প্ৰাকৃতিক পৰিবেশে বিৰাজ কৰা গোলাঘাট জিলাৰ খুমটাই সমষ্টিৰ দুটা অঞ্চল যোগীবাৰী আৰু মেলামৰা। ইতিমধ্যে সমষ্টিটোৰ বিধায়ক মৃনাল শইকীয়াৰ প্ৰচেষ্টাত অঞ্চল দুটি পৰ্যটন থলীলৈ পৰ্যবসিত হৈছে।
কিছু বছৰ পূৰ্বে পৰ্যটকক আকৰ্ষিত কৰিবলৈকে বিধায়কজনে মেলামৰাত বৃক্ষ উৎসৱ বা যোগীবাৰীত পক্ষী উৎসৱ আদি অনুষ্ঠানৰো আয়োজন কৰি আহিছে। লগতে পৰ্যটকৰ সুবিধাৰ্থে অঞ্চল দুটি সুন্দৰকৈ সজাই-পৰাই তুলিছে বিধায়কজনে।
এই অচিনাকি, পিছপৰা বিধানসভা সমষ্টিটোক আন্তঃৰাষ্ট্ৰীয় পৰ্যায়ত চিনাকি কৰাই দিয়াৰ প্ৰয়াস চলাইছে এইগৰাকী বিধায়কে। অৰ্থাৎ গ্ৰাম্য পৰ্যটন ক্ষেত্ৰৰ জৰিয়তে গ্ৰাম্য অৰ্থনীতিৰ ভেঁটি সুদৃঢ় কৰি তুলিবলৈকে সমষ্টি ভিত্তিক ব্ৰেণ্ড এম্বেচাদৰ নিযুক্তি দিছে অসমৰ অন্য এজন জনপ্ৰিয় কণ্ঠশিল্পী আচুৰ্য বৰপাত্ৰক।
সেয়েহে আজি পুৱাই হাতত ঝাড়ু লৈ স্থানীয় মহিলাৰ লগত চাফাই অভিযানত ব্যস্ত হ’ল খুমটাইৰ গ্ৰাম্য পৰ্যটনৰ ব্ৰেণ্ড এম্বেচাদৰ জন।
খুমটাইৰ বিধায়ক মৃনাল শইকীয়াই সমষ্টিটোত গ্ৰাম্য পৰ্যটনৰ ক্ষেত্ৰ গঢ়ি তোলাৰ পৰিকল্পনা গ্ৰহণ কৰি ইতিমধ্যে যোগীবাৰী, মেলামৰা আৰু খুমটাইত গ্ৰাম্য পৰ্যটন গঢ়ি তুলিছে।
জনপ্ৰিয় কণ্ঠশিল্পী আচুৰ্যক সমষ্টি ভিত্তিক ব্ৰেণ্ড এম্বেচাদৰ নিযুক্তি প্ৰদান কৰি সমষ্টিত অৰ্থনৈতিক স্বাৱলম্বিতা গঢ়াৰ পৰিকল্পনা কৰিছে বিধায়ক জনে। অকল ইমানেই নহয়, বিশ্ব ঐতিহ্য ক্ষেত্ৰ কাজিৰঙাৰ পিছতেই খুমটাইক পৰ্যটন ক্ষেত্ৰ গঢ়ি তোলাৰো সপোন বিধায়ক মৃনাল শইকীয়াৰ।
