়েই প্ৰধান মন্ত্ৰী নৰেন্দ্ৰ মোদী নেতৃত্বাধীন কেন্দ্ৰীয় চৰকাৰৰ প্ৰতিৰক্ষা বিভাগে দেশখন সুৰক্ষিত কৰি ৰাখিবলৈ এটাৰ পিছত আন এটাকৈ সুৰক্ষা ব্যৱস্থা তথা সতৰ্কতামূলক ব্যৱস্থা গ্ৰহণ কৰি আহিছে। ইয়াৰে এক অংশ হিচাপে চীন তথা ভূটান ৰাষ্ট্ৰৰ চুবুৰীয়া ৰাজ্য অসমৰ এটি অন্যতম অঞ্চল ভাৰতবৰ্ষৰ কেন্দ্ৰীয় চৰকাৰ তথা দেশৰ চোৰাংচোৱা বিভাগৰ বাবে এক গুৰুত্বপূৰ্ণ অঞ্চল হিচাপে চিহ্নিত হৈ পৰিছে।
ভাৰতবৰ্ষৰ চুবুৰীয়া ৰাষ্ট্ৰ ৰঙা চীনকএক প্ৰকাৰ প্ৰত্যহ্বান জনাই যিকোনো পৰিস্থিতিৰ মোকাবিলা কৰিব পৰাকৈ আৰু যিকোনো সমস্যা প্ৰতিহত কৰিব পৰাকৈ এক বৃহৎ অস্ত্ৰ ভাণ্ডাৰ স্থাপনৰ বাবে বাছি লৈছে।এটুকুৰা ঠাই। নৱগঠিত তামুলপুৰ জিলাৰ নাগ্ৰীজুলি আৰক্ষী চকীৰ অন্তৰ্গত ভাৰত-ভূটান সীমান্তৰ পৰা প্ৰায় ১৫ কিলোমিটাৰ দূৰত্বৰ কালচেনি নামৰ এখন ঠাই । এই বিশাল অস্ত্ৰ ভাণ্ডাৰ নিৰ্মাণৰ বাবে ইতিমধ্যে দুশ বিঘা মাটি আবন্টন দিয়া বুলি জানিব পৰা গৈছে। ভুটানৰ পাদদেশৰ পৰা বৈ অহা বৰনদীৰ (নামনিত পুঠিমাৰী নাম লৈছে) পাৰৰ এই কালচেনি নামৰ ঠাইত ৯ মে’ত বৰ্ডাৰ চিকিউৰিটি ফ’ৰ্চ চমুকৈ বিএছএফৰ এক বৃহৎ অস্ত্ৰ-ভাণ্ডাৰৰ আধাৰশিলা স্থাপন কৰা হব ।
এই আধাৰশিলা আনুষ্ঠানিক ভাবে স্থাপন কৰিব ভাৰত চৰকাৰৰ গৃহমন্ত্ৰী অমিত শ্বাহে। ৯ মে’ত গহমন্ত্ৰী অমিত শ্বাহৰ অসম ভ্ৰমণক লৈ অধিক তৎপৰ হৈ পৰিছে ৰাজ্য চৰকাৰ বিটিআৰ প্ৰশাসন আৰু তামুলপুৰ জিলা প্ৰশাসন। বিগত প্রায় এক সপ্তাহ ধৰি অস্ত্ৰ ভাণ্ডাৰৰ ভূমি পূজন আৰু আধাৰশিলা স্থাপনৰ কাম সফল ভাবে ৰূপায়ন কৰাৰ বাবে বিটিআৰৰ মুখ্য কাৰ্যবাহী সদস্য প্ৰমোদ বড়োকে ধৰি তামুলপুৰ জিলা উপায়ুক্ত সীমান্ত কুমাৰ দাস,আৰক্ষী অধীক্ষক পংকজ যাদৱ, ভাৰতীয় সেনা বাহিনীৰ বিষয়া সকল , বিএছএফৰ উচ্চ পদস্থ বিষয়া সকলে জিলা প্ৰশাসনৰ সৈতে সঘন মিলিত হোৱা দেখা গৈছে।
একে সময়তে গৃহমন্ত্ৰীক আদৰিবলৈ সাজু হৈ উঠিছে বিজেপিৰ দলীয় কৰ্মী তথা অঞ্চলটোৰ সৰ্বসাধাৰণ ৰাইজ
অস্ত্ৰ ভাণ্ডাৰ নিৰ্মাণৰ আধাৰশিলা স্থাপনৰ কাম যুদ্ধকালীন তৎপৰতাৰে কৰি থকা দেখা গৈছে আৰু ৯ মে’ত আধাৰশিলা স্থাপন কৰিবলগীয়া স্থানত ৰভা- মঞ্চ, বাট পথ নতুনকৈ নিৰ্মান কৰি সাজু কৰাৰ বাবে বিভিন্ন বিভাগে কাম তড়িৎ গতিত চলাই গৈছে।