Taliban Terror: তালিবানৰ শাসনে আফগানিস্তানত শিক্ষা ব্যৱস্থাৰ ওপৰত ব্যাপক প্ৰভাৱ পেলাইছে। ছাত্ৰ-ছাত্ৰী একেলগে অধ্যয়ন কৰিব নোৱাৰাৰ ফতোৱা পূৰ্বেই জাৰি কৰা হৈছে। এইবাৰ উপাচাৰ্য সলনিৰ সিদ্ধান্তও ল’লে মৌলবাদী শাসকগোষ্ঠীয়ে।
কাবুল বিশ্ববিদ্যালয়ৰ অধ্যাপকসকল তালিবান চৰকাৰৰ এনে সিদ্ধান্তৰ ফলত প্ৰতিবাদত সৰৱ হৈ পৰিছে।
কাবুল বিশ্ববিদ্যালয়ৰ উপাচাৰ্য পদৰ পৰা বিশিষ্ট শিক্ষাবিদ ওচমান বাবুৰিক বৰ্খাস্ত কৰা হৈছে। তেওঁৰ সলনি তালিবানৰ ঘনিষ্ঠ মহম্মদ আশ্ৰফ ঘাইৰতক নতুন উপাচাৰ্য নিযুক্তি দিয়া হৈছে।
ইয়াৰ পাছতে বিশ্ববিদ্যালয়খনৰ অধ্যাপকসকলে দল বান্ধি পদত্যাগ কৰিবলৈ আৰম্ভ কৰে। এতিয়ালৈকে বিশ্ববিদ্যালয়খনৰ ৭০গৰাকী অধ্যাপকে পদত্যাগ কৰিছে।
বাতৰি অনুসৰি, তালিবান প্ৰশাসনৰ সিদ্ধান্তৰ প্ৰতিবাদত বৃহস্পতিবাৰে কাবুল বিশ্ববিদ্যালয়ৰ কমেও ৭০গৰাকী অধ্যাপকে পদত্যাগ কৰিছে।
বিশ্বাদ্যালয়খনৰ পদত্যাগী অধ্যাপকসকলৰ মাজত কেইবাগৰাকীও বিভাগীয় মুৰব্বীও আছে।
অধ্যাপকসকলৰ অভিযোগ যে উপাচাৰ্য হিচাপে বাবুৰি অতি শিক্ষিত আৰু যোগ্য ব্যক্তি আছিল। এগৰাকী পিএইচডি ডিগ্ৰীধাৰী বাবুৰিৰ স্থানত বহুওৱা হৈছে কলাৰ স্নাতক ঘাইৰতক।
আৰু পঢ়ক: Sipajhar Eviction:গৰুখুঁটিত প্ৰতিবাদকাৰীৰ ওপৰত আক্ৰমণ চলোৱা ফটোগ্ৰাফাৰ বিজয় শংকৰ বনিয়াক গ্ৰেপ্তাৰ
তালিবান চৰকাৰৰ এনে সিদ্ধান্তই বিশ্ববিদ্যালয়খনৰ ভাৱমূৰ্তি তথা মৰ্যাদা হানি কৰা বুলি দাবী কৰে অধ্যাপকসকলে।
ইপিনে, তালিবান চৰকাৰে ঘাইৰতক স্থায়ী নহয়, সাময়িকভাৱে ভাৰপ্ৰাপ্ত উপাচাৰ্যৰ দায়িত্ব দিয়া বুলিহে দাবী কৰিছে।
ঘাইৰত ইয়াৰ পূৰ্বে আফগান চৰকাৰৰ শিক্ষা মন্ত্ৰ্যালয়ৰ এগৰাকী মজলীয়া পৰ্যায়ৰ বিষয়া আছিল। সেই সময়ত ইছলামিক শিক্ষা প্ৰসাৰৰ দায়িত্বত থকাৰ সূত্ৰে তেওঁৰ তালিবানৰ সৈতে যোগাযোগ হৈছিল।
সেই ঘাইৰতকে এইবাৰ উপাচাৰ্যৰ পদত বহুওৱাৰ বাবে আফগানিস্তানৰ শৈক্ষিক মহলত তীব্ৰ প্ৰতিক্ৰিয়াৰ সৃষ্টি হৈছে।
