অসমৰ নামৰূপত জন্মগ্ৰহণ কৰা তথা ৫৩ ৰাষ্ট্ৰীয় ৰাইফলছৰ মেজৰ লিটুল গগৈক সেনা অনুসন্ধান আদালতে দোষী সাব্যস্ত কৰি সোমবাৰে শাস্তিমূলক ব্যৱস্থা গ্ৰহণৰ নিৰ্দেশ দিছে। চলিত বৰ্ষৰ আগভাগত শ্ৰীনগৰৰ হোটেল এখনত এগৰাকী স্থানীয় কাশ্মিৰী মহিলাৰ সৈতে দেখা গৈছিল। ‘’ স্থানীয় লোকৰ সৈতে মিলা মিছাত বাধা-নিৰ্দেশ থকা সত্বেও মিলামিছা কৰা আৰু অভিযান চলি থকা অঞ্চলত কৰ্তৱ্যৰ পৰা আঁতৰি থকাৰ বাবে সেনাৰ আদালতে লিটুল গগৈক দোষী সাৱ্যস্ত কৰিছে।‘’
তদন্ত পোৱা ফলাফলসমূহ সেনাৰ কমাণ্ডাৰে অনুমোদন জনোৱাৰ পিছত সেনা আইনত উল্লেখ থকা ব্যৱস্থা অনুসৰি বিষয়াগৰাকীৰ বিৰুদ্ধে সেনা কৰ্তৃপক্ষই অভিযোগ আৰোপ কৰিব। তাৰপিছত তেওঁলোকে হয় বিষয়াগৰাকীৰ বিৰুদ্ধে শাস্তিৰ সিদ্ধান্ত গ্ৰহণ কৰিব, নহয় কোৰ্ট মাৰ্শ্বেলৰ বাবে পঠাব। ইণ্ডিয়ান এক্সপ্ৰেছৰ এটা বাতৰিত এই কথা প্ৰকাশ পাইছে।
উল্লেখযোগ্য যে ‘ইণ্ডিয়ান এক্সপ্ৰেছ’ৰ প্ৰতিৱেদনত প্ৰকাশ পোৱা অনুসৰি মাৰ্চৰ ২৩ তাৰিখে মেজৰ গগৈক শ্ৰীনগৰৰ এখন হোটেলত প্ৰত্যক্ষ কৰা হৈছিল। হোটেল গ্ৰেণ্ড মমতাৰ কৰ্মচাৰীৰ সৈতে বাক বিতণ্ডাত লিপ্ত হোৱাৰ পাছত তেওঁৰ সংগী মহিলাগৰাকী আৰু ছমিৰ আহমেদ নামৰ এজন সেনাৰ লোকসহ মেজৰ গগৈক শ্ৰীনগৰৰ এখন থানাত জেৰা কৰা হৈছিল।
আনহাতে, ব্ৰিগেডিয়াৰৰ অধীনত গঠিত হোৱা সেনা অনুসন্ধান অদালতে মেজৰ গগৈ, মহিলাগৰাকী আৰু গোচৰটোৰ সৈতে জড়িত সংশ্লিষ্ট সেনা বিষয়াসকলৰ সাক্ষ্য গ্ৰহণ কৰিছিল। অনুসন্ধানত লাভ কৰা তথ্যসমূহ মেজৰ জেনেৰেলৰ পৰামৰ্শক্ৰমে গ্ৰহণ কৰা হৈছিল আৰু ১৫ কৰ্পছৰ কামাণ্ডাৰৰ অনুমোদনলৈ প্ৰেৰণ কৰা হৈছিল।
ইপিনে এই সম্পৰ্কে যোৱা ২৬ মে’ত পাহালগামত জেনেৰেল বিপিন ৰাৱটে কৈছিল যে দোষী সাব্যস্ত হ’লে মেজৰ লিটুল গগৈক দৃষ্টান্তমূলক শাস্তি প্ৰদান কৰা হ’ব।
উল্লেখযোগ্য যে শ্ৰীনগৰত যোৱা বছৰ মেজৰ গগৈয়ে উপ নিৰ্বাচনৰ পূৰ্বে শিল দলিওৱা সকলৰ বিৰুদ্ধে এগৰাকী ব্যক্তিক জীপত বান্ধি মানৱ ঢাল হিচাপে ব্যৱহাৰ কৰা কাৰ্যক জেনেৰেল বিপিন ৰাৱটে সমৰ্থন কৰিছিল। এই কামৰ বাবে মেজৰ গগৈক জেনেৰেল ৰাৱটে ‘চীফ অব আৰ্মি ষ্টাফ কমেণ্ডেশ্যন কাৰ্ড’ প্ৰদান কৰিছিল। এই ঘটনাক কেন্দ্ৰ কৰি সমগ্ৰ ভাৰততে তীব্ৰ বিতৰ্কৰ সৃষ্টি হৈছিল।
