Flood in Guwahati , ৰাজ্যখনৰ ৰাজধানী চহৰ গুৱাহাটীত বৰষুণ বুলি ক’লেই মহানগৰবাসীৰ সন্মুখত ভাহি উঠে এক দু:স্বপ্ন।
Flood in Guwahati, এজাক বৰষুণতে কৃত্ৰিম বানপানীত জৰ্জৰিত হৈ পৰে গুৱাহাটী মহানগৰী।
সেইদৰে মঙলবাৰে পুৱাই অহা বৰষুণতে কৃত্ৰিম বানত বুৰ গ’ল মহানগৰীৰ বিভিন্ন অঞ্চল। আৰম্ভ হ’ল তীব্ৰ যান-জঁটৰ।
মহানগৰীৰ ডাউন টাউন, চাৰ্ভে, ওৱাৰলেছ, হাতীগাঁওকে ধৰি বিভিন্ন স্থানত ৰাজপথত একাঁঠু পানী।
আশ্চৰ্যজনকভাৱে, এজাক বৰষুণতে ৰাজধানী দিছপুৰৰ সমীপতে মূল পথ কৃত্ৰিম বানপানীৰে জলমগ্ন হৈ পৰিছে।
দিছপুৰৰ ওৱাৰলেছত কৃত্ৰিম বানপানীত নলা-নৰ্দমাৰ পানী একাকাৰ হৈ পৰিছে। পথাচাৰীয়ে ইয়াত কোনোমতে নাক কোচাই অতিক্ৰম কৰিবলগা হৈছে।
ইপিনে, যান-বাহনসমূহ পাৰ হৈ যোৱাৰ লগে লগে এই গেলা পানীসমূহে দুয়োকাষৰ পদপথত নলা-নৰ্দমাৰ আৱৰ্জনাবোৰ সিঁচি থৈ যায়।
ইপিনে, স্মাৰ্ট চিটিৰ ঢাক ঢোল বজাই চৰকাৰে মহানগৰীখনৰ বিকাশৰ ভুৱা ছবি দাঙি ধৰাত কোনো কৃপণালি কৰা নাই।
ৰাজ্যৰ মহানাগৰিকসকলে এতিয়া কিদৰে বিকাশৰ যাত্ৰাৰ অংশীদাৰ হৈ আগবাঢ়িছো লক্ষ্য কৰক। বছৰ বছৰ ধৰি কেবল প্ৰতিশ্ৰুতিৰ পাহাৰ আৰু চমক সৃষ্টিৰ মাজত জনসাধাৰণৰ জীৱন যাত্ৰা কেতিয়া মসৃন হ’ব সেয়া কোনোপধ্যে বোধগম্য নহয়।
ৰাইজৰ হয়তো মনত আছে বিজেপি চৰকাৰৰ দিনতে এক চমকপ্ৰদ পদক্ষেপ হাতত লোৱাৰ কথা সদৰী কৰিছিল গুৱাহাটী পৌৰ নিগমে।
কোৱা হৈছিল চাফাইকৰ্মীৰে নহয়, গুৱাহাটীৰ গেলা নলা চাফা কৰিব ৰবটে। উত্তৰ-পূৱৰ ভিতৰতে গুৱাহাটীত প্ৰথম বাৰৰ বাবে ৰবটৰ জৰিয়তে নলা নিষ্কাষণ কৰা হ’ব বুলি দাবীও কৰিছিল।
Also read : হাত দাঙিলে কোহলিৰ RCBয়ে; IPLত দুৰ্দান্ত জয়েৰে অভিযান আৰম্ভ KKRৰ
গুৱাহাটী মহানগৰীত থকা প্ৰায় ৩৭৯ টা নলা এই ৰবটেৰে নিষ্কাষণ কৰাৰ কথা আছিল। তদুপৰি, ৰবটৰ জৰিয়তে কামৰ শুভ উদ্বোধন কৰিছিল গুৱাহাটী উন্নয়ন দপ্তৰৰ তদানীন্তন মন্ত্ৰী গৰাকীয়ে।
পৌৰ নিগমৰ কোনো চাফাই কৰ্মী দুৰ্গন্ধময় নলাত ননমাকৈয়ে ৰবটৰ জৰিয়তে নলা নিষ্কাষণ কৰাৰ বাবে চাফাইকৰ্মীসকলক প্ৰশিক্ষণ দিয়াৰ কথা কোৱা হৈছিল।
আনহাতে, ৰৱটৰ সমান্তৰালভাৱে কেইবাখনো এক্সকেভেটৰো নিষ্কাষণত ব্যৱহাৰ কৰাৰ কথা কোৱা হৈছিল।
সি যি কি নহওক, সেই প্ৰকল্পৰ অস্তিত্ব আজি ক’তো বিচাৰি পাবলৈ নাই। এনেদৰে, গুৱাহাটী পৌৰ নিগমে বহুকেইটা প্ৰকল্প হাতত লৈছিল যদিও সৰহসংখ্যক প্রকল্পই বন্ধ হোৱাৰ উপক্ৰম হৈছে।
আজি এজাক বৰষুণেই স্মাৰ্ট চিটি গুৱাহাটীৰ স্বৰূপ উদঙাই দিলে।